ព័ត៌មានជាតិ

រដ្ឋ-វិស័យឯកជន រួមគ្នា លើកកម្ពស់ការយល់ដឹង និងការអភិវឌ្ឍធនធានមនុស្សក្នុងវិស័យ បរធនបាលកិច្ច

បានផុស

១២ ខែ មុន

នៅ

ថ្ងៃចន្ទ ៤ សីហា ២០២៥

ដោយ

នៅថ្ងៃទី០៤ ខែសីហា ឆ្នាំ២០២៥ និយ័តករបរធនបាលកិច្ច និង សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានចុះអនុស្សរណៈនៃការយោគយល់គ្នា (MoU) ស្ដីពី “ការលើកកម្ពស់ការយល់ដឹង និងការអភិវឌ្ឍធនធានមនុស្សក្នុងវិស័យបរធនបាលកិច្ចនៅព្រះរាជាណាចក្រកម្ពុជា”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះអនុស្សរណៈនៃការយោគយល់គ្នានេះ ធ្វើឡើងក្នុងគោលបំណងដើម្បីលើកកម្ពស់ការយល់ដឹង និងផ្សព្វផ្សាយពីវិស័យបរធនបាលកិច្ចឱ្យបានទៅដល់សិស្ស-និស្សិត នៃស.ភ.ន.វ.ស. ឱ្យបានកាន់តែទូលំទូលាយ ព្រមទាំងផ្តល់ការគាំទ្រក្នុងការអភិវឌ្ឍធនធានមនុស្សក្នុងវិស័យបរធនបាលកិច្ចនៅកម្ពុជាផងដែរ។

ពិធីចុះអនុស្សរណៈនៃការយោគយល់គ្នានេះ ត្រូវបានរៀបចំឡើងក្រោមអធិបតីភាពរបស់ លោក សុខ ដារ៉ា អគ្គនាយកនៃនិយ័តករបរធនបាលកិច្ច និង លោកបណ្ឌិត លុយ ចណ្ណា សាកលវិទ្យាធិការ នៃស.ភ.ន.វ.ស. ព្រមទាំងមានការចូលរួមពីតំណាងជាន់ខ្ពស់នៃនិយ័តករ និងអង្គភាពក្រោមឱវាទអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.), ថ្នាក់ដឹកនាំ និងមន្រ្តីជំនាញនៃ ន.ប.ធ. ថ្នាក់ដឹកនាំ សាស្រ្តាចារ្យ និងសិស្ស-និស្សិតនៃស.ភ.ន.វ.ស. តំណាងក្រុមហ៊ុនបរធនបាល ប្រតិបត្តិករបរធនបាលផ្ដល់សេវារក្សាសុវត្ថិភាព ឬសេវារក្សាទុក ក្រុមហ៊ុនវាយតម្លៃក្នុងវិស័យបរធនបាលកិច្ច និងក្រុមហ៊ុនផ្តល់សេវាសវនកម្មក្នុងវិស័យបរធនបាលកិច្ច។

គិតមដល់បច្ចុប្បន្នបរធនបាលកិច្ចដែលបង្កើត និងចុះបញ្ជីត្រឹមត្រូវនូវនិយ័តករបរធនបាលកិច្ច (Trust Regulator) កើនឡើងដល់ចំនួន ១ ២៥៤ករណី ដែលមានទំហំបរធនកើនដល់ចំនួន ១,៨៤០ ពាន់លានដុល្លារអាមេរិក បើធៀបទៅនិងឆ្នាំ២០២១ ដែលមានបរធនបាលកិច្ចត្រឹមតែ ១៧ ករណី គិតជាសាច់ប្រាក់ប្រមាណ ១៥៦ លានដុល្លារប៉ុណ្ណោះ។

ក្នុងនោះ និយ័តករបរធនបាល មានបរធនបាលដែលជាតួអង្គសំខាន់នៅក្នុងការគ្រប់គ្រងការចាត់ចែង ថែរក្សា សុវត្ថិភាពរហូតដល់ ៤០ ស្ថាប័ន ដែលក្នុងនោះមាន ១៤ ជាក្រុមហ៊ុនបរធនបាល និង ២៦ ជាគ្រឹះស្ថានធនាគារពាណិជ្ជឈានមុន ដែលទទួលបានអាជ្ញាប័ណ្ណពីអាជ្ញាធរបរធនបាលកិច្ច ធ្វើប្រតិបត្តិការជាប្រតិបត្តិករផ្តល់សេវាថែរក្សាទុក ឬសេវារក្សាសុវត្ថិភាព។

ក្រៅពីនេះមានក្រុមហ៊ុនផ្តល់សេវាវាយតម្លៃ ចំនួន ១៧ និងក្រុមហ៊ុនផ្តល់សេវាសវនកម្មចំនួន ១៥ បន្ថែមទៀត មានន័យថាទ្រព្យសម្បត្តិមួយចំនួនដែលជាអចលនវត្ថុ និងចលនវត្ថុ ត្រូវមានការវាយតម្លៃជាក់ស្តែង ដោយវិធីសាស្រ្តត្រឹមត្រូវ និងដោយបុគ្គលដែលមានវិជ្ជាជីវៈ៕