មុនពិភាក្សានៅហ្សឺណែវ, អាមេរិក គំរាមអ៊ីរ៉ង់ ខ្លាំងៗ សង្កត់តុចរចា

មុនពិភាក្សាគ្នានៅប្រទេសស្វីស, សហរដ្ឋអាមេរិក បានគំរាមខ្លាំងៗទៅអ៊ីរ៉ង់ ជាការសង្កត់តុចរចា ស្តីពីកម្មវិធីអាវុធនុយក្លេអ៊ែររបស់ទីក្រុងតេហេរ៉ង់។

អាមេរិក-អ៊ីរ៉ង់ នឹងចរចាគ្នាក្នុងទីក្រុងហ្សឺណែវ នៅថ្ងៃព្រហស្បតិ៍ទី២៦ខែកុម្ភៈ ប៉ុន្តែមុនកិច្ចពិភាក្សាចាប់ផ្តើម ទីក្រុងវ៉ាស៊ីនតោន ដូចជាដាក់សម្ពាធខ្លាំងណាស់ ដោយរដ្ឋមន្ត្រីការបរទេសអាមេរិក Marco Rubio ប្រកាសក្តែងៗថា អ៊ីរ៉ង់នឹងកើតរឿងធំ បើមិនព្រមចរចាកម្មវិធីមីស៊ីល។

តាមសម្តីលោក Rubio ដែលដកស្រង់យកផ្សាយដោយសារព័ត៌មាន Times of Israel, ប្រទេសអ៊ីរ៉ង់កំពុងព្យាយាមបង្កើត មីស៊ីលផ្លោងអន្តរទ្វីប (ICBM) ហើយការចរចានៅថ្ងៃព្រហស្បតិ៍ជាមួយអ៊ីរ៉ង់ នឹងផ្តោតសំខាន់លើកម្មវិធីនុយក្លេអ៊ែររបស់ទីក្រុងតេហេរ៉ង់តែម្តង។

លោកព្រមានថា អ៊ីរ៉ង់ត្រូវតែចរចាអំពីកម្មវិធីមីស៊ីលរបស់ខ្លួន។ ការដែលអ៊ីរ៉ង់ទទូចមិនព្រមពិភាក្សាអំពីមីស៊ីលផ្លោង គឺជាបញ្ហាដ៏ធំធេងបំផុត។

ទន្ទឹមនោះ អនុប្រធានាធិបតីអាមេរិក JD Vance ក៏ចេញមុខអះអាងដែរថា ទីក្រុងវ៉ាស៊ីនតោន មើលឃើញអស់ហើយនូវព័ស្តុតាងដែលថា អ៊ីរ៉ង់កំពុងព្យាយាមកសាងកម្មវិធីនុយក្លេអ៊ែររបស់ខ្លួនឡើងវិញ បន្ទាប់ពីការវាយប្រហារដឹកនាំដោយអាមេរិក កាលពីខែមិថុនាឆ្នាំមុន។

លោក Vance ប្រាប់ក្រុមអ្នកយកព័ត៌មាន៖ «គោលការណ៍គឺសាមញ្ញណាស់៖ អ៊ីរ៉ង់មិនអាចមានអាវុធនុយក្លេអ៊ែរបានទេ។ ប្រសិនបើពួកគេព្យាយាមកសាងអាវុធនុយក្លេអ៊ែរឡើងវិញ វានឹងបង្កបញ្ហាដល់យើង។ តាមពិតទៅ យើងបានឃើញព័ស្តុតាងដែលថា ពួកគេព្យាយាមធ្វើរឿងនោះអស់ទៅហើយ»។

មុននេះទៀតសោត ប្រមុខសេតវិមាន ដូណាល់ ត្រាំ ក៏ព្រមានដែរថា​ អ៊ីរ៉ង់​កំពុង​សំងំ​អភិវឌ្ឍ​មីស៊ីលរយៈចម្ងាយឆ្ងាយ ដែល​បាញ់​ដល់​ដី​អាមេរិក ដូច្នេះលោកនឹងមិនអនុញ្ញាត​ឲ្យប្រទេសដែលគាំទ្រភេរវកម្មលេខមួយលើពិភពលោក» នេះ មានអាវុធនុយក្លេអ៊ែរជាដាច់ខាត។

យ៉ាងណា រដ្ឋមន្ត្រីការបរទេសអ៊ីរ៉ង់ Abbas Araghchi បានច្រានចោលការចោទប្រកាន់នេះរួចទៅហើយ ដោយថាជា «ព័ត៌មានក្លែងក្លាយ»។ លោកបញ្ជាក់ថា មីស៊ីលរបស់អ៊ីរ៉ង់មានលក្ខណៈការពារតែប៉ុណ្ណោះ និងត្រូវបានកំណត់កម្រិតចម្ងាយបាញ់ត្រឹម ២០០០គីឡូម៉ែត្រ៕

អត្ថបទ៖ សុខ សុវណ្ណ