UN៖ «១ថ្ងៃ១ពាន់​លានដុល្លារ» សម្រាប់សង្គ្រាមមជ្ឈិមបូព៌ា​ ខណៈពិភពលោកកំពុងខ្វះខាតថវិកាសង្គ្រោះបន្ទាន់

ប្រធានផ្នែកសង្គ្រោះបន្ទាន់របស់អង្គការសហប្រជាជាតិ (UN) លោក Tom Fletcher បានចេញសេចក្តីថ្លែងការណ៍ព្រមានយ៉ាងធ្ងន់ធ្ងរនៅទីក្រុងហ្សឺណែវ ដោយថ្កោលទោសចំពោះ​គ្រោះថ្នាក់ដ៏គួរ​ឲ្យភ័យខ្លាច ខណៈដែលការចំណាយលើជម្លោះនៅមជ្ឈិមបូព៌ាបានហក់ឡើងដល់​១​ពាន់​លានដុល្លារក្នុងមួយថ្ងៃៗ ប៉ុន្តែថវិកាសម្រាប់ជួយសង្គ្រោះជីវិតមនុស្សវិញ កំពុងស្ថិតក្នុងស្ថានភាពខ្វះខាតយ៉ាងខ្លាំង។

ក្នុងអត្ថបទ​ព័ត៌មាន​មួយ​​របស់ UN ចេញ​ផ្សាយ​ថ្ងៃទី​១១​ខែ​មីនា​ឆ្នាំ​២០២៦ លោក Fletcher បានលើកឡើងថា គម្រោងអំពាវនាវរកជំនួយទូទាំងពិភពលោកចំនួន​២៣​ពាន់​លានដុល្លារ ដើម្បីជួយដល់ជនងាយរងគ្រោះបំផុត បច្ចុប្បន្នទទួលបានថវិកាមិនដល់មួយភាគបីនៃតម្រូវការនោះទេ ពោលគឺនៅខ្វះខាតទឹកប្រាក់ដល់ទៅ​១៤​ពាន់​លានដុល្លារ​ទៀត។ លោកបានសង្កត់ធ្ងន់ថា គ្រាន់តែថវិកាដែលគេយកទៅចំណាយលើសង្គ្រាមក្នុងរយៈពេលតែ​​១​ថ្ងៃ​១​ពាន់​លានដុល្លារ គឺអាចជួយសង្គ្រោះជីវិតមនុស្សរាប់លាននាក់នៅក្នុងតំបន់ដែលកំពុងត្រូវការជំនួយខ្លាំងបំផុតដូចជា នៅហ្គាហ្សា និងស៊ូដង់ ជាដើម។

វិបត្តិនេះកាន់តែអាក្រក់ទៅៗ បន្ទាប់ពីការបិទច្រកសមុទ្រ Hormuz កាលពីថ្ងៃទី២​មីនា ដែលលោក Fletcher ព្រមានថា វាកំពុងធ្វើ​ឲ្យ​តម្លៃអាហារ ថាមពល និងជីកសិកម្មនៅទូទាំងពិភពលោកហក់ឡើងខ្ពស់។ ច្រកសមុទ្រនេះ គឺជាផ្លូវដឹកជញ្ជូនប្រេងដល់ទៅ២០% នៃតម្រូវការសកល ដែលវាមានឥទ្ធិពលផ្ទាល់ទៅលើផ្លូវដឹកជញ្ជូនជំនួយទៅកាន់តំបន់អាហ្វ្រិក។ ប្រធានផ្នែកសង្គ្រោះរូបនេះ បានសម្តែងការព្រួយបារម្ភយ៉ាងខ្លាំងថា បើសង្គ្រាមនៅតែបន្តរីករាលដាល វានឹងបន្តបំផ្លាញខ្សែសង្វាក់ផ្គត់ផ្គង់សំខាន់ៗ និងធ្វើ​ឲ្យ​ការភៀសខ្លួនដ៏ធំធេង ក៏ដូចជាវិបត្តិសេដ្ឋកិច្ចកាន់តែធ្ងន់ធ្ងរថែមទៀត។

ក្រៅពីបញ្ហាថវិកា លោក Fletcher ក៏បានបង្ហើបពីក្តីបារម្ភអំពីសុវត្ថិភាពរបស់បុគ្គលិកជំនួយនៅតាមបណ្តាប្រទេសដូចជា ស៊ូដង់ លីបង់ និងកុងហ្គោ ដែលកំពុងរងការវាយប្រហារកាន់តែខ្លាំង។ លោកបានកត់សម្គាល់ថា កាលពីឆ្នាំមុន ៩០% នៃអ្នកដែលបានស្លាប់ដោយសារការវាយប្រហារដោយដ្រូន គឺជាជនស៊ីវិល ដែលក្នុងនោះរួមមានទាំងបុគ្គលិកមនុស្សធម៌ជាច្រើនផងដែរ។ ទោះបីជាត្រូវបំពេញការងារលើសកម្លាំង និងស្ថិតក្រោមការគំរាមកំហែងយ៉ាងណាក៏ដោយ លោក Fletcher បានអះអាងថា អង្គការសហប្រជាជាតិមិនបោះបង់បេសកកម្មរបស់ខ្លួនឡើយ ហើយលោកបានជំរុញ​​ឲ្យ​ប្រទេសជាសមាជិកទាំងអស់ ផ្តល់អាទិភាពលើការការពារជនស៊ីវិល និងហេដ្ឋារចនាសម្ព័ន្ធចាំបាច់នានា៕

អត្ថបទ៖ ឈាង