ក្រសួងកសិកម្ម អំពាវនាវពលរដ្ឋកុំដកផ្កាថ្មចេញពីដែនសមុទ្រ ធ្វើឱ្យប៉ះពាល់​ដល់ការអភិរក្សជីវៈចម្រុះ

អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារអភិរក្សជលផល កញ្ញា អ៊ឹម រចនា បានអំពាវនាវដល់ពលរដ្ឋជាពលរដ្ឋ ជាពិសេសភ្ញៀវទេសចរដែលទៅលេងកម្សាន្តនៅដែនសមុទ្រ កុំដកផ្កាថ្មចេញពីដែនទឹកធម្មជាតិ ដែលធ្វើឱ្យប៉ះពាល់​ដល់ការអភិរក្សជីវៈចម្រុះនៅបាតសមុទ្រ។ ទន្ទឹមនេះ អំពាវនាវដល់គ្រប់ភាគីទាំងអស់ ចូលរួម​ថែរក្សា​ឱ្យបានគង់វង្ស និងគាំទ្រការពារជីវៈសមុទ្ររបស់យើងទាំងអស់គ្នា ដើម្បីថែរក្សា​ធនធានធម្មជាតិដ៏កម្រនេះឱ្យបានគង់វង្សសម្រាប់កូនចៅជំនាន់ក្រោយ។

ការអំពាវនាវនេះ ធ្វើឡើងបន្ទាប់ពីកញ្ញា អ៊ឹម រចនា និងអាជ្ញាធរមូលដ្ឋាន​នៃឃុំកោះ​ស្តេច ស្រុកគិរីសាគរ ខេត្តកោះកុង បានប្រទះឃើញភ្ញៀវទេសចរមួយចំនួនដែលមកលេងកម្សាន្តនៅដែនសមុទ្រ ​បានដកយកនូវធានធានធម្មជាតិបាត
សមុទ្រ គឺផ្កាថ្ម យកឡើងមកលើគោក ដើម្បីទុកធ្វើជាវត្ថុអនុស្សាវរីយ៍។

យ៉ាងណាមិញ ក្រោយមានការណែនាំពី លោក ស៊ន ស្រិញ មេឃុំស្តីទីនៃរដ្ឋបាលឃុំកោះស្តេច ស្រុកគិរីសាគរ ភ្ញៀវទេសចរ បានប្រគល់ជូនមន្រ្តីដើម្បីព្រលែងចូលក្នុងទឹកសមុទ្រវិញ។ លោកបញ្ជាក់ថា៖«ផ្កាថ្មមានសារៈសំខាន់ណាស់ នៅក្នុងធនធានធម្មជាតិជីវៈចម្រុះបាតសមុទ្រ ព្រោះវាផ្តល់ជម្រក ពងកូន ដល់មច្ឆជាតិ»។ លោកបានអះអាងថា ​ជាទូទៅ រដ្ឋបាលឃុំកោះស្តេច តែងតែផ្សព្វផ្សាយ ទៅកាន់សហគមន៍នេសាទ ឱ្យបន្តផ្សព្វផ្សាយទៅកាន់ភ្ញៀវទេសចរជាតិ-អន្តរជាតិ អំពីបំរាម ហាមដកផ្កាថ្មចេញពីទឹកសមុទ្រដើម្បីចូលរូមថែរក្សាពារទាំងអស់គ្នា។

សូមជម្រាបថា ផ្កាថ្មជាទីជម្រកដ៏សំខាន់សម្រាប់ជីវិតសត្វសមុទ្ររាប់ពាន់ប្រភេទ និងផ្ដល់ប្រយោជន៍ជាច្រើនដល់ប្រព័ន្ធអេកូឡូស៊ីក្នុងសមុទ្រ។ វាជួយការពារ​ជីវៈ​ចម្រុះរាប់ពាន់ប្រភេទនៅក្រោមសមុទ្រ គាំទ្រសេដ្ឋកិច្ចក្នុងតំបន់ ពិសេស​អេកូ​ទេស​ចរណ៍ និងសហគមន៍នេសាទសមុទ្រក្នុងប្រទេសកម្ពុជា ក៏ដូចជាជំរុញ​ដល់​ការ​យល់​ដឹងផ្នែកវិទ្យាសាស្រ្ដ៕