ក្នុងកិច្ចប្រជុំតាមអនឡាញ ជាមួយក្រុមមន្ត្រីមកពីបណ្តាញសហភាពអាហ្វ្រិក ដែលផ្សាយដោយសារព័ត៌មាន DW កាលពីថ្ងៃអង្គារ ទី២៦ ខែឧសភា ឆ្នាំ២០២៦ អគ្គនាយក WHO លោក Tedros Adhanom Ghebreyesus ថ្លែងថា ការផ្ទុះអេបូឡា នៅកុងហ្គោ និងអ៊ូហ្គង់ដា កំពុង រាលដាលលឿនជាងសមត្ថភាព ដែលក្រុមឆ្លើយតបបន្ទាន់ អាចទប់ស្កាត់បាន ទៅទៀត។

ក្នុងអំឡុងពេលនោះ លោក Ghebreyesus ព្រមានថា ដោយសារតែ ភាពយឺតយ៉ាវ មិនអាចរកឃើញករណីឆ្លងឲ្យបានទាន់ពេល ជាហេតុធ្វើឲ្យអាជ្ញាធរសុខាភិបាល នៅដេញតាមពីក្រោយសភាពការណ៍ដែលវិវឌ្ឍឆ្ពោះទៅរកភាពអាក្រក់ ហើយជំងឺរាតត្បាតនេះ កំពុងស្ថិតនៅលើផ្លូវ ឆ្ពោះទៅរកសភាពកាន់តែអាក្រក់ខ្លាំង ទម្រាំវាធូរស្រាលមកវិញ។

កិច្ចប្រជុំនេះកើតឡើង ស្របពេលករណីមនុស្សសង្ស័យស្លាប់ ដោយសារជំងឺអេបូឡា នៅកុងហ្គោ កើនដល់ ២២០នាក់ និងឆ្លងជាង ៩០០ករណី ខណៈក្នុងចំណោមការឆ្លងភាគច្រើន គឺនៅខេត្ត Ituri។

ជំងឺអេបូឡា ដែលកំពុងផ្ទុះខ្លាំងនៅកុងហ្គោ នាពេលបច្ចុប្បន្ន គឺបង្កឡើងដោយវីរុសប្រភេទកម្រ ឈ្មោះ ​Bundibugyo ដែលគ្មានវ៉ាក់សាំងណាកម្ចាត់បាន និងមានសមត្ថភាព សម្លាប់ ១ភាគ៣ នៃអ្នកដែលឆ្លង។

វាឆ្លងពីសត្វមកមនុស្ស តាមរយៈការប៉ះពាល់ផ្ទាល់ជាមួយឈាម សារធាតុរាវ ឬសរីរាង្គនៃសត្វព្រៃ ដែលផ្ទុកមេរោគ ដូចជា ប្រចៀវ ស្វា ឬសត្វឈ្លូស។ ចំណែក ការឆ្លងពីមនុស្សទៅមនុស្ស គឺឆ្លងតាមរយៈការប៉ះពាល់ផ្ទាល់ជាមួយ ឈាម ឬសារធាតុរាវរាងកាយ ដូចជាទឹកមាត់របស់អ្នកជំងឺ ឬអ្នកដែលស្លាប់ ដោយសារ អេបូឡា។

រោគសញ្ញារបស់វា មានដូចជា គ្រុនក្តៅខ្លាំង អស់កម្លាំងខ្លាំង ឈឺសាច់ដុំ ឈឺក្បាល និងឈឺបំពង់ក។ ដំណាក់កាលធ្ងន់ធ្ងរ វាបណ្តាលឲ្យក្អួត រាករូស មានកន្ទួលលើស្បែក ខូចតម្រងនោម និងថ្លើមចុះខ្សោយ។ ក្នុងករណីខ្លះ មានទាំងហូរឈាម តាមអញ្ចាញធ្មេញ លាមក ឬស្បែកទៀតផង៕

អត្ថបទ៖ សុខ សុវណ្ណ

The post WHO ប្រកាសអាសន្ន ថា ការឆ្លងរាលដាលជំងឺអេបូឡា នៅ កុងហ្គោ គ្រប់គ្រងលែងបានហើយ appeared first on Kampuchea Thmey Daily.

