ពូទីន ក៏កំពុងពិចារណា មកចូលរួមកិច្ចប្រជុំអាស៊ាន នៅម៉ាឡេស៊ី ដែរ

តាមសម្តីនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ដែលត្រូវបានចុះផ្សាយដោយសារព័ត៌មាន Bernama នៅថ្ងៃអង្គារទី២១ខែតុលាឆ្នាំ២០២៥, ប្រធានាធិបតីរុស្ស៊ី វ្ល៉ាឌីមៀរ ពូទីន ក៏កំពុងពិចារណា មកចូលរួមកិច្ចប្រជុំកំពូលអាស៊ាន ក្នុងទីក្រុងគូឡាឡាំពួ នៅចុងខែនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់អ្នកកាសែតបន្ទាប់ពីចូលរួមវេទិកាចំណេះដឹង Permodalan Nasional Berhad (PNB),​ លោក អាន់វ៉ា​ លើកឡើងថា ពេលជួបគ្នានៅប៉េកាំង លោកពូទីនបានបង្ហាញចំណាប់អារម្មណ៍មកចូលរួមក្នុងកិច្ចប្រជុំកំពូលអាស៊ានដែរ ប៉ុន្តែមិនទាន់សម្រេចជាផ្លូវការទេ ដោយចាំគិតសិន។

យ៉ាងណា អ្វីដែលប្រាកដនោះគឺថា រុស្ស៊ីដឹងតែបញ្ជូនឧបនាយករដ្ឋមន្ត្រីមកធ្វើជាតំណាង ចូលរួមក្នុងកិច្ចប្រជុំកំពូលនេះហើយ។ 

សូមជម្រាបថា កិច្ចប្រជុំកំពូលអាស៊ានលើកទី៤៧ នឹងប្រារព្ធឡើងនៅទីក្រុងគូឡាឡាំពួ ចាប់ពីថ្ងៃទី ២៦ ដល់ថ្ងៃទី ២៨ ខែតុលា ដោយមានការចូលរួមពីថ្នាក់ដឹកនាំកំពូលៗមកពីប្រទេសជាសមាជិកអាស៊ានទាំង១០ ក៏ដូចជាដៃគូសន្ទនាសំខាន់ៗ រួមមានសហរដ្ឋអាមេរិក ចិន ជប៉ុន និងឥណ្ឌា។

ក្នុងអំឡុងពេលនោះដែរ បើតាមការបញ្ជាក់យ៉ាងច្បាស់ពីសំណាក់រដ្ឋមន្ត្រីការបរទេសម៉ាឡេស៊ី Mohamad Hasan, លោក ត្រាំ នឹងធ្វើជាអធិបតីដោយផ្ទាល់ ក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ៕

អត្ថបទ៖ សុខ សុវណ្ណ

ចុចអាន៖ ហេតុអ្វីជំនួបកំពូល ត្រាំ-ពូទីន ធ្វើឡើងនៅទីក្រុង ប៊ុយដាប៉ែស ប្រទេសហុងគ្រី?