Thiago Teixeira Archives - Kampuchea Thmey Daily

កីឡាករ Thiago ថា ថៃតែងតែចង់បានទឹកដីកម្ពុជា រាប់ទាំងសិល្បៈក្បាច់គុន

chean virakbot — Fri, 25 Jul 2025 03:47:26 +0000

កីឡាករដើមកំណើតប្រេស៊ីល សញ្ជាតិខ្មែរ Thiago Teixeira (សែន ច័ន្ទឬទ្ធីគុណ) បានលើកឡើងពីប្រទេសថៃដែលតែងតែដណ្តើមយកទឹកដីខ្មែរ រាប់ទាំងសិល្បៈក្បាច់គុនតាំងពីយូរលង់ណាស់មកហើយ ប៉ុន្តែកម្ពុជាត្រូវតែប្រយុទ្ធដើម្បីការពារទឹកដីរបស់ខ្លួន។

នៅយប់ថ្ងៃទី២៤ ខែកក្កដា ឆ្នាំ ២០២៥ កីឡាករ Thiago Teixeira ដែលបានកំពុងស្ថិតនៅប្រទេសប្រេស៊ីល បានលើកឡើងថា ៖«កម្ពុជា កំពុងប្រយុទ្ធដើម្បីការពារប្រទេសជាតិ និងប្រជាជនរបស់ខ្លួន ខ្ញុំនៅប្រទេសប្រេស៊ីល ហើយបានឃើញពីបញ្ហាកំពុងកើតឡើងយ៉ាងណា។ ប្រទេសថៃ កំពុងវាយប្រហារកម្ពុជាដើម្បីដណ្តើមទឹកដី រឿងបែបនេះបានកើតតាំងពីអតីតកាល ហើយពួកគេបានបង្កើតឡើងទៀត។ យើងនឹងតែងតែប្រយុទ្ធដើម្បីសន្តិភាពគ្រប់ជាតិសាសន៍ សិល្បៈ និងក្បាច់គុន»។

កន្លងមក កីឡាករ សែន ច័ន្ទឬទ្ធីគុណ បានលើកឡើងពីថៃដែលតែងតែដណ្តើមយក និងអះអាងជារបស់ខ្លួនអំពីក្បាច់គុន សិល្បៈ និងសាក់/យ័ន្តជាដើម។

កាលពីខែមិថុនា ឆ្នាំ ២០២៣ កីឡាករបាននិយាយពីសាក់/យ័ន្តរបស់ខ្មែរថា ៖«សាក់ពេញនិយមខ្លាំងនៅប្រទេសថៃ ជាពិសេសលើកីឡាករប្រដាល់ថៃ ប៉ុន្តែសាក់ទាំងនេះមានប្រភពដើមពីប្រទេសកម្ពុជា។ ការផុសនេះត្រូវបានសរសេរភាសាផ្សេងគ្នា (សាក់ដ៏ពិសិដ្ឋរបស់កម្ពុជា)។ កម្ពុជាបានបាត់បង់វា បន្ទាប់ពីលទ្ធិកុម្មុយនិស្តនៅឆ្នាំ១៩៧៥ នៅពេលប្រជាជនជាង១/៤បានបាត់បង់ជីវិត ហើយប្រវត្តិសាស្ត្ររបស់កម្ពុជាត្រូវបានគេលួចតាំងពីពេលនោះមក។ ប៉ុន្តែយើងបានវិលត្រឡប់មកវិញ និងកាន់តែរីកធំឡើងពីមួយថ្ងៃទៅមួយថ្ងៃ ហើយពិភពលោកនឹងដឹងការពិតដែលនៅពីក្រោយរឿងរ៉ាវទាំងនេះ។ សាក់ទាំងនេះគឺជាអក្សរខ្មែរ ជាភាសាខ្មែរ»។

កីឡាករ សែន ច័ន្ទឬទ្ធីគុណ ទទួលបានសញ្ជាតិខ្មែរកាលពីដើមឆ្នាំ២០២៣ និងបានប្រកបអាជីពប្រដាល់នៅប្រទេសកម្ពុជាប្រមាណ២ឆ្នាំចុងក្រោយ មុនពេលត្រឡប់ទៅប្រទេសប្រេស៊ីលវិញ៕

អត្ថបទ៖ វីរបុត្រ

The post កីឡាករ Thiago ថា ថៃតែងតែចង់បានទឹកដីកម្ពុជា រាប់ទាំងសិល្បៈក្បាច់គុន appeared first on Kampuchea Thmey Daily.