ថ្លែងក្នុងកិច្ចប្រជុំគណៈកម្មាធិការអាសន្ន WHO នៅទីក្រុងហ្សឺណែវ ប្រទេសស្វីស កាលពីថ្ងៃពុធ ទី២០ ខែឧសភា ឆ្នាំ២០២៦ អគ្គនាយក WHO លោក Tedros Adhanom Ghebreyesus ប្រកាសថា ទោះអេបូឡា កំពុងឆ្លងខ្លាំងនៅកុងហ្គោ ហើយត្រូវបានប្រកាសចាត់ជា ភាពអាសន្នផ្នែកសុខាភិបាលអន្តរជាតិក៏ពិតមែន ប៉ុន្តែហានិភ័យ ឆ្លងរាលដាលជាសកល នៅតែមានកម្រិតទាបនៅឡើយ។

ពាក់ព័ន្ធរឿងនេះ អ្នកជំនាញ WHO សន្និដ្ឋានថា ការផ្ទុះអេបូឡា នៅកុងហ្គោ ប្រហែលចាប់ផ្តើមនៅថ្ងៃទី២០ ខែមេសា ហើយនៅពេលមានមនុស្សស្លាប់ដំបូង វាប្រហែលជាឆ្លងរាលដាលខ្លាំង ពេលមនុស្សទៅចូលរួមពិធីបុណ្យសព របស់អ្នកជំងឺ។

សូមជម្រាបជាថ្មី កាលពីសប្តាហ៍មុន WHO បានសម្រេចប្រកាសដាក់ជំងឺអេបូឡា ដែលផ្ទុះឡើងនៅ កុងហ្គោ នេះ គឺជា ភាពអាសន្នផ្នែកសុខាភិបាលសាធារណអន្តរជាតិ ប៉ុន្តែអះអាងថា ស្ថានភាពបច្ចុប្បន្ន មិនទាន់ឈានដល់ការប្រកាសគ្រាអាសន្ន ជំងឺរាតត្បាតជាសកល នៅឡើយទេ។

វាមិនមែនត្រឹមឆ្លងនៅ កុងហ្គោ ទេ, ជំងឺអេបូឡា ក៏រាលដាលដល់ប្រទេសជិតខាង ដូចជា អ៊ូហ្គង់ដា ផងដែរ មានទាំងករណីស្លាប់ ទៀតផង។ 

ជំងឺអេបូឡា ឆ្លងពីសត្វមកមនុស្ស តាមរយៈការប៉ះពាល់ផ្ទាល់ជាមួយឈាម សារធាតុរាវ ឬសរីរាង្គនៃសត្វព្រៃ ដែលផ្ទុកមេរោគ ដូចជា ប្រចៀវ ស្វា ឬសត្វឈ្លូស។ ចំណែក ការឆ្លងពីមនុស្សទៅមនុស្ស គឺឆ្លងតាមរយៈការប៉ះពាល់ផ្ទាល់ជាមួយ ឈាម ឬសារធាតុរាវរាងកាយ ដូចជាទឹកមាត់របស់អ្នកជំងឺ ឬអ្នកដែលស្លាប់ ដោយសារ អេបូឡា។

រោគសញ្ញារបស់វា មានដូចជា គ្រុនក្តៅខ្លាំង អស់កម្លាំងខ្លាំង ឈឺសាច់ដុំ ឈឺក្បាល និងឈឺបំពង់ក។ ដំណាក់កាលធ្ងន់ធ្ងរ វាបណ្តាលឲ្យក្អួត រាករូស មានកន្ទួលលើស្បែក ខូចតម្រងនោម និងថ្លើមចុះខ្សោយ។ ក្នុងករណីខ្លះ មានទាំងហូរឈាម តាមអញ្ចាញធ្មេញ លាមក ឬស្បែកទៀតផង៕

អត្ថបទ៖ សុខ សុវណ្ណ

The post កុងហ្គោ ផ្ទុះជំងឺ អេបូឡា ខ្លាំងទៅៗ មនុស្សស្លាប់ កើនដល់ ១៣៩នាក់ ខណៈករណីសង្ស័យឆ្លង ឈានដល់ ៦០០ករណី  appeared first on Kampuchea Thmey Daily.

