​ហាងឆេង​មាស​ដាំ​ក្បាល​ចុះ​ជាង ២០០ ​ដុល្លារ ​បន្ទាប់ពីលទ្ធផល​កិច្ចប្រជុំ ត្រាំ-ហ្សេឡេនស្គី

តម្លៃ​ហាង​ឆេងមាស​បាន​ដាំក្បាលចុះជាង ២០០ ដុល្លារ ដែលស្ថិតក្នុងតម្លៃ ៥២៦០ ដុល្លារ ក្នុងមួយតម្លឹងនៅថ្ងៃអង្គារនេះ បន្ទាប់​ពីមាន​កិច្ចប្រជុំស្ដីពីផែន​ការសន្តិភាព​​រវាង​លោក ដូណាល់ ត្រាំ ​ប្រធានាធិបតីអាមេរិក ​និង​លោក ​ហ្សេឡេនស្គី ប្រធានា​ធិ​បតី​អ៊ុយក្រែន។​

​លោក ឡុង សំណាង ​ប្រធានផ្នែកប្រឹក្សា​យោបល់ហិរញ្ញវត្ថុក្រុមហ៊ុន ​PP Link securities ​បានប្រាប់ឱ្យ​ដឹង​ថា ​កម្រិត​នៃការសម្រេចបានលទ្ធផលកិច្ចប្រជុំប្រមាណ ៦០ ​ទៅ ៧០ ​ភាគរយ​ ក្នុងការបញ្ចប់​សង្គ្រាមរុស្ស៊ី-អ៊ុយក្រែន។​

​លោក ​ហ្សេឡេនស្គី ​មានឆន្ទៈ ​ក្នុងការបញ្ចប់សង្គ្រាមឱ្យបានឆាប់ ​ប៉ុន្តែ​នៅតំបន់ខ្លះ ​លោកចង់ឱ្យ​មានការ​វែកញែក​ច្បាស់លាស់ក្នុងការកាត់ទឹកដីមួយចំនួន ​ឬក៏មិនចង់ឱ្យទៅរុស្ស៊ី។​

​បើតាមលោក ឡុង សំណាង ​លទ្ធផល​នៃកិច្ចប្រជុំនេះ ​ភាគរយ​ច្រើន​ក្នុងការចង់បញ្ចប់ ​ដែលធ្វើ​ឱ្យតម្លៃ​ហាងឆេងមាសមានការធ្លាក់ចុះ ដោយវិនិយោគិនជាច្រើនមើលឃើញថា ប្រសិនបើ​ចប់​សង្គ្រាម​រុស្ស៊ី-អ៊ុយក្រែនមាសនឹងមានការធ្លាក់ចុះ ដោយពួកគាត់សម្រុកលក់ចេញ។

​គិតត្រឹមម៉ោង ៩៖០០ ព្រឹកថ្ងៃទី ៣០ ខែធ្នូ ឆ្នាំ ២០២៥ តម្លៃមាសក្នុងស្រុកលក់ចេញ ៥២៨ ​ដុល្លារ ក្នុង​មួយជី៕

អត្ថបទ៖ ឡេង ដេត