យន្តហោះកងទ័ពមីយ៉ាន់ម៉ា ទម្លាក់គ្រាប់បែកលើហាងតែ ស្លាប់ជនស៊ីវិល ១៨នាក់

ភ្លើងសង្គ្រាមនៅមីយ៉ាន់ម៉ាកាន់តែឆាបឆេះសន្ធោសន្ធៅៗទៅហើយ ដោយចុងក្រោយបំផុតនេះ យន្តហោះទម្លាក់គ្រាប់បែករបស់រដ្ឋាភិបាល បានទម្លាក់គ្រាប់បែកយ៉ាងសាហាវលើហាងតែមួយកន្លែង ផ្តាច់ជីវិតជនស៊ីវិលចំនួន១៨នាក់។

តាមការផ្សាយរបស់ Straits Times នៅថ្ងៃអាទិត្យទី៧ខែធ្នូឆ្នាំ២០២៥, យន្តហោះទម្លាក់គ្រាប់បែករបស់រដ្ឋាភិបាលមីយ៉ាន់ម៉ា បានទម្លាក់គ្រាប់លើហាងតែក្នុងស្រុក Tabayin នៃតំបន់ Sagaing។

ក្រៅពីមនុស្សស្លាប់ ការទម្លាក់គ្រាប់បែកក៏បណ្តាលឲ្យមនុស្សជាង២០នាក់ទៀតរងរបួសផងដែរ ព្រោះថាការវាយប្រហារកើតឡើងចំពេលក្នុងហាងមានមនុស្សអ៊ូអរ។

អ្នកនៅរស់ពីការវាយប្រហារនោះប្រាប់ថា រូបគេបានក្រាបចុះពេលឃើញយន្តហោះមកដល់។ ស្នូរផ្ទុះលាន់ទ្រហឹង ហើយភ្លើងឆាបឆេះយ៉ាងសន្ធោសន្ធៅ។

យ៉ាងណា របបសឹកមីយ៉ាន់ម៉ា មិនទាន់ឆ្លើយតបចំពោះរឿងនេះឡើយ។

សូមជម្រាបថា ប្រទេសមីយ៉ាន់ម៉ាត្រូវញាំញីដោយ សង្រ្គាមស៊ីវិល ចាប់តាំងពី យោធាដណ្តើមបានអំណាចនៅក្នុងរដ្ឋប្រហារឆ្នាំ២០២១។ 

ការប្រយុទ្ធរវាងយោធានិងក្រុមប្រឆាំងរដ្ឋប្រហារ តែងឈានដល់ការទម្លាក់គ្រាប់បែក ដែលជារឿយៗបណ្តាលឲ្យជនស៊ីលស្លាប់៕

អត្ថបទ៖ សុខ សុវណ្ណ