តំបន់មួយចំនួនរបស់កម្ពុជា នឹងមានបាតុភូតចុះអ័ព្ទ ខណៈមន្ត្រីជំនាញណែនាំឲ្យអ្នកធ្វើដំណើរប្រុងប្រយ័ត្ន

ចាប់ពីថ្ងៃទី២២ ដល់ថ្ងៃទី៣១ ខែមករា ឆ្នាំ២០២៦ នៅតាមតំបន់មួយចំនួនក្នុងព្រះរាជាណាចក្រកម្ពុជាដូចជា តំបន់ទំនាបកណ្តាលខាងត្បូង តំបន់ខ្ពង់រាប តំបន់ជួរភ្នំ តំបន់សមុទ្រ និងមាត់សមុទ្រ នឹងមានសីតុណ្ហភាពចុះត្រជាក់ ហើយមានបាតុភូតចុះអ័ព្ទ។ តាមស្ថានភាពធាតុអាកាសបែបនេះ មន្ត្រីជំនាញបានណែនាំឲ្យប្រជាពលរដ្ឋ និងអាជ្ញាធរដែនដី ជាពិសេសអ្នកត្រូវធ្វើដំណើរត្រូវមានការប្រុងប្រយ័ត្នខ្ពស់។

តាមការប្រកាសរបស់ក្រសួងធនធានទឹក និងឧតុនិយម កាលពីយប់ថ្ងៃទី២០ ខែមករា ឆ្នាំ២០២៦ បាតុភូតនេះនឹងមានឥទ្ធិពលខ្លាំងនៅពេលយប់ និងពេលព្រឹក ប៉ុន្តែវានឹងរលាយបាត់ទៅវិញនៅម៉ោង ៩ព្រឹក។ បាតុភូតចុះអ័ព្ទនេះ អាចមានការរំខានដល់អ្នកធ្វើដំណើរ ដែលនាំឱ្យមានការលំបាកក្នុងការមើលឃើញពីចម្ងាយ។

ក្រសួងធនធានទឹក អំពាវនាវឲ្យសាធារណជន និងអាជ្ញាធរដែនដី មេត្តាយកចិត្តទុកដាក់ប្រុងប្រយ័ត្នខ្ពស់អំពីស្ថានភាពធាតុអាកាស ចុះអ័ព្ទនេះ ដើម្បីជៀសវាងពីបញ្ហាផ្សេងៗ ដែលអាចកើតមានឡើងជាយថាហេតុ៕