​រាជរដ្ឋាភិបាល​បង្កើតមូលនិធិ​​​ស្រាវជ្រាវបរធន​បាលកិច្ច​ សំដៅ​អភិវឌ្ឍ​ប្រព័ន្ធ​នវានុវត្តន៍​ជាតិ​

សម្ដេចមហាបវរធិបតី ​ហ៊ុន ម៉ាណែត ​នាយករដ្ឋមន្ត្រីកម្ពុជា បានចេញអនុក្រឹត្យ បង្កើតមូលនិធិ​ស្រាវជ្រាវ​ជាតិ​ជាបរធន​បាលកិច្ច​សាធារណៈ ដើម្បីកៀរគរ គ្រប់គ្រង និងចាត់ចែងបរធន សម្រាប់​គាំ​ទ្រដល់ការស្រាវជ្រាវ និងអភិវឌ្ឍ របស់គ្រឹះ​ស្ថានស្រាវជ្រាវសាធារណៈ និងឯកជន ស្ថាប័នដៃគូ និង​ស្ថាប័នស្រាវជ្រាវផ្សេងទៀត សំដៅជំរុញការ​អភិវឌ្ឍ​ប្រព័ន្ធ​នវានុវត្តន៍​ជាតិ។

​ក្រុមប្រឹក្សា​បរធននៃ ​មូលនិធិ​ស្រាវជ្រាវ​ជាតិ ​ដឹកនាំដោយរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាប្រធាន និងសមាជិក ដែលមកពីតំណាងទីស្ដីការគណៈរដ្ឋមន្ត្រី១រូប, តំណាងក្រសួងសេដ្ឋកិច្ច និងហិរញ្ញវត្ថុ ១ រូប, តំណាងក្រសួងអប់រំ យុវជន និងកីឡា១រូប, តំណាង​វិស័យ​ឯកជន២ រូប និងនាយករប្រតិបត្តិនៃអង្គភាពប្រតិបត្តិនៃ​មូលនិធិ​ស្រាវជ្រាវ​ជាតិ។

​យោង​តាមនិយ័តករបរធនបាលកិច្ច គិតរហូត​មកដល់ពេលនេះ វិស័យបរធនបាលកិច្ចបានបង្កើត និង​ចុះបញ្ជី​សរុប​ចំនួន ​១៧១២ ​ករណី ​​ជាមួយ​នឹងទំហំ​បរធន​ប្រមាណ​ជាង ២,៤៦ ​ពាន់លានដុល្លារ ចាប់តាំងពីដាក់ឱ្យដំណើរការបរធនបាលកិច្ចនៅដំណាច់ឆ្នាំ ២០២១។​

​នៅក្នុងឆ្នាំ ២០២៥ ​ការចុះបញ្ជីបរធនបាលកិច្ចមានចំនួន ​៥៩០ ​ករណី ​ដែលមានទំហំ​បរធន​ប្រមាណ ៦០២ លានដុល្លារ។​

​វិស័យបរធនបាលកិច្ចមានវិសាលភាពទូលំទូលាយ មានចំនួន ៤ ធំៗ រួមមាន បរធនបាលកិច្ច​សាធារណៈ បរធន​បាល​កិច្ច​ពាណិជ្ជកម្ម បរធនបាលកិច្ចសង្គម និង​បរធនបាលកិច្ចបុគ្គល។

លោក សុខ ដារ៉ា អគ្គនាយក​បរធនបាលកិច្ច ​មានប្រសាសន៍​ថា ​រហូត​មកដល់​ពេលនេះ ​វិស័យ​បរធន​បាល​កិច្ច ​មានការរីកចម្រើនគួឱ្យកត់សម្គាល់ ​ក្នុងនោះនិន្នាការប្រើប្រាស់យន្តការ​បរធន​បាលកិច្ច ​ការសម្រេចចិត្តវិនិយោគ ​ដាក់ទុន​ ផ្តល់នូវ​ធន​ធានទ្រព្យសម្បត្តិ​ក្នុងគោលបំណង​ជា​ប្រយោជន៍​សា​ធារណៈ​ ឬប្រយោជន៍បុគ្គលជាដើម មានការកើនឡើងគួរឱ្យ​កត់​សម្គាល់៕

អត្ថបទ៖ ឡេង ដេត