ព័ត៌មានអន្ដរជាតិ

ស្ថានការណ៍កាន់តែក្ដៅ! អ៊ីរ៉ង់ប្រកាសដាច់ខាតមិនចរចាជាមួយអាមេរិកទៀតទេ

បានផុស

៣ ខែ មុន

នៅ

ថ្ងៃចន្ទ ២ មីនា ២០២៦

ដោយ

Chheang

លោក Ali Larijani មន្ត្រីសន្តិសុខជាតិកំពូលរបស់អ៊ីរ៉ង់ និងជាជាទីប្រឹក្សាសំខាន់របស់អតីតមេដឹកនាំកំពូលលោក Ayatollah Ali Khamenei បានប្រកាសតាមរយៈការបង្ហោះលើបណ្តាញសង្គម X ថា ប្រទេសអ៊ីរ៉ង់នឹងមិនចរចាជាមួយសហរដ្ឋអាមេរិកទៀតឡើយ។ នេះបើយោងតាមការចុះផ្សាយរបស់សារព័ត៌មាន CNN នាថ្ងៃទី២ខែមីនាឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Larijani ដែលជាបុគ្គលដ៏មានឥទ្ធិពលបំផុតម្នាក់ បានធ្វើការអត្ថាធិប្បាយនេះ ដើម្បីឆ្លើយតបទៅនឹងរបាយការណ៍ប្រព័ន្ធផ្សព្វផ្សាយមួយចំនួនដែលថា អ៊ីរ៉ង់បានទាក់ទងទៅអាមេរិកតាមរយៈអ្នកសម្របសម្រួល ដើម្បីសុំបន្តការចរចាឡើងវិញ។ លោក Larijani បានបញ្ជាក់យ៉ាងម៉ឺងម៉ាត់ថា កងកម្លាំងអ៊ីរ៉ង់ «មិនមែនជាអ្នកចាប់ផ្តើមការឈ្លានពាននោះទេ»។

លោក Larijani បានរិះគន់ប្រធានាធិបតីអាមេរិក លោក ដូណាល់ ត្រាំ ថាបានធ្វើឲ្យតំបន់ធ្លាក់ក្នុងភាពចលាចល ហើយឥឡូវនេះកំពុងធ្វើឲ្យបាត់បង់ជីវិតបន្ថែមទៀតនៃកងទ័ពអាមេរិក។ លោកបានបន្តថា លោកត្រាំ កំពុងគិតខុសហើយ និងកំពុងផ្លាស់ប្តូរពាក្យស្លោក «America First» ទៅជា «Israel First» វិញ ដោយបានលះបង់ជីវិតទាហានអាមេរិក ដើម្បីតែមហិច្ឆតាអំណាចរបស់អ៊ីស្រាអែល។

សូមជម្រាបថា ពិភពលោកកំពុងធ្លាក់ចូលទៅក្នុងភាពតក់ស្លុត នៅពេលដែលសន្តិភាពតាមរយៈការចរចាការទូតត្រូវរលាយសាបសូន្យ ហើយជំនួសមកវិញដោយគ្រាប់បែក និងគ្រាប់មីស៊ីល។ នៅថ្ងៃទី២៨ខែកុម្ភៈ ផ្ទៃមេឃលើប្រទេសអ៊ីរ៉ង់ត្រូវបានញ៉ាំងដោយអណ្តាតភ្លើងនៃគ្រាប់យុទ្ធភណ្ឌរបស់អាមេរិក និងអ៊ីស្រាអែល ដែលបានកម្ទេចទាំងឃ្លាំងអាវុធ និងផ្តាច់ជីវិតមេដឹកនាំកំពូលរបស់ពួកគេ។ ក្នុងកំហឹងសងសឹកដ៏ខ្លាំងក្លា អ៊ីរ៉ង់មិនបាននៅស្ងៀមឡើយ ដោយបានបាញ់មីស៊ីលរាប់រយគ្រាប់ដូចភ្លៀងរលឹម គ្របដណ្តប់លើផ្ទៃមេឃនៃប្រទេសអ៊ីស្រាអែល និងមូលដ្ឋានទ័ពអាមេរិកនៅទូទាំងតំបន់ឈូងសមុទ្រ៕

ប្រែសម្រួល៖ ឈាង