អាស៊ាន នៅតែស្ទាក់ស្ទើរ មិនទាន់ឯកភាពគ្នា ទទួលស្គាល់ការបោះឆ្នោតនៅមីយ៉ាន់ម៉ា

ថ្លែង​នៅ​មុន​កិច្ចប្រជុំ​អាស៊ាន​លើក​ទី​៤៨​ ក្នុង​ប្រទេសហ្វីលីពីន កាលពីថ្ងៃពុធ ទី​៦ ខែ​ឧសភា លោក Dominic Xavier Imperial អ្នកនាំពាក្យអាស៊ានសម្រាប់ឆ្នាំ២០២៦ បានបញ្ជាក់ប្រាប់អ្នកសារព័ត៌មានថា រហូតមកដល់ពេលនេះ ប្រទេសជា​សមាជិកទាំងអស់ នៅមិនទាន់មានការឯកភាពគ្នាជាឯកច្ឆន្ទ ថាតើគួរទទួលស្គាល់លទ្ធផលបោះឆ្នោតនៅមីយ៉ាន់ម៉ា ឬយ៉ាងណានោះឡើយ។ នេះ​បើ​យោង​តាម​ការ​ចុះផ្សាយ​របស់​សារព័ត៌មានហ្វីលីពីន PNA។

ការបោះឆ្នោតនៅ​មីយ៉ាន់ម៉ា ដែលទើបតែបញ្ចប់ទៅនេះ បានធ្វើឲ្យ​មេដឹកនាំយោធា លោក Min Aung Hlaing ក្លាយជាប្រធានាធិបតីជាផ្លូវការ បន្ទាប់ពីលោកបានក្តោបក្តាប់អំណាចអស់រយៈពេល ៥ឆ្នាំ ចាប់តាំងពីរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីឆ្នាំ២០២១។ មីយ៉ាន់ម៉ា ចង់ឲ្យ​ពិភពលោកទទួលស្គាល់រដ្ឋាភិបាលថ្មីនេះ ប៉ុន្តែ​អាស៊ាននៅតែប្រកាន់ជំហរយ៉ាងរឹងមាំ ដោយយក «គោលការណ៍កុងសង់ស៊ីស ៥ ចំណុច» ជាគោលការណ៍គ្រឹះដដែល ដែល​តម្រូវ​ឲ្យ​មានការបញ្ឈប់ហិង្សាជាបន្ទាន់ ការជជែកគ្នាដោយសន្តិវិធីរវាងគ្រប់ភាគីពាក់ព័ន្ធ និងការផ្តល់ជំនួយមនុស្សធម៌ដល់ប្រជាជន ដែលកំពុងរងគ្រោះ ជា​ដើម។

សម្រាប់កិច្ចប្រជុំកំពូលអាស៊ាន ដែល​មាន​ហ្វីលីពីនធ្វើជាម្ចាស់ផ្ទះលើក​នេះ ថ្នាក់ដឹកនាំមកពីគ្រប់ប្រទេសសមាជិក នឹងទៅ​ចូលរួមយ៉ាងកុះករ លើកលែងតែប្រទេសមីយ៉ាន់ម៉ាមួយប៉ុណ្ណោះ ដែលនឹងត្រូវតំណាងដោយមន្ត្រីជាន់ខ្ពស់ថ្នាក់លេខាធិការអចិន្ត្រៃយ៍ជំនួសវិញ។ រដ្ឋាភិបាលហ្វីលីពីន ក្រោមការដឹកនាំរបស់ប្រធានាធិបតី Ferdinand R. Marcos Jr. បានបង្ហាញការប្តេជ្ញាចិត្តយ៉ាងខ្លាំង ក្នុងការដោះស្រាយវិបត្តិនេះ ដោយបានចាត់តាំងរដ្ឋមន្ត្រីការបរទេសហ្វីលីពីន ឲ្យបន្តធ្វើការយ៉ាងជិតស្និទ្ធ ក្នុងនាមជាបេសកជនពិសេសរបស់ប្រធានអាស៊ាន ដើម្បីស្វែងរកច្រកចេញ សម្រាប់មីយ៉ាន់ម៉ា៕

ប្រែសម្រួល៖ ឈាង