ចរាចរណ៍

រថយន្ត LEXUS RX300 បុករថយន្តសេរីទំនើប LEXUS LX570 KURO ក្រឡាប់ផ្ងាជើង

បានផុស

៤ years មុន

នៅ

ថ្ងៃពុធ ១៦ កុម្ភៈ ២០២២

ដោយ

បុរសម្នាក់បើករថយន្ត LEXUS RX300 បានបុកគ្នាជាមួយរថយន្តសេរីទំនើប LEXUS LX570 KURO នៅត្រង់ផ្លូវបំបែកជាបួន បណ្ដាលឱ្យរថយន្តទំនើប 570 ក្រឡាប់ផ្ងាជើង។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២និង៤៥នាទីរសៀល ថ្ងៃទី១៦ ខែកុម្ភះ ឆ្នាំ២០២២ ក្នុងតំបន់បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញស្ត្រីម្នាក់ បើកបររថយន្តម៉ាក LEXUS LX570 KURO ពណ៌ខ្មៅ ពាក់ស្លាកលេខ ភ្នំពេញ 2BS-9899 បើកបរក្នុងទិសដៅពីលិចទៅកើតបញ្ច្រាសទិសដៅចរាចរណ៍ ក្នុងល្បឿនលឿន ដោយខ្វះការប្រុងប្រយ័ត្ន ខណៈមកដល់ត្រង់ចំណុចផ្លូវបំបែកជាបួនត្រូវបានរថយន្តមួយគ្រឿងទៀតម៉ាក់ LEXUS RX300 ពណ៌ខ្មៅ ពាក់ស្លាលេខ ភ្នំពេញ 2O-4445 បើកបរដោយបុរសម្នាក់ និងមានអ្នករួមដំណើរប្រុសស្រីបីនាក់ទៀតដែលធ្វើដំណើរក្នុងទិសដៅពីជើងទៅត្បូងបុករថយន្តLEXUS LX570 KUROយ៉ាងពេញទំហឹង បណ្ដាលឱ្យក្រឡាប់ផ្ញាជើងច្រងាងតែម្តង ចំនែករថយន្តLEXUS RX300រងការខូចខាត។

ក្រោយកើតហេតុសមត្ថកិច្ចមូលដ្ឋានបានចុះមកដល់ទីតាំងកើតហេតុ រួចបានទាក់ទងទៅសមត្ថកិច្ចជំនាញចរាចរណ៍ក្រុងចុះមកធ្វើការវាស់វែងស្ទួចយករថយន្តទាំង២គ្រឿង យកទៅរក្សារទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយតាមផ្លូវច្បាប់៕