ថៃ កំណត់អត្តសញ្ញាណ មនុស្សស្លាប់ទាំង៣០នាក់ ក្នុងហេតុការណ៍បាក់ដងស្ទូចលើរថភ្លើង

ថៃបញ្ជាក់ថា អត្តសញ្ញាណសពទាំង៣០នាក់ ដែលស្លាប់ក្នុងហេតុការណ៍បាក់ដងស្ទូចលើរថភ្លើង កាលពីថ្ងៃទី១៤ខែមករាឆ្នាំ២០២៦ ពេលនេះបានកំណត់រួចរាល់អស់ហើយ។

យោងតាមតួលេខផ្លូវការ, មនុស្សសរុប៣២នាក់បានបាត់បង់ជីវិតក្នុងហេតុការណ៍នៅខេត្ត Nakhon Ratchasima ក្នុងនោះមាន២នាក់ជាជនបរទេស ខណៈ៣០នាក់ទៀតជាជនជាតិថៃ។

តាមការផ្សាយរបស់ Bangkok Post, អាជ្ញាធរអះអាងថា អត្តសញ្ញាណសពជនជាតិថៃទាំង៣០នាក់នោះ បានកំណត់រួចរាល់អស់ហើយ ហើយសាច់ញាតិពួកគេក៏បានមកយកសពទៅធ្វើបុណ្យរួចដែរ ចំណែកមណ្ឌលកំណត់អត្តសញ្ញាណ បានបិទហើយនៅថ្ងៃអាទិត្យ។

សូមជម្រាបជាថ្មី ហេតុការណ៍នេះកើតឡើងនាវេលាម៉ោង៩:៤០នាទីព្រឹកថ្ងៃទី១៤ លើផ្លូវរថភ្លើងល្បឿនលឿន Bangkok-Ubon Ratchathani។

ពេលកើតហេតុ រថភ្លើងមានដឹកបុគ្គលិកនិងអ្នកដំណើរ ១៩៥នាក់ ធ្វើដំណើរក្នុងល្បឿន ១២០គីឡូម៉ែត្រក្នុងមួយម៉ោង៕

អត្ថបទ៖ សុខ សុវណ្ណ