ព័ត៌មានជាតិ

ជាការរួមចំណែកជួយដល់កងទ័ព ជនភៀសសឹក ក្លឹបបាល់ទាត់ Angkor Tiger ចូលរួមឧបត្ថម្ភ ១,000ដុល្លារ

បានផុស

៦ ខែ មុន

នៅ

ថ្ងៃព្រហស្បតិ៍ ១១ ធ្នូ ២០២៥

ដោយ

ដោយមើលឃើញពីស្ថានភាពតានតឹងផ្នែកព្រំដែន និងផលលំបាករបស់ជនភៀសសឹកអំឡុងការឈ្លានពានរបស់សៀមមកលើកម្ពុជានៅពេលនេះក្លឹបបាល់ទាត់អាជីពនៅលីគកំពូលកម្ពុជាគឺ Angkor Tiger បានចូលរួមឧបត្ថម្ភជាថវិកា ១,000ដុល្លារជួយជម្រួលដល់ការលំបាកផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់ Angkor Tiger

បើតាមសេចក្ដីប្រកាសលើហ្វេសបុកផេករបស់ក្លឹបបាល់ទាត់ Angkor Tiger កាលពីម្សិលមិញនេះបានបញ្ជាក់ថា «ក្លិបបាល់ទាត់អង្គរថាយហ្គឺរបានចូលរួមឧបត្ថម្ភគាំទ្រថវិកាជូនទៅកាន់គ្រួសារទ័ពនិងប្រជាជនភៀសសឹកតាមរយៈរដ្ឋបាលខេត្តសៀមរាប។ យើងសូមអំពាវនាវដល់សប្បុរសជន អ្នកគាំទ្រ និងអ្នកស្រលាញ់បាល់ទាត់ទាំងអស់ជួយចូលរួមឧបត្ថម្ភគាំទ្រថវិកា និង គ្រឿងឧបភោគតាមរយៈរដ្ឋបាលខេត្តសៀមរាប។»

ក្លឹបបាល់ទាត់ដែលមានម្ចាស់ជាជនជាតិជប៉ុនខាងលើនេះ មិនត្រឹមតែឧបត្ថម្ភថវិកាខ្លួនឯងហើយ និងបានអំពាវនាវដល់ដល់សប្បុរសជន និងអ្នកគាំទ្របាល់ទាត់ទៀតផងឲ្យជួយឧបត្ថម្ភជាថវិកា ឬគ្រឿងឧបភោគបរិភោគផ្សេងតាមដែលអាចធ្វើទៅបាន។

លោក Akihiro Kato ដែលជាម្ចាស់ក្លឹបបាល់ទាត់ខាងលើនេះត្រូវបានគេដឹងថា ជាអ្នកចូលរួមចំណែកអភិវឌ្ឍន៍វិស័យបាល់ទាត់នៅកម្ពុជាឲ្យមានភាពរីកចម្រើន និងប្រកបដោយការប្រកួតប្រជែង។ បន្ថែមពីនេះលោកក៏ជាអ្នកដែលមានទឹកចិត្តស្រឡាញ់ប្រទេសកម្ពុជា ប្រជាជនខ្មែរ និងតែងតែជួយលើកិច្ចការងារមនុស្សធម៌ជាបន្តបន្ទាប់រហូតមកពិសេសដូចជាការចំណាយថវិកាលើការជួយដល់ក្រុមគ្រួសារកងទ័ពនៅពេលនេះជាដើម។

លោក Akihiro Kato

បញ្ជាក់ដែរថា ថវិការដែលក្លឹបបាល់ទាត់ Angkor Tiger បានឧបត្ថម្ភនេះគឺបានផ្ទេរទៅតាមរដ្ឋបាលខេត្តសៀមរាបដែលកំពុងតែអំពាវនាវដល់សប្បុរសជនជិតឆ្ងាយឲ្យជួយក្នុងគ្រាលំបាកនេះ។ នៅពេលនេះជម្លោះឈ្លានរបស់ប្រទេសសៀមមកលើកម្ពុជាមិនទាន់បានថមថយ ឬបញ្ឈប់នៅឡើយទេបន្ទាប់ពីប្រទេសនេះបើកការវាយប្រហារមកលើកម្ពុជាតាំងពីថ្ងៃទី៨ ខែធ្នូ ឆ្នាំ២០២៥ មកម្ល៉េះ។ គិតមកដល់ពេលនេះមានគ្រួសារកងទ័ព និងប្រជាពលរដ្ឋខ្មែររាប់ម៉ឺននាក់ដែលរស់នៅតាមបណ្ដោយព្រំដែនធ្វើការភៀសខ្លួនរកទីកន្លែងមានសុខសុវត្ថិភាព៕