យោងតាមសេចក្តីប្រកាសរបស់ WHO ផ្សាយដោយ BBC កាលពីថ្ងៃអាទិត្យ ទី១៧ ខែឧសភា ឆ្នាំ២០២៦ ជំងឺអេបូឡា បានផ្ទុះខ្លាំងនៅខេត្ត Ituri ដោយបង្កការឆ្លង ២៤៦ករណី និងមានមនុស្សស្លាប់ដល់ទៅ ៨០នាក់។

យ៉ាងណាក៏ដោយ WHO អះអាងថា ស្ថានភាពបច្ចុប្បន្ន មិនទាន់ឈានដល់ការប្រកាសគ្រាអាសន្ន ជំងឺរាតត្បាតជាសកល នៅឡើយទេ។

ការផ្ទុះអេបូឡានៅកុងហ្គោ ពិតជាធ្ងន់ធ្ងរ ពោលគឺវា ក៏រាលដាលដល់ប្រទេសជិតខាង ដូចជា អ៊ូហ្គង់ដា ផងដែរ មានទាំងករណីស្លាប់ ទៀតផង។ ដោយសារតែក្តីបារម្ភនេះហើយ ប្រទេសជិតខាងកុងហ្គោ ទាំងឡាយ សុទ្ធតែរឹតដ្បិតច្រកព្រំដែន និងដាក់ចេញនូវវិធានការតឹងរ៉ឹង ដើម្បីបង្ការករណីនាំចូល។

ទន្ទឹមនោះដែរ WHO បានជំរុញឲ្យកុងហ្គោ ​និងអ៊ូហ្គង់ដា ត្រូវអនុវត្តវិធីសាស្រ្តឲ្យបានខ្ជាប់ខ្ជួន តាមការណែនាំរបស់ខ្លួន ដើម្បីទប់ស្កាត់ស្ថានការណ៍អាក្រក់ណាមួយ ដែលអាចកើតឡើង។

សូមជម្រាបថា ជំងឺអេបូឡា ដែលផ្ទុះឡើងពេលនេះ គឺជាវីរុសប្រភេទថ្មី ឈ្មោះ Bundibugyo ពោលគឺ មិនមែនជាប្រភេទ Zaire ដែលធ្លាប់កើតមានពីមុនៗនោះទេ។

វាជាជំងឺឆ្លងធ្ងន់ធ្ងរ និងបង្កគ្រោះថ្នាក់ដល់ជីវិតយ៉ាងលឿន ដែលតែងតែលាក់ខ្លួន នៅក្នុងតំបន់ព្រៃទឹកភ្លៀងដ៏ធំធេងរបស់កុងហ្គោ ហើយវាអាចឆ្លងរាលដាល តាមរយៈការប៉ះពាល់ផ្ទាល់ជាមួយរាងកាយរបស់អ្នកជំងឺ ដូចជា ឈាម ទឹកមាត់ ឬក្អួត សម្ភារៈដែលមានមេរោគ ឬការប៉ះពាល់សាកសពរបស់អ្នក ដែលបានស្លាប់ដោយសារជំងឺនេះ៕

អត្ថបទ៖ សុខ សុវណ្ណ

The post ក្តីបារម្ភថ្មី! WHO ប្រកាសថា ការផ្ទុះជំងឺអេបូឡា នៅ កុងហ្គោ គឺជា ភាពអាសន្នផ្នែកសុខាភិបាល អន្តរជាតិ appeared first on Kampuchea Thmey Daily.

