អ៊ីរ៉ង់បដិសេធការចោទប្រកាន់ ដែល​ថា ខ្លួនកំពុង​អភិវឌ្ឍ​មីស៊ីលបាញ់​ដល់​ដី​អាមេរិក

រដ្ឋមន្ត្រីការបរទេសអ៊ីរ៉ង់ លោក Abbas Araghchi បានច្រានចោលការអះអាងរបស់ប្រធានាធិបតី ដូណាល់ ត្រាំ ដែលថា ទីក្រុងតេហេរ៉ង់កំពុងអភិវឌ្ឍមីស៊ីលដែលអាចបាញ់ដល់ដី​អាមេរិក ដោយលោកបានហៅការចោទប្រកាន់នេះថាជា «ព័ត៌មានក្លែងក្លាយ»។

ក្នុងកិច្ចសម្ភាសន៍ជាមួយទូរទស្សន៍ India Today កាលពីថ្ងៃពុធ​ទី​២៥​ខែ​កុម្ភៈ​ឆ្នាំ​២០២៦ លោក Araghchi បានបញ្ជាក់ថា មីស៊ីលរបស់អ៊ីរ៉ង់មានលក្ខណៈការពារតែប៉ុណ្ណោះ និងត្រូវបានកំណត់កម្រិតចម្ងាយបាញ់ត្រឹម ២០០០គីឡូម៉ែត្រ។ ការឆ្លើយតបនេះធ្វើឡើងបន្ទាប់ពីលោកត្រាំ បានព្រមានពីលទ្ធភាពប្រើប្រាស់វិធានការយោធា និងបានចោទប្រកាន់អ៊ីរ៉ង់ថា​កំពុងស្វែងរកមហិច្ឆតាដ៏អាក្រក់តាមរយៈកម្មវិធីនុយក្លេអ៊ែរ និងមីស៊ីលបាលីស្ទីករយៈចម្ងាយឆ្ងាយ។

ការប្រឈមមុខដាក់គ្នាផ្នែកការទូតនេះ កើតឡើងស្របពេលដែលលោក Araghchi ដឹកនាំគណៈប្រតិភូទៅកាន់ទីក្រុងហ្សឺណែវ ដើម្បីចូលរួមក្នុងកិច្ចចរចានុយក្លេអ៊ែរដោយប្រយោលជុំទី៣ ជាមួយសហរដ្ឋអាមេរិក។ ទោះបីជាលោកត្រាំ បានព្រមានអ៊ីរ៉ង់កុំ​ឲ្យ​ព្យាយាមស្តារកម្មវិធីអាវុធឡើងវិញក៏ដោយ ក៏លោក Araghchi បានសង្កត់ធ្ងន់ថា អ៊ីរ៉ង់មិនបានបង្កសង្គ្រាមមុននោះទេ ប៉ុន្តែគ្រាន់តែការពារខ្លួនពីការវាយប្រហាររបស់អ៊ីស្រាអែល និងអាមេរិកកាលពីឆ្នាំមុនប៉ុណ្ណោះ។ លោកបានថ្លែងថា «យើងបានត្រៀមខ្លួនរួចជាស្រេច មិនមែនដោយសារយើងចង់បានសង្គ្រាមទេ ប៉ុន្តែដោយសារយើងចង់បង្ការវា»។

ដ្បិត​​មានភាពតានតឹងក៏ដោយ ក៏ភាគីទាំងពីរបានបង្ហាញសញ្ញាវិជ្ជមានតាមរយៈការចរចាដែលបានធ្វើឡើងនាពេលកន្លងមក។ លោក Araghchi បានសម្តែងក្តីសង្ឃឹមថា នឹងអាចសម្រេចបាននូវ «កិច្ចព្រមព្រៀងដ៏ត្រឹមត្រូវ និងមានតុល្យភាព» នៅក្នុងកិច្ចចរចានាថ្ងៃព្រហស្បតិ៍នេះ ដោយលោកបញ្ជាក់ថា អ៊ីរ៉ង់ត្រៀមខ្លួនជាស្រេចក្នុងការឆ្លើយសំណួរ និងដោះស្រាយការព្រួយបារម្ភនានា ប៉ុន្តែនឹងមិនបោះបង់សិទ្ធិក្នុងការប្រើប្រាស់បច្ចេកវិទ្យានុយក្លេអ៊ែរក្នុងគោលបំណងសន្តិវិធីឡើយ។ កិច្ចចរចាជុំថ្មីនេះ ត្រូវបានរំពឹងថានឹងបន្តពង្រឹងគោលការណ៍ណែនាំដែលបានព្រមព្រៀងគ្នាកាលពីជុំមុន ដើម្បីឈានទៅរកកិច្ចព្រមព្រៀងជាស្ថាពរ៕

ប្រែសម្រួល៖ ឈាង