សេដ្ឋកិច្ច

រដ្ឋាភិបាលនឹងផ្ដល់ពូជមាន់ចិញ្ចឹម ដល់ពលរដ្ឋភៀសសឹក ដើម្បីលើកស្ទួយជីវភាព

បានផុស

៣ ខែ មុន

នៅ

ថ្ងៃពុធ ៨ មេសា ២០២៦

ដោយ

ក្រសួងកសិកម្ម រុក្ខាប្រមាញ់ និងនេសាទ នឹងចាប់ផ្ដើមចុះឈ្មោះ ជ្រើសរើសបងប្អូនជនភៀសសឹក ដែលចង់ប្រកបរបរចិញ្ចឹមមាន់ស្រែ ដែលនឹងផ្ដល់ជូននូវទ្រង់១ ពូជកូនមាន់ចំនួន ១០០ ក្បាល ក្នុងមួយគ្រួសារ ចំណីសម្រាប់ជុំដំបូង និងការបណ្ដុះបណ្ដាលបច្ចេកទេសចាំបាច់នានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍នៅថ្ងៃពុធទី ៨ ខែមេសា ២០២៦ថា ការផ្ទុះឡើងនៃសង្គ្រាមតាមបណ្ដោយព្រំដែនកម្ពុជា-ថៃ បានបង្ខំឱ្យប្រជាពលរដ្ឋរាប់សែននាក់ចាកចោលផ្ទះសម្បែង បោះបង់ចោលការប្រមូលផលកសិកម្ម និងបាត់បង់នូវមុខរបរប្រចាំថ្ងៃស្ទើតែទាំងស្រុង។

រហូតមកដល់ម៉ោងនេះ ទោះបីជាមានបងប្អូនមួយចំនួនធំបានវិលត្រឡប់ទៅកាន់មូលដ្ឋានវិញហើយក្ដី ក៏យើងនៅមានប្រជាពលរដ្ឋជាង ៣ ម៉ឺន ៤ ពាន់នាក់ មិនទាន់អាចវិលទៅលំនៅឋានវិញនៅឡើយ។

លោក ឃឹម ហ្វីណង់ បានបន្តថា ប្រជាពលរដ្ឋទាំងនេះ កំពុងរស់នៅពឹងផ្អែកស្ទើតែទាំងស្រុងលើជំនួយសង្គ្រោះបន្ទាន់ ដែលនេះគឺជាហានិភ័យដ៏ធំមួយក្នុងការធ្លាក់ចូលនៅក្នុងភាពអសន្តិសុខស្បៀង ប្រសិនបើយើងមិនការគិតគូបានទាន់ពេលវេលា។

រាជរដ្ឋាភិបាល បានដាក់ចេញនូវវិធានការអន្តរាគមន៍ ដោយបានរៀបចំទីតាំងរស់នៅប្រមូលផ្ដុំឱ្យបានសមរម្យសម្រាប់ជូនដល់បងប្អូនប្រជាពលរដ្ឋភៀសសឹក តាមរយៈការប្រែក្លាយគម្រោងសាងសង់ផ្ទះសម្រាប់អតីតយុទ្ធជនមកប្រើប្រាស់ជាទីជម្រកបណ្ដោះអាសន្ន ជំនួសឱ្យការរស់នៅរាយប៉ាយនៅតាមជំរំជនភៀសសឹក៕