WHO បាននិយាយថា ការផ្ទុះឡើងនៃជំងឺអេបូឡាបច្ចុប្បន្ន មិន​ដល់កម្រិត «ភាពអាសន្ននៃជំងឺរាតត្បាត» នោះទេ ប៉ុន្តែប្រទេសដែលមានព្រំដែនជាប់ DRC អាចមានហានិភ័យខ្ពស់ក្នុងការរីករាលដាលបន្ថែមទៀត។

ទីភ្នាក់ងារសុខភាពរបស់អង្គការសហប្រជាជាតិដដែល បាននិយាយ​ក្នុងសេចក្តីថ្លែងការណ៍​ថា ករណីស្លាប់ ៨០ នាក់ ដែលសង្ស័យថា​មាន​ជំងឺអេបូឡា ​និង​​ករណីសង្ស័យថាឆ្លង​ទៅមនុស្ស ២៤៦ នាក់ ត្រូវបាន​រាយការណ៍នៅខេត្ត Ituri នៃ DRC គិតត្រឹមថ្ងៃសៅរ៍។ ​

វាជាលើកទី ១៧ ហើយ ដែល DRC បាន​កត់ត្រាពីការផ្ទុះបែកនៃជំងឺអេបូឡា រាប់តាំងពីប្រទេសនេះ​បា​នរាយការណ៍ពីជំងឺនេះលើកដំបូងក្នុងឆ្នាំ ១៩៧៦។ ការផ្ទុះបែកបច្ចុប្បន្ន អាចនឹងមាន​ច្រើនជាងករណីដែលបានរាយការណ៍។

WHO បាននិយាយថា ការផ្ទុះជំងឺអេបូឡានៅ DRC និងអ៊ូហ្គង់ដា បង្កហានិភ័យសុខភាពសាធារណៈដល់ប្រទេសដទៃទៀត ដោយ​ការរីករាលដាលអន្តរជាតិត្រូវបានកត់ត្រារួចហើយ។ អង្គការបាន​​ណែនាំប្រទេសនានាឱ្យធ្វើឱ្យយន្តការគ្រប់គ្រងគ្រោះមហន្តរាយ និងគ្រាអាសន្នជាតិរបស់ពួកគេសកម្ម និងអនុវត្តការត្រួតពិនិត្យឆ្លងកាត់ព្រំដែននៅតាមដងផ្លូវក្នុងស្រុកសំខាន់ៗ។

WHO បាននិយាយថា មនុស្ស ២ នាក់នៅទីក្រុងកាំប៉ាឡា នៃប្រទេសអ៊ូហ្គង់ដា ដែលទើបតែធ្វើដំណើរមកពី DRC ត្រូវបានបញ្ជាក់ថាមានជំងឺ​អេបូឡា ហើយម្នាក់ក្នុងចំណោមពួកគេបានស្លាប់។

ករណីដែលបានបញ្ជាក់មួយទៀត​ ត្រូវបានរកឃើញនៅរដ្ឋធានីគីនសាសា របស់ DRC ដោយ​អ្នកជំងឺម្នាក់នោះ បាន​ពាក់ព័ន្ធនឹងមនុស្សម្នាក់ដែលបានវិលត្រឡប់មកពីខេត្ត Ituri៕

​

The post WHO ដាក់ការផ្ទុះបែកជំងឺអេបូឡានៅ​កុងហ្គោ និងអ៊ូហ្គង់ដា ជាអាសន្នគួរឱ្យបារម្ភជាអន្តរជាតិ​ appeared first on Kampuchea Thmey Daily.