Thiago ដាក់គោលដៅពាក់ទង់ជាតិកម្ពុជា ប្រកួតនៅ UFC ដោយសម្ងំហាត់នៅប្រេស៊ីល

Kosal Sem — Fri, 07 Mar 2025 05:04:10 +0000

កីឡាករប្រេស៊ីល-សញ្ជាតិខ្មែរ សែន ចន្ទរិទ្ធីគុន (Thiago Teixeira) បានទៅដល់ស្រុកកំណើតវិញ ក្នុងប្រទេសប្រេស៊ីល ដើម្បីហ្វឹកហាត់នៅក្លិប Fight Nerd ដោយមានគោលដៅលើកទង់ជាតិកម្ពុជា ឡើងប្រកួតនៅសង្វៀន UFC ដែលជាសង្វៀនដ៏ធំរបស់ពិភពលោក។

សែន ចន្ទរិទ្ធីគុន

ទាក់ទងនឹងរឿងខាងលើ សែន ចន្ទរិទ្ធីគុន បានបង្ហោះសំណេរនៅលើបណ្តាញសង្គមកាលពីពេលថ្មីៗនេះថា៖ «ខ្ញុំបានត្រឡប់មកដល់ប្រទេស ប្រេស៊ីល វិញហើយ ដើម្បីហ្វឹកហាត់ជាមួយក្រុមដ៏ល្អបំផុតក្នុងពិភពលោក Fight Nerd ជាមួយនឹងអ្នកប្រយុទ្ធដ៏ខ្លាំងបំផុតបច្ចុប្បន្ន។ នេះវាជាការត្រៀមខ្លួនរបស់ខ្ញុំ ដើម្បីលើកកិត្តិយសជូនកម្ពុជា។ ខ្ញុំនឹងប្រឹងឱ្យអស់ពីសមត្ថភាព ដោយគ្មានការរុញរាឡើយ»។

សែន ចន្ទរិទ្ធីគុន

គួរដឹងថា សែន ចន្ទរិទ្ធីគុន គឺជាអ្នកប្រដាល់តំណាងឱ្យគុនខ្មែរ ហើយគាត់ គឺមានសមត្ថភាពប្រកួត ទាំងលក្ខណៈក្បាច់គុនចម្រុះ (MMA) និងគុនខ្មែរ៕

សែន ចន្ទរិទ្ធីគុន

អត្ថបទ៖ សេម កុសល

The post Thiago ដាក់គោលដៅពាក់ទង់ជាតិកម្ពុជា ប្រកួតនៅ UFC ដោយសម្ងំហាត់នៅប្រេស៊ីល appeared first on Kampuchea Thmey Daily.

Thiago ដាក់គោលដៅមេដាយមាសពីកីឡាគុនចម្រុះអាស៊ី

chean virakbot — Wed, 03 Jul 2024 03:40:21 +0000

កីឡាករ សែន ចន្ទឬទ្ធីគុណ (Thiago Teixeira) បានដាក់គោលដៅយកមេដាយមាសក្នុងការប្រកួតកីឡាគុនចម្រុះជើងឯកអាស៊ី លើកទី២ ឆ្នាំ២០២៤ ដែលកម្ពុជាធ្វើជាម្ចាស់ផ្ទះនៅថ្ងៃទី១១-១២-១៣ ខែកក្កដា នៅវិមានពហុកីឡដ្ឋានជាតិអូឡាំពិក។

នេះជាការប្រកួតក្នុងព្រឹត្តិការណ៍ផ្លូវការជាលើកដំបូងសម្រាប់ Thiago បន្ទាប់ពីរូបគេទទួលបានសញ្ជាតិខ្មែរកាលពីខែមេសា ឆ្នាំ២០២៣។ សម្រាប់ការប្រកួតតំណាងជាតិលើកដំបូងនេះ លោកជឿជាក់លើសមត្ថភាពរបស់ខ្លួនដែលអាចនឹងទទួលបានសមិទ្ធផលជូនជាតិ។

ក្នុងបទសម្ភាសជាមួយសារព័ត៌មាន«កម្ពុជាថ្មី» កីឡាករវ័យច្រើន សែន ចន្ទឬទ្ធីគុណ បានបង្ហាញអារម្មណ៍រីករាយ និងមានមោទនភាព។ លោកបានឲ្យដឹងថា ៖«យើងបានខិតខំប្រឹងប្រែងហ្វឹកហាត់ខ្លាំងជារៀងរាល់ថ្ងៃ។ យើងបានហ្វឹកហាត់ក្នុងក្រុមអត្តពលិកកម្ពុជារួមគ្នា ហើយយើងបានព្យាយាមជួយគ្នាទៅវិញទៅមកដើម្បីកែលំអឲ្យកាន់តែប្រសើរឡើង»។

លោកបន្តថា ៖«ខ្ញុំធ្លាប់ហ្វឹកហាត់ក្បាច់គុនជឺជីតស៊ូជាង៥ឆ្នាំ និង MMA។ ខ្ញុំធ្លាប់ហ្វឹកហាត់នៅក្នុងក្លិបគុនអាជីព។ ដូច្នេះខ្ញុំមានការរីកចម្រើនផ្នែកជំនាញក្រោម បូករួមទាំងជំនាញវ៉ៃឈររបស់ខ្ញុំ និងគុនខ្មែរផង។ ខ្ញុំបានត្រៀមខ្លួនរួចរាល់សម្រាប់ការប្រកួតដើម្បីទទួលបានមេដាយមាស»។

