ហេតុអ្វីជំនួបកំពូល ត្រាំ-ពូទីន ធ្វើឡើងនៅទីក្រុង ប៊ុយដាប៉ែស ប្រទេសហុងគ្រី?

កិច្ចប្រជុំកំពូលលើកទី២រវាងប្រធានាធិបតីរុស្ស៊ី វ្ល៉ាឌីមៀរ ពូទីន និងមេដឹកនាំអាមេរិក ដូណាល់ ត្រាំ នឹងធ្វើឡើងក្នុងទីក្រុង ប៊ុយដាប៉ែស រដ្ឋធានីរបស់ប្រទេសហុងគ្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការគ្រោងទុក ជំនួបទល់មុខនេះនឹងប្រព្រឹត្តទៅក្នុងរយៈពេល២សប្តាហ៍ទៀត ហើយវាត្រូវគេសង្ឃឹមថា នឹងទទួលបានលទ្ធផលផ្លែផ្កា ឈានឆ្ពោះទៅរកការពន្លត់ភ្លើងសង្គ្រាមនៅអ៊ុយក្រែន។

ដូច្នេះ តើហេតុអ្វីបានជាទីក្រុងប៊ុយដាប៉ែស ត្រូវបានជ្រើសរើសជាកន្លែងរៀបចំពិធី?

តាមការផ្សាយរបស់ VN Express នៅថ្ងៃអាទិត្យទី១៩ខែតុលាឆ្នាំ២០២៥ ហេតុផលសំខាន់ៗសម្រាប់ការជ្រើសរើសទីក្រុង ប៊ុយដាប៉ែស រួមមាន៖ ជំហរអព្យាក្រឹតពិសេសរបស់ប្រទេសហុងគ្រីនៅក្នុងជម្លោះរវាងរុស្ស៊ីនិងលោកខាងលិច, ការបដិសេធបញ្ជូនអាវុធទៅឲ្យអ៊ុយក្រែន, ការប្រឆាំងទៅនឹងទណ្ឌកម្មរបស់លោកខាងលិចលើរុស្ស៊ី និងចំណងការទូតរបស់ហុងគ្រីជាមួយមេដឹកនាំទាំងពីរ។

ម្យ៉ាង ក៏ដោយសារប្រទេសហុងគ្រីបាន ដកខ្លួនចេញពីតុលាការឧក្រិដ្ឋកម្មអន្តរជាតិ (ICC) តាមផ្លូវច្បាប់ផងដែរ ខណៈតុលាការនេះបានចេញដីកាចាប់ខ្លួនលោកពូទីន។ ដូច្នេះមានន័យថា ប៊ុយដាប៉ែស គឺជាទីកន្លែងមានសុវត្ថិភាព ដែលលោក ពូទីន នឹងមិនប្រឈមការចាប់ខ្លួននោះទេ។

លើសពីនេះ ហេដ្ឋារចនាសម្ព័ន្ធសន្តិសុខដ៏រឹងមាំរបស់ទីក្រុងប៊ុយដាប៉ែស និងទំនាក់ទំនងជិតស្និទ្ធរបស់លោកនាយករដ្ឋមន្ត្រី Viktor Orbán ជាមួយលោក ត្រាំ បានផ្តល់នូវបរិយាកាសអំណោយផលផ្នែកយុទ្ធសាស្ត្រនិងសុវត្ថិភាពខាងនយោបាយសម្រាប់ជំនួបនេះ។

សូមជម្រាបជាថ្មី ជំនួបនេះគឺជាក្តីសង្ឃឹមដ៏ធំមួយសម្រាប់អ៊ុយក្រែនក៏ដូចជាពិភពលោក ក្នុងការបញ្ចប់សង្គ្រាមដ៏វិនាសកម្មរយៈពេលជាង៣ឆ្នាំ ដែលបានឆក់យកជីវិតមនុស្សរាប់ម៉ឺននាក់៕

អត្ថបទ៖ សុខ សុវណ្ណ

ចុចអាន៖ ហុងគ្រី​សន្យា​ធ្វើ​ជា​ម្ចាស់ផ្ទះ​ទទួល​ពូទីនដោយ​សុវត្ថិភាពក្នុង​ជំនួប​ជាមួយ​ត្រាំ ​មិន​ខ្វល់​ពីដីកា ICC