តាមរយៈទំព័រហ្វេសប៊ុក នៅព្រឹកថ្ងៃទី៣០ ខែមីនា នេះ នាយកដ្ឋាន​ប្រយុទ្ធ​នឹង​ជំងឺឆ្លង បានឱ្យដឹងថា អង្គការ​សុខភាពពិភពលោក​ (WHO) បានជូនដំណឹងស្តី​ពី​ការ​រក​ឃើញ​មេរោគ​កូវីដ​-១៩​ បំប្លែង​ថ្មី​ ប្រភេទ​ BA.3.2 ដែលហៅឈ្មោះថា “Cicada” គឺជាពូជពង្សកូនចៅរបស់ប្រភេទ​ Omicron ដែលធ្លាប់​ឆ្លងកន្លងមក​។

បើតាមនាយកដ្ឋាន​ប្រយុទ្ធ​នឹង​ជំងឺឆ្លង «អង្គការសុខភាពពិភពលោក​ចាត់​ទុក​ វ៉ារ្យ៉ង់​បំប្លែង​ថ្មី​ ស្ថិតនៅក្រោមការតាមដាន​ (Variants of Monitoring)។ មេរោគ​នេះ បានរកឃើញនៅ​សហរដ្ឋអាមេរិក​ ជប៉ុន កេនយ៉ា ហូឡង់ និងចក្រភពអង់គ្លេស​ និង​មិន​ទាន់​រកឃើញឆ្លងមកតំបន់យើងនៅឡើយទេ»​។

ផ្អែកលើទិន្នន័យសកលបច្ចុប្បន្ន មិនមានភស្តុតាងថាមានការរីករាលដាល​ និងភាពធ្ងន់ធ្ងរកើនឡើងទេ​។ នាយកដ្ឋាន​ប្រយុទ្ធ​នឹង​ជំងឺឆ្លង ​កំពុងតាមដានយ៉ាងសកម្ម​ និងមិនទាន់មានការរកឃើញនៅក្នុង​ប្រទេស​កម្ពុជា​នៅឡើយទេ​៕

The post WHO រក​ឃើញ​មេរោគ​កូវីដ​-១៩​ បំប្លែង​ថ្មី​ ប្រភេទ​ BA.3.2 ខណៈកម្ពុជាមិនទាន់រកឃើញនៅឡើយទេ appeared first on Kampuchea Thmey Daily.

យោងតាម iol.co.za អគ្គនាយកអង្គការសុខភាពពិភពលោក ​លោក Tedros Adhanom Ghebreyesus បាន​សរសេរ​លើបណ្ដាញសង្គម X ថា «សុខភាពគួរតែត្រូវបានការពារគ្រប់ការចំណាយ ហើយមិនត្រូវស្ថិតនៅក្រោមការអាណិតអាសូរនៃភូមិសាស្ត្រនយោបាយ ការបិទខ្ទប់ថាមពល និងការដាច់ចរន្តអគ្គិសនីឡើយ»។

ស្ថានភាពនៅគុយបាគឺគួរឲ្យព្រួយបារម្ភយ៉ាងខ្លាំង ខណៈដែលប្រទេសនេះកំពុងតស៊ូដើម្បីរក្សាការផ្តល់សេវាសុខភាពនៅពេលដែលមានភាពចលាចលយ៉ាងខ្លាំង ដែលនាំឲ្យមានកង្វះខាតថាមពលដែលបានប៉ះពាល់ដល់សុខភាព។ ជាពិសេស ប្រព័ន្ធផលិតអគ្គិសនីចាស់ៗក្នុងប្រទេស កំពុងស្ថិតក្នុងស្ថានភាព​មិនរៀបរយ​ ដោយការដាច់ចរន្តអគ្គិសនីប្រចាំថ្ងៃ រហូតដល់២០ម៉ោងជាបទដ្ឋាននៅក្នុងតំបន់មួយចំនួននៃកោះ ដែលខ្វះប្រេងឥន្ធនៈដែលត្រូវការដើម្បីបង្កើតថាមពល។