ក្រៅពីការហ្វឹកហាត់ជាមួយគ្រូដែលមានជំនាញគុនចម្រុះច្បាស់ ការហ្វឹកហាត់ជាមួយមិត្តរួមជាតិគឺជាការចែករំលែកតាមបទពិសោធតាម និងជំនាញរៀងខ្លួន។ Thiago ប្រាប់ថា ៖«រាល់ថ្ងៃ យើងបានហ្វឹកហាត់ជាមួយគ្នា។ ចំណេះ ជំនាញ បទពិសោធដែលយើងមាន យើងតែងតែជួយគ្នាទៅវិញទៅមក។ ជាពិសេសយើងមានគ្រូបង្វឹកដែលមានខ្សែក្រវាត់ខ្មៅផ្នែកកីឡាជឺជីតស៊ូ។ គាត់មានបច្ចេកទេសច្រើន អីចឹងបានហ្វឹកហាត់ជារៀងរាល់ថ្ងៃ»។

Thiago បានប្តេជ្ញាថា ៖«ក្តីរំពឹងរបស់ខ្ញុំគឺធ្វើឲ្យបានល្អបំផុតតាមដែលអាចទៅរួច។ ខ្ញុំជឿជាក់លើព្រះជាម្ចាស់។ ខ្ញុំជឿជាក់លើខ្លួនឯង ស្មារតីរបស់ខ្ញុំខ្លាំងដែលខ្ញុំដាក់គោលដៅយកមេដាយមាស»។

ព្រឹត្តិការណ៍ប្រកួតគុនចម្រុះអាស៊ីគឺរៀបចំដោយគណៈកម្មាធិការជាតិអូឡាំពិកកម្ពុជា សហព័ន្ធកីឡាយុទ្ធគុនចម្រុះអាស៊ី (AMMA) និងសហព័ន្ធកីឡាយុទ្ធគុនចម្រុះកម្ពុជា។ នេះជាការប្រកូតផ្លូវការ ប៉ុន្តែមិនមែនជាការប្រកួតគុនចម្រុះអាជីពដូចសង្វៀនឯកជនរៀបចំដែលមានក្បាច់គ្រោះថ្នាក់ និងសាហាវៗនោះទេ។ គោលបំណងធំបំផុតនៃការរៀបចំព្រឹត្តិការណ៍នេះដើម្បីជំរុញ ផ្សព្វផ្សាយ និងលើកកម្ពស់តម្លៃកីឡាគុនចម្រុះឲ្យក្លាយជាកីឡាផ្លូវការ ស្តង់ដាត្រឹមត្រូវដើម្បីចូលក្នុងព្រឹត្តិការណ៍កីឡាអាស៊ី និងកីឡាអូឡាំពិក។

ការប្រកួតគុនចម្រុះជើងឯកអាស៊ី លើកទី២ នៅប្រទេសកម្ពុជា ក៏ជាការប្រកួតជម្រុះដើម្បីជ្រើសរើសជ័យលាភីទៅចូលរួមប្រកួតក្នុងព្រឹត្តិការណ៍«កីឡាក្នុងសាល និងក្បាច់គុនអាស៊ី (Asian Indoor and Martial Arts Games) ឆ្នាំ២០២៤ នៅប្រទេសថៃនាខែវិច្ឆិកា។

ក្នុងនាមជាម្ចាស់ផ្ទះ កម្ពុជាបានត្រៀមអត្តពលិកទាំង១៦រូបគឺកីឡាករ ផេង សុបញ្ញា, ឡុង ឡា, រិន សារ័ត្ន, ហ៊ុន គឹមហៀង, មាស ម៉ើ, សែន ច័ន្ទឫទ្ធិគុណ, ហ៊ុន ចន្ទរាជ, ធាន អាន, ចាន់ រតនា, អេ វីរៈខាំឈីតភូថង, ហាត់ ភី ខណៈកីឡាការិនីមានដូចជា ខៀវ ចិន្ដារ័ត្ន, នៅ ស្រីពៅ, គុណ វ៉ាន់នីតា, សំ ថារ័ត្ន និង ទួន ស្រីភីន៕

អត្ថបទ៖ វីរបុត្រ

The post Thiago ដាក់គោលដៅមេដាយមាសពីកីឡាគុនចម្រុះអាស៊ី appeared first on Kampuchea Thmey Daily.

