​រដ្ឋបាល​ខេត្តបន្ទាយមានជ័យ ចែក​អំណោយ​ជូន​ជន​ភៀស​សឹក​៨០​គ្រួសារ, ការ​ផ្ដល់​ជំនួយ​ផ្លូវ​ចិត្ត និង​អាហារូបត្ថម្ភ

បន្ទាយមានជ័យ ៖ នា​ថ្ងៃទី៥ ខែធ្នូ ​ឆ្នាំ២០២៥ត្រូវនឹងថ្ងៃសុក្រ ១៥កើត ខែមិគសិរ ឆ្នាំម្សាញ់ សប្តស័ក ព.ស. ២៥៦៩នេះ លោកស្រី ហេង សុជាតិ អភិបាលរងក្រុង តំណាង​លោក​អភិបាល​ក្រុងបាន​ដឹក​នាំ​មន្ត្រីរាជការថ្នាក់​ក្រុង ចុះ​ចែកអំណោយសប្បុរសធម៌ដ៏ធំមួយ ជូន​ជន​ភៀសសឹក​៨០​គ្រួសារ។

ក្រៅពីការចែកអំណោយ ក៏​បាន​ផ្តោត​លើការ​ផ្សព្វផ្សាយ និង​ណែនាំ ពី​សេវា​សំខាន់ៗ​ដល់​ជន​ភៀសសឹក និងក្រុមគ្រួសារងាយរងគ្រោះ រួមមានជំនួយផ្លូវចិត្ត និងការថែទាំសុខភាព ឱកាស​ស្វែង​រកការងារ និងអាហារូបត្ថម្ភ ការ​លុប​បំបាត់​អំពើ​ហិង្សា និង​បណ្ដាញទូរស័ព្ទជំនួយបន្ទាន់។

ពិធីនេះ​ប្រព្រឹត្ត​ទៅ​ក្រោម​អធិបតីភាព​ដ៏​ខ្ពង់ខ្ពស់​របស់ លោក សុទ្ធ គឹមកុលមុនី អគ្គលេខាធិការរងគណៈកម្មការគ្រោះមន្តរាយ និងលោក កែម គឹមលី តំណាងអង្គការ CARE។

ចំពោះ​សម្ភារៈ​ឧបត្ថម្ភរួមមាន ១. សម្រាប់ស្ត្រីមានផ្ទៃពោះ/មានកូនខ្ចី និងប័ណ្ណសមធម៌ (២០ គ្រួសារ) សម្ភារៈសំខាន់ៗ សម្ភារៈកូនង៉ែត, មុង, អង្គ្រឹង, ខោទឹកនោមកូនក្មេង, បំពង់ទឹកក្តៅ, សារ៉ុង, សំឡីអនាម័យ។ គ្រឿងឧបភោគបរិភោគមាន អង្ករ, ទឹកស៊ីអ៊ីវ, ត្រីងៀន, សាច់ផាត់, ថ្នាំដុសធ្មេញ, ច្រាសដុសធ្មេញ, ប្រេងឆា ថវិកា ទទួលបានទឹកប្រាក់ ៤០០,០០០ រៀល ក្នុងមួយគ្រួសារ។

២. សម្រាប់គ្រួសារងាយរងគ្រោះផ្សេងទៀត (៦០ គ្រួសារ): គ្រឿងឧបភោគបរិភោគ: អង្ករ, ទឹកស៊ីអ៊ីវ, ត្រីងៀន, សាច់ផាត់, ថ្នាំដុសធ្មេញ, ច្រាសដុសធ្មេញ, ប្រេងឆា និងថវិកាទទួលបានទឹកប្រាក់ ៦០,០០០ រៀល ក្នុងមួយគ្រួសារ។

សូមបញ្ជាក់ផងដែរថា សកម្មភាពដ៏មានសារៈសំខាន់នេះ បានបង្ហាញពី ការប្តេជ្ញាចិត្តរបស់ រដ្ឋបាលក្រុងសំរោង ក្នុងការចូលរួមដោះស្រាយបញ្ហាសង្គម និង​ការ​ផ្តល់ការ​គាំពារ​ដល់​ក្រុម​គោលដៅ​ងាយរងគ្រោះនៅក្នុងមូលដ្ឋាន តាមរយៈកិច្ចសហការជាមួយដៃគូអភិវឌ្ឍន៍នានា៕