ក្រុមហ៊ុន Honda និង GM ត្រៀមដំណើរការតាក់ស៊ីគ្មានមនុស្សបើកនៅ​ទីក្រុងតូក្យូ

ក្រុមហ៊ុន Honda Motor របស់ប្រទេសជប៉ុនសហការជាមួយក្រុមហ៊ុនផលិតរថយន្ត General Motors (GM) របស់សហរដ្ឋអាមេរិក ដើម្បីបើកដំណើរការសេវាកម្មតាក់ស៊ីបើកបរដោយខ្លួនឯងនៅទីក្រុងតូក្យូនៅក្នុងឆ្នាំ ២០២៦ ។

ផែនការ​សេវាកម្មតាក់ស៊ីនេះ ​គឺគ្រោងដាក់ឲ្យដំណើរការដំបូងនៅក្នុងទីក្រុងតូក្យូ​​ជាមួយរថយន្តប្រមាណជា ៤០ គ្រឿង​ ហើយនឹងពង្រីកដល់ ៥០០ គ្រឿងទៅកាន់តំបន់ផ្សេងៗទៀត ។

តាមរយៈគម្រោងនេះ ក៏មានការចូលរួមបន្ថែមពីក្រុមហ៊ុនបុត្រសម្ព័ន្ធរបស់ GM គឺក្រុមហ៊ុន Cruise ផងដែរ ខណៈក្រុមហ៊ុនទាំងបីមានគោលបំណងបង្កើតក្រុមហ៊ុនបណ្តាក់ទុនរួមគ្នានៅឆមាសទីមួយនៃឆ្នាំក្រោយ ។​

បើតាមការបញ្ជាក់ពីក្រុមហ៊ុន រថយន្តតាក់ស៊ីនេះ នឹងប្រើប្រាស់បច្ចេកវិទ្យាគ្មានអ្នកបើកបរកម្រិត ៤ ហើយមិនមានកំណត់ផ្លូវបើកបរឡើយ ដោយអាចបើកទៅគ្រប់ទីកន្លែងតាមទិសដៅអតិថិជនចង់ទៅ ។

ស្របពេលជាមួយគ្នានេះ គម្រូរថយន្ត​តាកស៊ី​ ក៏​នឹងត្រូវបាន​ដាក់​តាំងបង្ហាញ​ជា​លើក​ដំបូង​ក្នុង​ប្រទេស​ជប៉ុន​ក្នុង​កម្មវិធី Japan Mobility Show នៅ​ចុង​ខែ​នេះផងដែរ ៕​

ប្រែសម្រួល៖ នាង រតនៈ

ប្រភព៖ NHK