ចន្ទរិទ្ធីគុន និង សុធា ឈ្នះខ្សែក្រវាត់គុនខ្មែរ ISKA ខណៈ អាលៀ ចាញ់មិនអស់ចិត្ត

chean virakbot — Mon, 08 Apr 2024 03:57:31 +0000

កីឡាករគុនខ្មែរ ប៊ុន សុធា និងកីឡាករកម្ពុជា-ប្រេស៊ីល សែន ចន្ទរិទ្ធីគុន បានឈ្នះខ្សែក្រវាត់ ISKA គុនខ្មែរពិភពលោក ប៉ុន្តែកីឡាករអ៉ីរ៉ង់តំណាងគុនខ្មែរ អាលៀ អាសហ្គា ត្រូវបានកាត់ក្តីឲ្យចាញ់ពិន្ទុកីឡាករថៃទាំងសោកស្តាយបំផុត។

ក្រោយខកខានឡើងសង្វៀនអស់រយៈពេលជាច្រើនខែកីឡាករប្រេស៊ីលទទួលបានសញ្ជាតិខ្មែរ សែន ចន្ទរិទ្ធីគុន នៅតែមានសមត្ថភាពល្អតាមរយៈរន្ទះជើងទាត់ដ៏ធ្ងន់ និងជង្គង់។ រូបគេទទួលបានជ័យជម្នះដោយពិន្ទុលើកីឡាករតួកគី ស៊ីណាន ឆាឡា ដើម្បីគ្រងខ្សែក្រវាត់ ISKA គុនខ្មែរពិភពលោកទម្ងន់៧៥គីឡូក្រាម យប់ថ្ងៃអាទិត្យ ទី៧ ខែមេសា ឆ្នាំ២០២៤។

នៅយប់ជាមួយគ្នានេះ ប៊ុន សុធា បានតស៊ូពីការដុនដាបដើមទឹកទី១ដើម្បីវាយបកលើកីឡាករម៉ាឡេស៊ី រហូតទទួលបានជ័យជម្នះ។ ចូលទឹកទី១ភ្លាម កីឡាករម៉ាឡេស៊ី អ៊ូម៉ា រេដវូហ្វ ចូលវាយដោយបច្ចេកទេសតាមរយៈការទាត់ ជង្គង់ និងកែង។ អ្វីដែលគួរឲ្យកត់សំគាល់ រូបគេបានទាត់ពោះ ប៊ុន សុធា ឲ្យស្រុតស្ទើរតែដួលទៅហើយ ប៉ុន្តែអ្នកលេងគុនខ្មែរបានតស៊ូ និងចូលបុកកែងចុងទឹកធ្វើឲ្យកីឡាករម៉ាឡេស៊ីបែកឈាម។

នៅទឹកទី២ ប៊ុន សុធា នៅតែធ្វើបានល្អតាមរយៈការវាយកែង និងកណ្តាប់ដៃ ហើយចូលទឹកទី៣ រូបគេវាយឲ្យអាជ្ញាកណ្តាលរាប់ អ៊ូម៉ា វេដ វូហ្វ ៨ម្តង។ ចប់ការប្រកួត ប៊ុន សុធា ទទួលបានជ័យជម្នះដោយពិន្ទុជាឯកច្ឆន្ទដើម្បីគ្រងខ្សែក្រវាត់ ISKA គុនខ្មែរពិភពលោកទម្ងន់៥៧គីឡូក្រាម។

ការប្រកួតដណ្តើមខ្សែក្រវាត់ ISKA មួយគូទៀតទំនងជាធ្វើឲ្យអ្នកគាំទ្រ និងសាមីខ្លួនកីឡាករសោកស្តាយមិនស្ទើរទេនៅពេលកាត់សេចក្តីឲ្យចាញ់កីឡាករថៃ ផនសាវ៉ាន ជេអ័រ ដោយពិន្ទុ។

នៅទឹកទី១ កីឡាករចាស់វស្សាថៃ ផនសាវ៉ាន ធ្វើបានល្អតាមរយៈការវាយកណ្តាប់ដៃ កែង និងទាត់ នៅពេលប្តូរកណ្តាប់ដៃជាមួយកីឡាករអ៉ីរ៉ង់ អាលៀ អាសហ្គា ដែលបានដួលច្រើនលើក ប៉ុន្តែនៅទឹកទី២ កីឡាករអ៉ីរ៉ង់វ៉ៃតំណាងគុនខ្មែរមិនបានប្តួរកណ្តាប់ដៃដូចទឹកទី១ទេ។ រូបគេបានចេញកណ្តាប់ដៃ និងទាត់មួយៗតាមបច្ចេកទេស។ អ្វីដែលគួរឲ្យកត់សំគាល់បំផុតនោះគឺ រូបគេបានវាយកណ្តាប់ដៃស្តាំឲ្យកីឡាករថៃដួលអុកគូថ ប៉ុន្តែក្រោកវិញយ៉ាងលឿនដែលធ្វើឲ្យអាជ្ញាកណ្តាលមិនរាប់។ នៅចុងទឹកទី៣ អាលៀ បានវាយកណ្តាប់ដៃយ៉ាងល្អលើផ្ទៃមុខ ផនសាវ៉ាន ស្ទើរដួលទៅហើយ ប៉ុន្តែបានខ្សែរេញនៅជាប់ខ្នងធ្វើឲ្យរូបគេពង្រឹងស្មារតីបានមុនពេលចប់ទឹក។

