រុស្ស៊ីទទួលស្គាល់ការផ្តល់អាវុធ​ឲ្យ​អ៊ីរ៉ង់ ប៉ុន្តែបដិសេធរឿង​​ចែក​រំលែក​ព័ត៌មាន​ចារកម្ម

ស្របពេលដែលស្ថានភាពនៅមជ្ឈិមបូព៌ាកំពុងឡើងកម្តៅខ្លាំង រដ្ឋមន្ត្រីការបរទេសរុស្ស៊ី លោក Sergey Lavrov បានបញ្ជាក់ជាផ្លូវការថា ទីក្រុងមូស្គូពិតជាកំពុងផ្គត់ផ្គង់គ្រឿងយុទ្ធោបករណ៍យោធា​ឲ្យ​ទៅភាគីអ៊ីរ៉ង់មែន ក្រោមក្របខណ្ឌនៃ «កិច្ចសហប្រតិបត្តិការបច្ចេកទេសយោធា»។ នេះ​យោង​តាម​ការ​ចុះផ្សាយ​របស់សារព័ត៌មាន Kurdistan24 នា​ថ្ងៃសុក្រ​ទី​២៧​ខែ​មីនា​ឆ្នាំ​២០២៦។

លោក Sergey Lavrov បានទាត់ចោលការចោទប្រកាន់ដែលថា រុស្ស៊ីបានលួចផ្តល់ព័ត៌មានសម្ងាត់ពីទីតាំងទ័ពអាមេរិក​ឲ្យ​ទៅអ៊ីរ៉ង់ ដោយ​អះអាងថា អ៊ីរ៉ង់ខ្លួនឯងមានសមត្ថភាពដឹងពីទីតាំងទាំងនោះច្បាស់ណាស់ មិនចាំបាច់រុស្ស៊ីជួយប្រាប់ឡើយ។ លើសពីនេះ រុស្ស៊ីថែមទាំងបានការពារកម្មវិធីនុយក្លេអ៊ែររបស់អ៊ីរ៉ង់ ហើយបានទម្លាក់កំហុសទៅលើសហរដ្ឋអាមេរិកវិញថា ជាអ្នកធ្វើ​ឲ្យ​តំបន់ទាំងមូលបាត់បង់ស្ថិរភាព តាមរយៈការដកខ្លួនចេញពីកិច្ចព្រមព្រៀងនុយក្លេអ៊ែរកាលពីមុន។

ស្ថានភាពកាន់តែគួរ​ឲ្យ​ព្រួយបារម្ភ នៅពេលដែលលោកប្រធានាធិបតីរុស្ស៊ី វ្ល៉ាឌីមៀរ ពូទីន បានចេញមុខព្រមានថា ជម្លោះរវាងអាមេរិក អ៊ីស្រាអែល និងអ៊ីរ៉ង់ អាចនឹងបង្កជាមហន្តរាយសកលដែល «ធ្ងន់ធ្ងរជាងវិបត្តិជំងឺកូវីដ១៩» ទៅទៀត។ ការព្រមាននេះធ្វើឡើងបន្ទាប់ពីមានការវាយប្រហារតាមអាកាសពីសំណាក់អាមេរិក និងអ៊ីស្រាអែល កាលពីថ្ងៃទី២៨ខែកុម្ភៈ ដែលបានរុញច្រាន​ឲ្យ​អ៊ីរ៉ង់វាយបកវិញដោយប្រើមីស៊ីលសំដៅលើគោលដៅអាមេរិក និងអ៊ីស្រាអែល។ ដោយសារតែខ្លាចមានគ្រោះថ្នាក់ជាយថាហេតុ រុស្ស៊ីបានសម្រេចចិត្តជម្លៀសបុគ្គលិកចំនួន១៦៣​នាក់ ចេញពីរោងចក្រនុយក្លេអ៊ែរ Bushehr បន្ទាប់ពីមានគ្រាប់​ធ្លាក់នៅក្បែរនោះ ចំណែកឯអង្គការសហប្រជាជាតិវិញ បានអំពាវនាវ​ឲ្យ​គ្រប់ភាគីទាំងអស់រក្សាភាពអត់ធ្មត់ជាអតិបរមា ដើម្បីចៀសវាងគ្រោះថ្នាក់នុយក្លេអ៊ែរ៕

ប្រែសម្រួល៖ ឈាង