ក្រសួងមហាផ្ទៃច្រានចោលការផ្សាយរបស់កាសែតថៃ ដែលថា យោធាថៃរឹបអូសឃ្លាំងសព្វាវុធកម្ពុជា ក្នុងអគារកាស៊ីណូថ្មដា

ក្រសួងមហាផ្ទៃ តាមរយៈសេចក្ដីប្រកាសរបស់អ្នកនាំពាក្យ នៅថ្ងៃអង្គារនេះ បានចេញមកបដិសេធចំពោះការផ្សាយរបស់កាសែត Khaosod English ដែលថា ទាហានជើងទឹកថៃ រឹបអូសឃ្លាំងសព្វាវុធកម្ពុជាក្នុងអគារកាស៊ីណូថ្មដា ដោយក្រសួងមហាផ្ទៃ អះអាងថា ទីតាំងនោះ គឺជាប៉ុស្តិ៍នគរបាលការពារព្រំដែនរបស់កម្ពុជា មិនមែនជាកាស៊ីណូទេ។

តាមការឱ្យដឹងពីអ្នកនាំពាក្យក្រសួងមហាផ្ទៃ រូបភាព និងទីតាំងដែលបានផ្សាយពីការរឹបអូសឃ្លាំងសព្វាវុធរបស់កម្ពុជា គឺមិនមែនស្ថិតនៅក្នុងបរិវេណអគារកាស៊ីណូថ្មដានោះទេ តែផ្ទុយទៅវិញទីតាំងនោះគឺជាប៉ុស្តិ៍នគរបាលការពារព្រំដែនគោក ច្រកផ្លូវ៥៦ ចំណុះវរសេនាតូចនគរបាលការពារព្រំដែនគោកលេខ៨២៥ នៃស្នងការដ្ឋាននគរបាលខេត្តពោធិ៍សាត់ ដែលស្ថិតក្នុងអធិបតេយ្យភាពរបស់កម្ពុជាទាំងស្រុង។

ការផ្សព្វផ្សាយព័ត៌មានមិនពិតនេះ អ្នកនាំពាក្យក្រសួងមហាផ្ទៃ ថា បានបង្ហាញពីចេតនាទុច្ចរិត និងស្មោកគ្រោក មិនអាចប្រកែកបាន ដែលផ្ទុយពីការព្រមព្រៀងគ្នារវាងកម្ពុជា និងថៃ ក្នុងសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈ កម្មាធិការព្រំដែនទូទៅ (GBC) កាលពីថ្ងៃទី២៧ ខែធ្នូ ឆ្នាំ២០២៥កន្លងទៅ ដែលបានឯកភាពគ្នាថាភាគីទាំងពីរជៀសវាងការចែកចាយព័ត៌មានមិនពិត ឬព័ត៌មានក្លែងក្លាយ ដើម្បីកាត់បន្ថយភាពតានតឹង កាត់បន្ថយសាធារណមតិអវិជ្ជមាន និងលើកកម្ពស់បរិយាកាសអំណោយផលសម្រាប់កិច្ចសន្ទនាដោយសន្តិវិធី។

ចំពោះការរឹបអូសសព្វាវុធនៅក្នុងប៉ុស្តិ៍នគរបាល ដែលស្ថិតក្នុងដែនអធិបតេយ្យភាពរបស់កម្ពុជា គឺជាសកម្មភាពឆក់ប្លន់ដែលបង្ហាញកាន់តែច្បាស់នូវការប្រើច្បាប់ព្រៃរបស់រដ្ឋាភិបាល និងយោធាថែមកឈ្លានពានលើទឹកដីកម្ពុជា។ អ្នកនាំពាក្យក្រសួងមហាផ្ទៃ លើកឡើងដូច្នេះ ដោយទាមទារឱ្យភាគីថៃ ត្រូវតែទទួលខុសត្រូវចំពោះមុខច្បាប់អន្តរជាតិ ដោយមិនអាចគេចវេសយករួចខ្លួនបានឡើយ។

អ្នកនាំពាក្យក្រសួងមហាផ្ទៃ ជំរុញឱ្យភាគីថៃបញ្ឈប់រាល់អរិភាពជាបន្ទាន់ រួមទាំងការបង្កើតព័ត៌មានមិនពិត ហើយងាកមកអនុវត្តតាមខ្លឹមសារនៃសេចក្តីប្រកាសរួមរបស់កិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) រវាង ប្រទេសទាំងពីរ សំដៅស្វែងរកដំណោះស្រាយដោយសន្តិវិធី ឈរលើស្មារតី បង្កើនជំនឿទុកចិត្ត ភាពស្មោះត្រង់ សុទ្ធចិត្ត យុត្តិធម៌ និងគោរពគ្នាទៅវិញទៅមក៕