WHO ដាក់ការផ្ទុះបែកជំងឺអេបូឡានៅ​កុងហ្គោ និងអ៊ូហ្គង់ដា ជាអាសន្នគួរឱ្យបារម្ភជាអន្តរជាតិ​

អង្គការសុខភាពពិភពលោក (WHO) នៅថ្ងៃអាទិត្យនេះ បានប្រកាសដាក់ការផ្ទុះបែកជាថ្មីនៃជំងឺអេបូឡា​នៅ​សាធារណរដ្ឋប្រជាធិបតេយ្យកុងហ្គោ (DRC) និងអ៊ូហ្គង់ដា ថាជា «ភាពអាសន្នសុខភាពសាធារណៈដែល​គួរឱ្យបារម្ភជា​អន្តរជាតិ​» ​ដោយវាអាចបង្កហានិភ័យដល់ប្រទេសជិតខាង។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

WHO បាននិយាយថា ការផ្ទុះឡើងនៃជំងឺអេបូឡាបច្ចុប្បន្ន មិន​ដល់កម្រិត «ភាពអាសន្ននៃជំងឺរាតត្បាត» នោះទេ ប៉ុន្តែប្រទេសដែលមានព្រំដែនជាប់ DRC អាចមានហានិភ័យខ្ពស់ក្នុងការរីករាលដាលបន្ថែមទៀត។

ទីភ្នាក់ងារសុខភាពរបស់អង្គការសហប្រជាជាតិដដែល បាននិយាយ​ក្នុងសេចក្តីថ្លែងការណ៍​ថា ករណីស្លាប់ ៨០ នាក់ ដែលសង្ស័យថា​មាន​ជំងឺអេបូឡា ​និង​​ករណីសង្ស័យថាឆ្លង​ទៅមនុស្ស ២៤៦ នាក់ ត្រូវបាន​រាយការណ៍នៅខេត្ត Ituri នៃ DRC គិតត្រឹមថ្ងៃសៅរ៍។ ​

វាជាលើកទី ១៧ ហើយ ដែល DRC បាន​កត់ត្រាពីការផ្ទុះបែកនៃជំងឺអេបូឡា រាប់តាំងពីប្រទេសនេះ​បា​នរាយការណ៍ពីជំងឺនេះលើកដំបូងក្នុងឆ្នាំ ១៩៧៦។ ការផ្ទុះបែកបច្ចុប្បន្ន អាចនឹងមាន​ច្រើនជាងករណីដែលបានរាយការណ៍។

WHO បាននិយាយថា ការផ្ទុះជំងឺអេបូឡានៅ DRC និងអ៊ូហ្គង់ដា បង្កហានិភ័យសុខភាពសាធារណៈដល់ប្រទេសដទៃទៀត ដោយ​ការរីករាលដាលអន្តរជាតិត្រូវបានកត់ត្រារួចហើយ។ អង្គការបាន​​ណែនាំប្រទេសនានាឱ្យធ្វើឱ្យយន្តការគ្រប់គ្រងគ្រោះមហន្តរាយ និងគ្រាអាសន្នជាតិរបស់ពួកគេសកម្ម និងអនុវត្តការត្រួតពិនិត្យឆ្លងកាត់ព្រំដែននៅតាមដងផ្លូវក្នុងស្រុកសំខាន់ៗ។

WHO បាននិយាយថា មនុស្ស ២ នាក់នៅទីក្រុងកាំប៉ាឡា នៃប្រទេសអ៊ូហ្គង់ដា ដែលទើបតែធ្វើដំណើរមកពី DRC ត្រូវបានបញ្ជាក់ថាមានជំងឺ​អេបូឡា ហើយម្នាក់ក្នុងចំណោមពួកគេបានស្លាប់។

ករណីដែលបានបញ្ជាក់មួយទៀត​ ត្រូវបានរកឃើញនៅរដ្ឋធានីគីនសាសា របស់ DRC ដោយ​អ្នកជំងឺម្នាក់នោះ បាន​ពាក់ព័ន្ធនឹងមនុស្សម្នាក់ដែលបានវិលត្រឡប់មកពីខេត្ត Ituri៕

​