ចាប់តាំងពីអាមេរិកបណ្តេញសម្ព័ន្ធមិត្តកំពូលរបស់គុយបា គឺប្រធានាធិបតី Nicolas Maduro នៃប្រទេសវ៉េណេស៊ុយអេឡា សេដ្ឋកិច្ចរបស់កោះនេះត្រូវបានវាយប្រហារបន្ថែមទៀត ខណៈដែលលោកត្រាំ រក្សាការបិទខ្ទប់​ការនាំចូល​ប្រេង។ ជាក់ស្តែងគ្មានប្រេងណាមួយត្រូវបាននាំចូលមកកាន់កោះនេះទេ ដែលប៉ះពាល់ដល់វិស័យថាមពល ខណៈពេលដែលក៏បង្ខំឲ្យក្រុមហ៊ុនអាកាសចរណ៍កាត់បន្ថយជើងហោះហើរទៅកាន់កោះ ដែលជាការវាយប្រហារមួយចំពោះវិស័យទេសចរណ៍ដ៏សំខាន់បំផុត។

លោក Tedros បានមានប្រសាសន៍ថា ការវះកាត់រាប់ពាន់ត្រូវបានពន្យារពេលក្នុងអំឡុងខែចុងក្រោយនេះ ហើយមនុស្សដែលត្រូវការការថែទាំ ចាប់ពីអ្នកជំងឺមហារីករហូតដល់ស្ត្រីមានផ្ទៃពោះដែលត្រៀមសម្រាលកូន ត្រូវបានប្រឈមនឹងហានិភ័យដោយសារតែខ្វះថាមពលដើម្បីដំណើរការឧបករណ៍វេជ្ជសាស្ត្រ និងការផ្ទុកខ្សែសង្វាក់ត្រជាក់សម្រាប់វ៉ាក់សាំង។ មន្ទីរពេទ្យ គ្លីនិក និងរថយន្តសង្គ្រោះបន្ទាន់នៅគុយបាឥឡូវនេះ ត្រូវការច្រើនជាងពេលណាៗទាំងអស់ ហើយត្រូវតែទទួលបានការគាំទ្រដើម្បីអនុវត្តការងារជួយសង្គ្រោះជីវិតរបស់ពួកគេ។

បន្ថែមពីលើការដាច់ចរន្តអគ្គិសនីប្រចាំថ្ងៃ តម្លៃប្រេងឥន្ធនៈបានកើនឡើងខ្ពស់ ការដឹកជញ្ជូនសាធារណៈបានក្លាយជាកម្រ ហើយសំរាមកំពុងកកកុញ ខណៈដែលរថយន្តដឹកសំរាមលែងដំណើរការទៀតហើយ៕

អត្ថបទ៖ សាង ស្រីល័ក្ខ

The post WHO ព្រមានវិបត្តិសុខភាព​ធ្ងន់ធ្ងរ​នៅគុយបា ចំពេលអាមេរិកបិទខ្ទប់ប្រេងឥន្ធនៈ appeared first on Kampuchea Thmey Daily.

ពិធីប្រគល់សម្ភារៈនេះ បានប្រារព្ធឡើងក្រោមអធិបតីភាព លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និង លោកស្រីវេជ្ជបណ្ឌិត Marianna Trias តំណាងអង្គការ សុខភាពពិភពលោកប្រចាំកម្ពុជា។ សម្ភារៈជំនួយដែលបានផ្តល់រួមមាន ឧបករណ៍សង្គ្រោះបន្ទាន់ និងវះកាត់ (TESK) កញ្ចប់សង្គ្រោះបន្ទាន់ (IEHK) ព្រមទាំងឱសថ និងសម្ភារៈ វេជ្ជសាស្ត្រចាំបាច់ផ្សេងៗ ដើម្បីគាំទ្រមន្ទីរពេទ្យ និងមណ្ឌលសុខភាពក្នុងការផ្តល់សេវា ព្យាបាល និងរក្សាបន្តសេវាសុខាភិបាលចាំបាច់សម្រាប់ប្រជាពលរដ្ឋដែលរងផលប៉ះពាល់។

