ព័ត៌មានអន្ដរជាតិ

WHO៖ ការវាយប្រហារលើរោងចក្រប្រេងនៅអ៊ីរ៉ង់នឹងប៉ះពាល់ដល់សុខភាពសាធារណៈខ្លាំង

បានផុស

៤ ខែ មុន

នៅ

ថ្ងៃអង្គារ ១០ មីនា ២០២៦

ដោយ

ប្រធានអង្គការសុខភាពពិភពលោក (WHO) បានព្រមានថា ការវាយប្រហាររបស់អ៊ីស្រាអែលថ្មីៗនេះទៅលើរោងចក្រប្រេងក្នុងប្រទេសអ៊ីរ៉ង់ អាចមានផលប៉ះពាល់អវិជ្ជមានដល់សុខភាពសាធារណៈ ដោយកុមារនិងមនុស្សចាស់អ៊ីរ៉ង់ស្ថិតក្នុងចំណោមអ្នកដែលងាយរងគ្រោះបំផុត។ នេះបើយោងតាម Al Jazeera ផ្សាយថ្ងៃទី៩ ខែមីនា ឆ្នាំ២០២៦ ។

លោក Tedros Adhanom Ghebreyesus បាននិយាយក្នុងសេចក្តីថ្លែងការណ៍មួយកាលពីថ្ងៃចន្ទថា៖ «ការខូចខាតដល់រោងចក្រប្រេងឥន្ធនៈរបស់អ៊ីរ៉ង់ មានហានិភ័យនៃការបំពុលអាហារ ទឹក និងខ្យល់»។

លោក Tedros Adhanom Ghebreyesus ប្រធានអង្គការសុខភាពពិភពលោក។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Tedros បង្ហោះនៅលើបណ្តាញ X ថា៖ « គ្រោះថ្នាក់ទាំងនោះអាចមានផលប៉ះពាល់ធ្ងន់ធ្ងរដល់សុខភាព ជាពិសេសលើកុមារ មនុស្សចាស់ និងមនុស្សដែលមានបញ្ហាសុខភាពពីមុន។ ភ្លៀងដែលពោរពេញដោយប្រេងត្រូវបានរាយការណ៍ថាបានធ្លាក់នៅតំបន់ខ្លះនៃប្រទេស»។

អាជ្ញាធរអ៊ីរ៉ង់លើកឡើងថារោងចក្រប្រេងនៅក្នុងរដ្ឋធានីតេហេរ៉ង់ និងខេត្ត Alborz ក្បែរនោះត្រូវបានកំណត់គោលដៅ នៅថ្ងៃសៅរ៍ក្នុងសង្គ្រាមរវាងសហរដ្ឋអាមេរិក-អ៊ីស្រាអែលប្រឆាំងនឹងប្រទេសអ៊ីរ៉ង់។

សារព័ត៌មាន Al Jazeera រាយការណ៍ថា ដំណក់ទឹកភ្លៀងខ្មៅបានធ្លាក់នៅព្រឹកព្រលឹមថ្ងៃអាទិត្យ បន្ទាប់ពីការវាយប្រហារទាំងនោះបានបញ្ជូនអណ្តាតភ្លើងដ៏ធំ និងពពកផ្សែងខ្មៅក្រាស់ៗឡើងលើមេឃពីលើទីក្រុងតេហេរ៉ង់។

ចំណែកក្រុមសិទ្ធិមនុស្សបានថ្កោលទោសទាំងអ៊ីរ៉ង់ សហរដ្ឋអាមេរិក និងអ៊ីស្រាអែល ចំពោះការកំណត់គោលដៅលើហេដ្ឋារចនាសម្ព័ន្ធស៊ីវិល។

លោកស្រី Agnes Callamard ប្រធានអង្គការលើកលែងទោសអន្តរជាតិនិយាយកាលពីថ្ងៃចន្ទថា៖ « អ៊ីស្រាអែលគួរតែចាត់វិធានការបង្ការទាំងអស់តាមដែលអាចធ្វើទៅបាន ដើម្បីជៀសវាង ឬកាត់បន្ថយហានិភ័យដល់ជនស៊ីវិល នៅពេលកំណត់គោលដៅរោងចក្រចម្រាញ់ប្រេងនៅក្នុងប្រទេសអ៊ីរ៉ង់»។

លោកស្រីសរសេរលើបណ្តាញសង្គម X ថា៖ « គ្រោះថ្នាក់ដោយចៃដន្យចំពោះជនស៊ីវិល រួមទាំងការបញ្ចេញសារធាតុពុល ហាក់ដូចជាបង្ហាញថាមានការប្រុងប្រយ័ត្នតិចតួចណាស់ វាមិនសមាមាត្រគ្នាសោះ»។

លោកស្រីបន្តថា៖ «ឈុតឆាកនៃគ្រោះមហន្តរាយដែលពិពណ៌នាដោយជនជាតិអ៊ីរ៉ង់ បន្ទាប់ពីឃ្លាំងប្រេងរបស់ទីក្រុងតេហេរ៉ង់ត្រូវបានទម្លាក់គ្រាប់បែក គឺជាការបង្ហាញមួយផ្សេងទៀតថាពួកគេពិតជារងគ្រោះ។ [….] ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ កំពុងបង្កគ្រោះថ្នាក់ដល់ជនស៊ីវិលជាចម្បង រួមទាំងកុមារផងដែរ»៕

ប្រែសម្រួល៖ ណឺ មិនា