សេដ្ឋកិច្ច

កម្ពុជា រំពឹងនាំចេញសំបុកត្រចៀកកាំដោយផ្ទាល់ ទៅកាន់ទីផ្សារចិនឆ្នាំនេះ

បានផុស

៤ ខែ មុន

នៅ

ថ្ងៃអង្គារ ២៧ មករា ២០២៦

ដោយ

កម្ពុជារំពឹងនាំចេញសំបុកត្រចៀកកាំទៅកាន់ទីផ្សារប្រទេសចិន នៅក្នុងឆ្នាំ ២០២៦ ខណៈក្រសួងកសិកម្ម រុក្ខាប្រមាញ់ និងនេសាទ បានរៀបចំក្រុមហ៊ុននាំចេញចំនួន ៦ សម្របសម្រួលជាមួយគយចិនក្នុងការនាំចេញដោយផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ុយ កុកធាន ប្រធានសមាគមត្រចៀកកាំកម្ពុជា ប្រាប់កម្ពុជាថ្មីនៅព្រឹកថ្ងៃទី ២៧ ខែមករានេះ ថា ក្រសួងកសិកម្ម បានចុះបញ្ជីផ្ទះត្រចៀកកាំប្រមាណ ១០០០ ខ្នង និងបានរៀបចំក្រុមហ៊ុននាំចេញចំនួន ៦ ដើម្បីសម្របសម្រួលជាមួយគយចិន ក្នុងការពិនិត្យ និងសម្រេច លើការនាំចេញសំបុកត្រចៀកកាំដោយផ្ទាល់ទៅចិន។

លោក ស៊ុយ កុកធាន យល់ឃើញថា៖ «ដំណើរការនេះ ជាសញ្ញាល្អក្នុងការចាប់ផ្ដើម គ្រាន់តែថា ធ្វើយ៉ាងណា សំណូមពរក្រសួងជំរុញឱ្យបានលឿន ពីព្រោះអ្នកចិញ្ចឹមកំពុងទន្ទឹងរង់ចាំ»។

ចិនបានសម្រេចអនុញ្ញាតឱ្យកម្ពុជានាំចូលសំបុកត្រចៀកកាំដោយផ្ទាល់ ក្នុងដំណើរទស្សនកិច្ចរបស់លោកប្រធានាធិបតី ស៊ី ជិនពីង កាលពីខែមេសា ឆ្នាំ ២០២៥។

តម្លៃទីផ្សារសំបុកត្រចៀកកាំកម្ពុជាបច្ចុប្បន្ន កើនឡើងបន្តិចប្រមាណ ៣០០ ដុល្លារ ក្នុងមួយគីឡូក្រាម ហើយសំបុកល្អលេខ ១ ប្រមាណ ៥០០ ដុល្លារ ក្នុងមួយគីឡូក្រាម។

ផលិតកម្មសំបុកត្រចៀកកាំផលិតនៅកម្ពុជា ភាគច្រើនផលិតនៅខេត្តជាប់មាត់សមុទ្រ ដូចជា ខេត្តកំពត កោះកុង ប៉ុន្តែសក្ដានុពលសម្រាប់ការវិនិយោគបន្ត បច្ចុប្បន្ន បានប្ដូរមកខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញបឹងទន្លេសាប ខេត្តស្ទឹងត្រែង និងព្រះវិហារវិញ ដោយសារខេត្តជាប់មាត់សមុទ្រ មានការសាងសង់ច្រើនលើសលប់។

តាមការប៉ាន់ស្មាន កម្ពុជាមានមសត្ថភាពផលិតសំបុកត្រចៀកកាំប្រមាណ ១០០ តោន ក្នុងមួយឆ្នាំ៕