ក្នុងឱកាសនោះ រដ្ឋមន្ត្រីសុខាភិបាល បានថ្លែងអំណរគុណ ចំពោះអង្គការសុខភាពពិភពលោក សម្រាប់ការគាំទ្រ ទាន់ពេលវេលា និងកិច្ចសហប្រតិបត្តិការយ៉ាងជិតស្និទ្ធជាមួយក្រសួងសុខាភិបាល ក្នុងការពង្រឹងប្រព័ន្ធសុខាភិបាល និងការឆ្លើយតបចំពោះគ្រោះអាសន្នសុខភាពនានា។ លោករដ្ឋមន្ត្រី បានបញ្ជាក់ថា សម្ភារៈទទួលបាននាពេលកន្លងមក និងនៅពេលនេះ នឹងត្រូវបានចែកចាយទៅកាន់បណ្តាខេត្តដែលរងផលប៉ះពាល់រួចហើយ ខណៈសម្ភារៈដែលនៅសេសសល់នឹងត្រូវចែកចាយទៅកាន់មន្ទីរពេទ្យ និងមណ្ឌលសុខភាពនៅតំបន់រងផលប៉ះពាល់ក្នុងពេលឆាប់ៗនេះ ហើយផ្នែកមួយនឹងត្រូវរក្សាទុកសម្រាប់ពង្រឹងការត្រៀមខ្លួនឆ្លើយតប ចំពោះវិបត្តិសុខភាពនាពេលអនាគត។

ក្នុងនាមក្រសួងសុខាភិបាល លោកសាស្រ្តាចារ្យ បានវាយតម្លៃខ្ពស់ ចំពោះការគាំទ្របន្តរបស់អង្គការសុខភាពពិភពលោក WHO ក្នុងការពង្រឹងការតាមដានជំងឺ កម្មវិធីចាក់ថ្នាំបង្ការ ការបង្ការនិងគ្រប់គ្រងការឆ្លងរោគ ការផ្សព្វផ្សាយ សារអប់រំសុខភាព និងការគាំទ្រផ្នែកសុខភាពផ្លូវចិត្ត និងសេវាជំនួយផ្លូវចិត្តសង្គម សម្រាប់ប្រជាពលរដ្ឋដែលរងផលប៉ះពាល់៕

The post WHO ផ្តល់សម្ភារៈ បរិក្ខារវេជ្ជសាស្រ្ត ដល់ក្រសួងសុខាភិបាល ដើម្បីឆ្លើយតបសហគមន៍រងផលប៉ះពាល់ នៅតំបន់ព្រំដែនកម្ពុជា-ថៃ appeared first on Kampuchea Thmey Daily.

លោក Tedros Adhanom Ghebreyesus បាន​និយាយ​​ក្នុង​សេចក្តី​​ថ្លែង​​ការណ៍​​មួយ​​កាល​ពីថ្ងៃចន្ទថា៖ «ការ​ខូចខាត​ដល់​រោងចក្រប្រេងឥន្ធនៈ​របស់​​អ៊ីរ៉ង់ ​មាន​​ហានិភ័យ​នៃការបំពុលអាហារ ទឹក និងខ្យល់»។

លោក Tedros បង្ហោះ​នៅ​លើបណ្តាញ​ X ថា៖ « គ្រោះថ្នាក់ទាំងនោះអាច​មាន​ផលប៉ះពាល់ធ្ងន់ធ្ងរដល់​សុខភាព ជាពិសេសលើកុមារ មនុស្ស​ចាស់ និងមនុស្សដែលមានបញ្ហាសុខភាពពីមុន។ ភ្លៀង​ដែល​ពោរពេញ​ដោយប្រេង​ត្រូវបានរាយការណ៍ថា​បានធ្លាក់នៅតំបន់ខ្លះនៃប្រទេស»។