និយាយរួម អាលៀ អាសហ្គា មានប្រៀបនៅទឹកទី២ និងទី៣ ខណៈកីឡាករថៃមានប្រៀបនៅទឹកទី១ ប៉ុន្តែចៅក្រមទាំង៥រូបបានកាត់សេចក្តីឲ្យកីឡាករ ផនសាវ៉ាន ទទួលបានជ័យជម្នះដើម្បីក្លាយជាកីឡាករបរទេសទី១ឈ្នះខ្សែក្រវាត់ ISKA គុនខ្មែរពិភពលោកទម្ងន់៦៥គីឡូក្រាម។

សម្រាប់លទ្ធផលនេះបានធ្វើឲ្យអ្នកគាំទ្រជាច្រើនបានរិះគន់ចំពោះការកាត់សេចក្តីរបស់ចៅក្រម។

គិតរហូតដល់ពេលនេះ កីឡាករគុនខ្មែរ៤រូបបានឈ្នះខ្សែក្រវាត់ ISKA ក្នុងនោះមានអតីតកីឡាករ វ៉ន វីវ៉ា បានឈ្នះកាលពីឆ្នាំ២០០៨ ដែលរក្សាទុកដល់បច្ចុប្បន្ន។ អតីតអ្នកប្រដាល់ មាស ចន្ថា ក៏ធ្លាប់ឈ្នះខ្សែក្រវាត់នេះក្នុងឆ្នាំ២០០៨ ប៉ុន្តែបានរបូតទៅវិញនៅឆ្នាំ២០១២។ ឥឡូវនេះ សែន ចន្ទរិទ្ធីគុន និង ប៊ុន សុធា បានឈ្នះនៅឆ្នាំ២០២៤៕

អត្ថបទ៖ វីរបុត្រ

The post ចន្ទរិទ្ធីគុន និង សុធា ឈ្នះខ្សែក្រវាត់គុនខ្មែរ ISKA ខណៈ អាលៀ ចាញ់មិនអស់ចិត្ត appeared first on Kampuchea Thmey Daily.

ព្រឹត្តិការណ៍ធំមិនធ្លាប់មាន មួយរាត្រី៣ខ្សែក្រវាត់ ISKA គុនខ្មែរពិភពលោក

chean virakbot — Fri, 05 Apr 2024 10:19:03 +0000

កាន់តែធំ និងអស្ចារ្យសង្វៀនប្រដាល់ BTV Ganzberg IDOL Kun khmer បានធ្វើសន្និសីទសារព័ត៌មានប្រកាសរៀបចំការប្រកួតដណ្ដើមខ្សែក្រវាត់ ISKA គុនខ្មែរពិភពលោកដោយក្រុមហ៊ុន Ganzberg Beer បានដាក់ខ្សែក្រវាត់ចំនួន៣គ្រឿង។ នេះជាលើកទីមួយដែលមិនធ្លាប់មានពីមុនមកសម្រាប់ការវាយដណ្ដើមខ្សែក្រវាត់ពិភពលោក៣ខ្សែ។

អ្នករៀបចំកម្មវិធីខាងលើនេះបានបន្ថែមទៀតថា ស្ថាប័ន ISKA ដែលមានមូលដ្ឋាននៅសហរដ្ឋអាមេរិក និងមានសមាជិកជាង៥០ប្រទេស ឥឡូវមានវត្តមានខ្សែក្រវាត់ពិសេសនេះនៅកម្ពុជាហើយ។ លោកជឿជាក់ថា ការប្រកួតនៅថ្ងៃអាទិត្យ ទី៧ ខែមេសា នឹងធ្វើឲ្យពិភពលោក និងអន្តរជាតិស្គាល់គុនខ្មែរកាន់តែស្គាល់។

ជំនួបកំពូលអ្នកប្រយុទ្ធគុនខ្មែរមិត្តភាពជាតិ

កីឡាករ ទូច ប្រុសណុច (កម្ពុជា) Vs រិទ្ធី ម៉ាឡាកាំង (កម្ពុជា)

ជំនួបកំពូលអ្នកប្រយុទ្ធគុនខ្មែរអន្តរជាតិ

កីឡាករ ទូច ដេវីដ (កម្ពុជា) Vs ហ្សាស ជីអេហ្វស៊ី (ម៉ាឡេស៊ី)
កីឡាករ នី វីរ៉ាផា (កម្ពុជា) Vs យ៉ានីស ម៉ាហ៊្សនី (អាល់ហ្សេរី)
កីឡាករ សាន់ គុនខ្មែរ (កម្ពុជា) Vs យេ យីង នុង (មីយ៉ាន់ម៉ា)

ជំនួបដណ្ដើមខ្សែក្រវាត់ពិភពលោក ISKA គុនខ្មែរ

កីឡាករ អាលៀ អាសហ្គា (អ៉ីរ៉ង់) Vs ផនសាវ៉ាន ជេអ័រ (ថៃ) ទម្ងន់៦៥គីឡូក្រាម
កីឡាករ ប៊ុន សុធា (កម្ពុជា) Vs អ៊ូម៉ា វេដ វូហ្វ (ម៉ាឡេស៊ី) ទម្ងន់៥៧គីឡូក្រាម
កីឡាករ សែន ចន្ទរិទ្ធីគុន (កម្ពុជា-ប្រេស៊ីល) Vs ស៊ីណាន ឆាឡា (តួកគី) ទម្ងន់៧៥គីឡូក្រាម

GANZBERG ស្រឡាញ់គុនខ្មែរ! GANZBERG លើកស្ទួយគុនខ្មែរឡើងដល់កម្រិតពិភពលោក!

