​ទំហំទុនវិនិយោគក្នុងវិស័យបរធនបាលកិច្ច​ បានកើនដល់ជាង ២,៤ ​ពាន់លានដុល្លារ​

គិតរហូត​មកដល់ពេលនេះ វិស័យបរធនបាលកិច្ចបានបង្កើត និងចុះបញ្ជីសរុប​ចំនួន ​១៧១២ ​ករណី ​​ជាមួយ​នឹងទំហំ​បរធន​ប្រមាណ​ជាង ២,៤៦ ​ពាន់លានដុល្លារ ចាប់តាំងពីដាក់ឱ្យដំណើរការបរធនបាលកិច្ចនៅដំណាច់ឆ្នាំ ២០២១។​

​យោង​តាមនិយ័តករបរធនបាលកិច្ច នៅក្នុងឆ្នាំ ២០២៥ ​ការចុះបញ្ជីបរធនបាលកិច្ចមានចំនួន ​៥៩០ ​ករណី ​ដែលមានទំហំ​បរធន​ប្រមាណ ៦០២ លានដុល្លារ។​

វិស័យបរធនបាលកិច្ចមានវិសាលភាពទូលំទូលាយ មានចំនួន ៤ ធំៗ រួមមាន បរធនបាលកិច្ច​សាធារណៈ បរធន​បាល​កិច្ច​ពាណិជ្ជកម្ម បរធនបាលកិច្ចសង្គម និង​បរធនបាលកិច្ចបុគ្គល។

លោក សុខ ដារ៉ា អគ្គនាយក​បរធនបាលកិច្ច ​មានប្រសាសន៍​ថា ​រហូត​មកដល់​ពេលនេះ ​វិស័យ​បរធន​បាល​កិច្ច ​មានការរីកចម្រើនគួឱ្យកត់សម្គាល់ ​ក្នុងនោះនិន្នាការប្រើប្រាស់យន្តការ​បរធន​បាលកិច្ច ​ការសម្រេចចិត្តវិនិយោគ ​ដាក់ទុន​ ផ្តល់នូវ​ធន​ធានទ្រព្យសម្បត្តិ​ក្នុងគោលបំណង​ជា​ប្រយោជន៍​សា​ធារណៈ​ ឬប្រយោជន៍បុគ្គលជាដើម មានការកើនឡើងគួរឱ្យ​កត់​សម្គាល់។

​​លោក សុខ ដារ៉ា អគ្គនាយក​បរធនបាលកិច្ច ​យល់ឃើញថា​៖ «នេះ​គឺ​ជា​មោទនភាព​របស់​កម្ពុជា​ បើ​ទោះបី​ជា​វិស័យ​និយ័ត​ករ​ទើប​តែ​បង្កើត​ថ្មី​ក៏​ពិត​មែន​ ប៉ុន្តែ​កម្ពុជា​មាន​ទីផ្សារ​បរធនបាលកិច្ច​ជា​មួយ​ប្រតិបត្តិការ​ពេញ​លេញ​ ដែលដាក់ឱ្យដំណើរការនៅដើមឆ្នាំ ២០២៣ ដោយសារយើងមានក្របខណ្ឌច្បាប់ បទបញ្ញត្តិពាក់ព័ន្ធ សម្រាប់គ្រប់គ្រង សម្រាប់ដំណើរការប្រតិបត្តិការបរធនបាលកិច្ច ទីផ្សារបរធនបាលកិច្ច»។

​បរធនបាលកិច្ច គឺជាសេវាហិរញ្ញវត្ថុមិនមែនធនាគារមួយដែលមានតួនាទីគ្រប់គ្រង មើលថែរក្សា ឬចាត់​ចែក​ទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍​ដល់ក្រុមគោលដៅ​ណាមួយ ដែលស្ថិតក្នុង​អនុលោមតាមលិខិត​បរ​ធនបាលកិច្ច ឬបទប្បញ្ញត្តិជាធរមាន។

បរធនបាលកិច្ចនេះ ជាវិស័យមួយ​ដែលជួយដល់ការ​អភិវឌ្ឍវិស័យពាណិជ្ជកម្ម និងសង្គមជាតិ តាមរយៈ​ការទាក់ទាញនូវមូលនិធិសង្គមនានា និង​លំហូរទុនវិនិយោគទាំងក្នុង និងក្រៅប្រទេស៕

អត្ថបទ៖ ឡេង ដេត