អាជ្ញាធរ​អ៊ីរ៉ង់​លើក​ឡើង​ថារោង​ចក្រ​ប្រេង​នៅក្នុងរដ្ឋធានី​តេហេរ៉ង់ និង​ខេត្ត Alborz ក្បែរនោះ​ត្រូវ​បានកំណត់គោលដៅ​ នៅថ្ងៃសៅរ៍​ក្នុង​សង្គ្រាម​រវាង​សហរដ្ឋអាមេរិក-អ៊ីស្រាអែល​ប្រឆាំង​នឹងប្រទេសអ៊ីរ៉ង់​។

សារព័ត៌មាន Al Jazeera រាយការណ៍ថា ដំណក់ទឹកភ្លៀងខ្មៅបានធ្លាក់នៅព្រឹកព្រលឹមថ្ងៃអាទិត្យ បន្ទាប់​ពី​ការ​វាយប្រហារទាំង​នោះ​បាន​បញ្ជូន​អណ្តាត​ភ្លើង​ដ៏ធំ និង​ពពក​ផ្សែង​ខ្មៅ​ក្រាស់ៗ​ឡើង​លើ​មេឃ​ពី​លើទីក្រុងតេហេរ៉ង់​។

ចំណែក​ក្រុម​សិទ្ធិមនុស្សបានថ្កោលទោស​ទាំងអ៊ីរ៉ង់ សហរដ្ឋអាមេរិក និងអ៊ីស្រាអែល ចំពោះ​ការកំណត់គោលដៅ​លើហេដ្ឋារចនាសម្ព័ន្ធ​ស៊ីវិល។

លោកស្រី Agnes Callamard ប្រធានអង្គការលើក​លែង​ទោសអន្តរជាតិនិយាយ​កាលពីថ្ងៃចន្ទ​ថា៖ « អ៊ីស្រាអែល​គួរតែចាត់វិធាន​ការ​បង្ការ​ទាំង​អស់​តាម​ដែល​អាចធ្វើទៅបាន ដើម្បី​ជៀសវាង ឬ​កាត់​បន្ថយ​ហានិភ័យ​ដល់ជនស៊ីវិល នៅ​ពេលកំណត់គោលដៅរោងចក្រចម្រាញ់ប្រេងនៅ​ក្នុង​ប្រទេសអ៊ីរ៉ង់»។

លោកស្រីសរសេរលើបណ្តាញ​សង្គម​ X ថា៖ « គ្រោះថ្នាក់​ដោយ​ចៃ​ដន្យ​ចំពោះ​ជនស៊ីវិល រួមទាំង​ការបញ្ចេញសារធាតុពុល ហាក់ដូចជាបង្ហាញ​ថាមាន​ការ​ប្រុងប្រយ័ត្នតិចតួចណាស់​ វា​មិនសមាមាត្រគ្នា​សោះ​»។

លោក​ស្រី​បន្ត​ថា​៖ «ឈុតឆាក​នៃគ្រោះមហន្តរាយដែល​ពិពណ៌នា​ដោយ​ជនជាតិអ៊ីរ៉ង់ បន្ទាប់​ពីឃ្លាំងប្រេងរបស់ទីក្រុងតេហេរ៉ង់​ត្រូវ​បាន​ទម្លាក់​គ្រាប់​បែក គឺជាការបង្ហាញមួយផ្សេងទៀតថា​ពួក​គេ​ពិត​ជា​រង​គ្រោះ​។ [….] ការវាយប្រហារ​របស់សហរដ្ឋអាមេរិក និងអ៊ីស្រាអែល​លើអ៊ីរ៉ង់ ​កំពុង​បង្កគ្រោះថ្នាក់ដល់ជនស៊ីវិលជា​ចម្បង រួមទាំងកុមារផងដែរ»៕

ប្រែ​សម្រួល៖ ណឺ មិនា

The post WHO៖ ការ​វាយ​ប្រហារ​​​លើ​រោង​ចក្រ​ប្រេង​​នៅ​អ៊ីរ៉ង់​​នឹង​ប៉ះ​ពាល់​ដល់​សុខភាព​សាធារណៈខ្លាំង​ appeared first on Kampuchea Thmey Daily.