ថ្ងៃអាទិត្យ ទី០៧ ខែមេសា ឆ្នាំ២០២៤ នៅខណ្ឌកំបូល វត្តស្ងួនពេជ្យ វេលាម៉ោង ៨យប់តទៅ ផ្សាយផ្ទាល់ពីកញ្ចក់ទូរទស្សន៍ BTV និង Facebook Page BTV News និង Ganzberg page។

The post ព្រឹត្តិការណ៍ធំមិនធ្លាប់មាន មួយរាត្រី៣ខ្សែក្រវាត់ ISKA គុនខ្មែរពិភពលោក appeared first on Kampuchea Thmey Daily.

ក្រោយរង់ចាំ១២ឆ្នាំ ខ្សែក្រវាត់ ISKA ដាក់ឲ្យប្រកួតជាថ្មីលើដីកម្ពុជាចុងសប្តាហ៍នេះ

chean virakbot — Fri, 05 Apr 2024 01:37:19 +0000

នៅថ្ងៃអាទិត្យ ទី៧ ខែមេសា ឆ្នាំ២០២៤ ចុងសប្តាហ៍នេះនឹងមានការប្រកួតដណ្តើមខ្សែក្រវាត់គុនខ្មែរពិភពលោក ISKA ជាលើកដំបូងនៅលើទឹកដីកម្ពុជា បន្ទាប់ពីខកខានអស់រយៈពេលប្រមាណ១២ឆ្នាំកន្លងទៅ។

ការប្រកួតដណ្តើមខ្សែក្រវាត់ពិភពលោក ISKA ជាថ្មីនៅសង្វៀនបាយ័ននេះមានរហូតដល់ទៅ៣គូនៅពេលកីឡាករអ៉ីរ៉ង់ហាត់គុនខ្មែរ អាលៀ អាសក្កា ប្រកួតជាមួយកីឡាករថៃ ផន សសាវ៉ាន ជេអរ ដណ្តើមខ្សែក្រវាត់គុនខ្មែរ ISKA ទម្ងន់៦៥គីឡូក្រាម។

ម្ចាស់ផ្ទះកម្ពុជា ប៊ុន សុធា ប្រកួតជាមួយកីឡាករម៉ាឡេស៊ី អ៊ូម៉ា រេដវូហ្វ ដណ្តើមខ្សែក្រវាត់គុនខ្មែរ ISKA ទម្ងន់៥៧គីឡូក្រាម។ ជាមួយគ្នានេះ ខ្លាចាស់ខ្មែរ-ប្រេស៊ីល សែន ចន្ទរិទ្ធីគុណ ប្រកួតជាមួយកីឡាករតួកគី ស៊ីណាន ឆាឡា ដណ្តើមខ្សែក្រវាត់គុនខ្មែរ ISKA ទម្ងន់៧៥គីឡូក្រាម។

នេះអាចចាត់ទុកជាលើកទី១ដែលមានការប្រកួតដណ្តើមខ្សែក្រវាត់ពិភពលោក ISKA នៅលើទឹកដីប្រទេសកម្ពុជាក្នុងរយៈពេល១២ឆ្នាំចុងក្រោយ បន្ទាប់ពីធ្លាប់មានការប្រកួតកាលពីឆ្នាំ២០១២។ នៅចាំបានថា វ៉ន វីវ៉ា បានប្រកួតឈ្នះកីឡាករអង់គ្លេស Ben Barwise ដើម្បីទទួលបានខ្សែក្រវាត់ ISKA ពិភពលោកនៅឆ្នាំ២០០៨ ដែលបានក្លាយជាកីឡាករកម្ពុជាទី១ទទួលបានខ្សែក្រវាត់នេះ។

បន្ទាប់មក កីឡាករកម្ពុជាម្នាក់ទៀតគឺ មាស ចន្ថា បានប្រកួតឈ្នះកីឡាករអង់គ្លេស Tim Thomas ដើម្បីទទួលបានខ្សែក្រវាត់ ISKA ពិភពលោកនៅខែសីហា ឆ្នាំ២០០៨ នៅពហុកីឡដ្ឋានជាតិអូឡាំពិក។ រូបគេបានក្លាយជាកីឡាករកម្ពុជាទី២ដែលបានឈ្នះខ្សែក្រវាត់ពិភពលោកនេះ។

