សេដ្ឋកិច្ច

ក្រសួងពាណិជ្ជកម្មបន្តណែនាំដល់ម្ចាស់ស្ថានីយប្រេងឥន្ធនៈ និងដេប៉ូចែកចាយ លក់ប្រេងទៅតាមតម្លៃដែលបានកំណត់

បានផុស

៣ ខែ មុន

នៅ

ថ្ងៃអង្គារ ១០ មីនា ២០២៦

ដោយ

ក្រសួងពាណិជ្ជកម្ម នៅថ្ងៃទី ០៩ ខែមីនា ឆ្នាំ ២០២៦ បានណែនាំឱ្យស្ថានីយ និងដេប៉ូចែកចាយប្រេងឥន្ធនៈនៅតាមបណ្ដារាជធានី-ខេត្ត ត្រូវលក់ប្រេងទៅតាមតម្លៃដែលបានដាក់បង្ហាញជាសាធារណៈ ដើម្បីធានានូវតម្លាភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការណែនាំរបស់ក្រសួងពាណិជ្ជកម្មធ្វើឡើង បន្ទាប់ពីមានស្ថានីយប្រេងឥន្ធនៈ និងដេប៉ូចែកចាយមួយចំនួន បានឆ្លៀតឱកាសដំឡើងថ្លៃប្រេងហួសហេតុ អំឡុងពេលនៃបញ្ហាសង្គ្រាមឈូងសមុទ្រ។

ក្រសួងពាណិជ្ជកម្ម ណែនាំឱ្យស្ថានីយលក់ប្រេងឥន្ធនៈ និងដេប៉ូចែកចាយ ត្រូវធានាសុក្រឹតភាព នៃគុណភាព និងបរិមាណប្រេងដែលត្រូវលក់ជូនអតិថិជន និងត្រូវជូនដំណឹងមុនយ៉ាងតិចមួយថ្ងៃមកមន្ទីររ៉ែ និងថាមពល ឬមន្ទីរពាណិជ្ជកម្ម និងអាជ្ញាធរពាក់ពាក់ព័ន្ធ ក្នុងករណីប្រេងឥន្ធនៈអស់ពីសន្និធិ (ស្តុក) ឬមានបំណងផ្អាកលក់ប្រេងជាបណ្ដោះអាសន្ន។

ក្រសួងពាណិជ្ជកម្មកម្ពុជា បានប្រកាសថា តម្លៃប្រេងឥន្ធនៈលក់រាយនៅតាមស្ថានីយអនុវត្តចាប់ពីថ្ងៃទី ០៨ ដល់ថ្ងៃទី១០ ខែមីនា ត្រូវបានកំណត់ស្របតាមរូបមន្តកំណត់តម្លៃដែលបានព្រមព្រៀងជាមួយក្រុមហ៊ុនប្រេងឥន្ធនៈ និងផ្អែកលើការប្រែប្រួលតម្លៃប្រេងលើទីផ្សារក្នុងតំបន់ និងអន្តរជាតិ។

តម្លៃប្រេងសាំងធម្មតា លក់រាយ ៤៤០០ រៀល ក្នុងមួយលីត្រ ខណៈប្រេងម៉ាស៊ូត ៥១៥០ រៀល ក្នុងមួយលីត្រ ចាប់ពីថ្ងៃទី ០៨ ដល់ថ្ងៃទី ១០ ខែមីនា ឆ្នាំ ២០២៦។

បណ្តាស្ថានីយលក់រាយប្រេងឥន្ធនៈនៅកម្ពុជា អាចលក់ប្រេងក្នុងតម្លៃណាមួយដែលទាបជាងតម្លៃដែលបានកំណត់ខាងលើ ដោយអាស្រ័យលើស្ថានភាពប្រកួតប្រជែងជាក់ស្តែងនៅលើទីផ្សារ៕