ទោះបីជាយ៉ាងណា រយៈពេលជាង៣ឆ្នាំក្រោយមក Tim Thomas បានវិលត្រឡប់មកទឹកដីកម្ពុជាជាថ្មីដើម្បីដណ្តើមខ្សែក្រវាត់ ISKA ពីកីឡាករកម្ពុជា មាស ចន្ថា វិញម្តង។ នៅពេលនោះកីឡាករកម្ពុជាមិនអាចការពារខ្សែក្រវាត់របស់ខ្លួនបានទេដោយបានសន្លប់ក្នុងទឹកទី៥របូតខ្សែក្រវាត់ទៅម្ចាស់ដើមវិញនៅឆ្នាំ២០១២។

រហូតដល់ពេលនេះមានតែអតីតកីឡាករ វ៉ន វីវ៉ា ម្នាក់គត់ដែលមានខ្សែក្រវាត់ពិភពលោក ISKA ប៉ុន្តែនៅពេលនោះមិនទាន់ប្រើឈ្មោះខ្សែក្រវាត់គុនខ្មែរ ISKA ពិភពលោកទេ។ សម្រាប់ថ្ងៃទី៧ ខែមេសា នេះគឺប្រើឈ្មោះ ខ្សែក្រវាត់គុនខ្មែរ ISKA។

ជំនួបដណ្ដើមខ្សែក្រវាត់ពិភពលោក ISKA គុនខ្មែរ

កីឡាករ អាលៀ អាសហ្គា (អ៉ីរ៉ង់) Vs ផនសាវ៉ាន ជេអ័រ (ថៃ) ទម្ងន់៦៥គ.ក
កីឡាករ ប៊ុន សុធា (កម្ពជា) Vs អ៊ូម៉ា វេដ វូហ្វ (ម៉ាឡេស៊ី) ទម្ងន់៥៧គ.ក
កីឡាករ សែន ចន្ទរិទ្ធីគុន (ខ្មែរ-ប្រេស៊ីល) Vs ស៊ីណាន ឆាឡា (តួកគី) ទម្ងន់៧៥គ.ក

អត្ថបទ៖ វីរបុត្រ

The post ក្រោយរង់ចាំ១២ឆ្នាំ ខ្សែក្រវាត់ ISKA ដាក់ឲ្យប្រកួតជាថ្មីលើដីកម្ពុជាចុងសប្តាហ៍នេះ appeared first on Kampuchea Thmey Daily.

Thiago ថា ដល់ពេលត្រូវជម្រះបញ្ជី Saiyok កាលពីជាង១០ឆ្នាំមុន

chean virakbot — Tue, 06 Feb 2024 04:09:34 +0000

កីឡាករប្រដាល់ប្រេស៊ីល-កម្ពុជា សែន ច័ន្ទរិទ្ធីគុណ (Thiago Teixeira) ចង់ជម្រះបញ្ជីចាស់ជាមួយកីឡាករថៃ Saiyok Pumpanmuang បន្ទាប់ពីរូបគេធ្លាប់បានចាញ់ពិន្ទុកាលពីជាង១០ឆ្នាំមុន។

Thiago ដែលបានផុសរូបថតប្រកួតជាមួយ Saiyok និងបានសរសេរខ្លឹមសារខ្លីថា ៖«វាដល់ពេលសម្រាប់ខ្ញុំដើម្បីសងសឹកហើយ បន្ទាប់ពីរយៈពេលជាង១០ឆ្នាំមុន»។

ការលើកឡើងរបស់ Thiago បានធ្វើឡើងនៅព្រឹកថ្ងៃទី៦ ខែកុម្ភៈ ឆ្នាំ២០២៤ បន្ទាប់ពី Saiyok បានមកប្រកួតជាមួយកីឡាករកម្ពុជា ធន់ រិទ្ធី កាលពីយប់ថ្ងៃអាទិត្យ ទី៤ ខែកុម្ភៈ ដែលបញ្ចប់ទៅដោយលទ្ធផលស្មើគ្នាធ្វើឲ្យអ្នកគាំទ្រមួយចំនួនមិនពេញចិត្ត។

កីឡាករ សែន ច័ន្ទរិទ្ធីគុណ បានប្រកួតជាមួយកីឡាករថៃ Saiyok កាលពីថ្ងៃទី២៣ ខែកុម្ភៈ ឆ្នាំ២០១៣ នៅសង្វៀន Thai Fight ក្នុងប្រទេសថៃ។ បន្ទាប់ពីតស៊ូគ្នា៣ទឹក កីឡាករប្រេស៊ីល-កម្ពុជាបានចាញ់ដោយពិន្ទុ។

គិតរហូតមកដល់ពេលនេះមានរយៈពេលជាង១០ឆ្នាំហើយដែលអ្នកទាំងពីរបានជួបគ្នា ខណៈអាយុក៏កាន់តែច្រើនដូចគ្នា។ ទោះបីជាយ៉ាងណា Saiyok នៅតែសកម្មនៅលើសង្វៀន ហើយសមត្ថភាពនៅតែល្អ ខណៈ Thiago មិនបានប្រកួតច្រើនខែហើយ៕

អត្ថបទ៖ វីរបុត្រ

The post Thiago ថា ដល់ពេលត្រូវជម្រះបញ្ជី Saiyok កាលពីជាង១០ឆ្នាំមុន appeared first on Kampuchea Thmey Daily.

Thiago ថា ព្រំ សំណាង មិនក្លាយជាស្តេចប្រដាល់គុនខ្មែរទេ បើមិនឆ្លងកាត់គាត់ ទោះឈ្នះ Leduc

chean virakbot — Tue, 15 Aug 2023 10:31:19 +0000

កីឡាករប្រដាល់ប្រេស៊ីលសញ្ជាតិខ្មែរ Thiago Teixeira បានសរសេរថា កីឡាករ ព្រំ សំណាង នឹងមិនអាចក្លាយជាស្តេចប្រដាល់គុនខ្មែរបានទេ ទោះជាឈ្នះកីឡាករប្រដាល់មីយ៉ាន់ម៉ា Dave Leduc ក៏ដោយ ប្រសិនបើមិនទាន់ឆ្លងកាត់រូបគេ។

Thiago បានសរសេរឆ្លើយតបទៅនឹងផេកមួយដែលបានសរសេរថា ព្រំ សំណាង នឹងក្លាយជាស្តេចប្រដាល់គុនខ្មែរ ប្រសិនបើឈ្នះកីឡាករប្រដាល់មីយ៉ាន់ម៉ាដោយបាន Dave Leduc ថា ៖«ខ្ញុំជឿជាក់ គាត់ (Leduc) នឹងមិនឈ្នះ ព្រំ សំណាងទេ ហើយប្រសិនបើគាត់ (សំណាង) ឈ្នះ Leduc ក៏គាត់មិនអាចក្លាយជាស្តេចប្រដាល់គុនខ្មែរបានដែរ ប្រសិនបើមិនទាន់ឆ្លងកាត់ខ្ញុំ»។

តាមការគ្រោងទុក ព្រំ សំណាង នឹងប្រកួតជាមួយកីឡាករមីយ៉ាន់ម៉ា Dave Leduc នៅខែតុលាខាងមុខនេះក្រោមច្បាប់គុនខ្មែរ។ ការប្រកួតនេះនឹងក្លាយជាការប្រកួតចុងក្រោយរបស់កីឡាករមីយ៉ាន់ម៉ាមុនពេលចូលនិវត្តន៍។ ចំណែក អ្នកលេងគុនខ្មែរ ព្រំ សំណាង ប្រមាណ៣០ប្រកួតចុងក្រោយមិនដែលចាញ់សោះ៕

អត្ថបទ៖ វីរបុត្រ

The post Thiago ថា ព្រំ សំណាង មិនក្លាយជាស្តេចប្រដាល់គុនខ្មែរទេ បើមិនឆ្លងកាត់គាត់ ទោះឈ្នះ Leduc appeared first on Kampuchea Thmey Daily.

Thiago Teixeira Archives - Kampuchea Thmey Daily

កីឡាករ Thiago ថា ថៃ​តែង​តែចង់​បាន​ទឹក​ដី​កម្ពុជា រាប់​ទាំង​សិល្បៈក្បាច់​គុន

Thiago ដាក់គោលដៅពាក់ទង់ជាតិកម្ពុជា ប្រកួតនៅ UFC ដោយ​សម្ងំហាត់​នៅ​ប្រេស៊ីល

Thiago ដាក់គោលដៅ​មេដាយមាសពីកីឡាគុនចម្រុះអាស៊ី

ចន្ទរិទ្ធីគុន និង សុធា ឈ្នះខ្សែក្រវាត់គុនខ្មែរ ISKA ខណៈ អាលៀ ចាញ់មិនអស់ចិត្ត

ព្រឹត្តិការណ៍ធំមិន​ធ្លាប់មាន មួយរាត្រី៣ខ្សែក្រវាត់ ISKA គុនខ្មែរពិភពលោក

ក្រោយរង់ចាំ១២ឆ្នាំ ខ្សែក្រវាត់ ISKA ដាក់ឲ្យប្រកួតជាថ្មីលើដីកម្ពុជាចុងសប្តាហ៍នេះ

Thiago ថា ដល់ពេលត្រូវជម្រះបញ្ជី Saiyok កាលពីជាង១០ឆ្នាំមុន

Thiago ថា ព្រំ សំណាង មិនក្លាយជាស្តេចប្រដាល់គុនខ្មែរទេ បើមិនឆ្លងកាត់គាត់ ទោះឈ្នះ Leduc

កីឡាករ Thiago ថា ថៃតែងតែចង់បានទឹកដីកម្ពុជា រាប់ទាំងសិល្បៈក្បាច់គុន

Thiago ដាក់គោលដៅពាក់ទង់ជាតិកម្ពុជា ប្រកួតនៅ UFC ដោយសម្ងំហាត់នៅប្រេស៊ីល

Thiago ដាក់គោលដៅមេដាយមាសពីកីឡាគុនចម្រុះអាស៊ី

ព្រឹត្តិការណ៍ធំមិនធ្លាប់មាន មួយរាត្រី៣ខ្សែក្រវាត់ ISKA គុនខ្មែរពិភពលោក