ក្រុមហ៊ូធី បាញ់ស្រោច​មីស៊ីលលើអ៊ីស្រាអែល ព្រមទាំងប្រកាសបិទផ្លូវទឹកសមុទ្រក្រហម

សង្គ្រាមនៅមជ្ឈិមបូព៌ា កំពុងតែរុញច្រានតំបន់ទាំងមូលឱ្យធ្លាក់ចូលទៅក្នុងសមុទ្រភ្លើងកាន់តែជ្រៅទៅៗ បន្ទាប់ពីក្រុមសកម្ម​ប្រយុទ្ធ​​ហ៊ូធី (Houthi) នៅប្រទេសយេម៉ែន បានប្រកាសជាផ្លូវការ​​នៅ​ថ្ងៃចន្ទ ទី៨ ខែមិថុនា ឆ្នាំ២០២៦ នេះថា ពួកគេបានបើកការវាយប្រហារ ដោយប្រើ​មីស៊ីលបាញ់សំដៅទៅលើប្រទេសអ៊ីស្រាអែល។ ជាមួយគ្នានោះដែរ ក្រុមដែល​មាន​ការ​គាំទ្រ​ដោយ​អ៊ីរ៉ង់នេះ ក៏បានប្រកាសក្តែងៗពីការដាក់ទណ្ឌកម្ម និងបិទផ្លូវទឹកជាដាច់ខាត ដោយមិនអនុញ្ញាតឱ្យរាល់កប៉ាល់ដឹកជញ្ជូនទាំងឡាយណាជារបស់អ៊ីស្រាអែល ធ្វើដំណើរឆ្លងកាត់តំបន់សមុទ្រក្រហមឡើយ។ នេះ​បើយោងតាម​​ការ​ចុះផ្សាយ​របស់​កាសែត​អារ៉ាប់ Asharq Al-Awsat។

ការប្រកាសរបស់​ក្រុម​ហ៊ូធី បានធ្វើឱ្យពិភពលោកព្រួយបារម្ភជាខ្លាំង ពីការវិលត្រឡប់មកវិញនៃវិបត្តិរំខានដល់ផ្លូវនាវាចរណ៍ពាណិជ្ជកម្មដ៏សំខាន់បំផុតមួយរបស់ពិភពលោក។

ក្រុមហ៊ូធី បានបញ្ជាក់យ៉ាងច្បាស់​នៅ​ក្នុង​សេចក្ដី​ថ្លែងការណ៍​ថា «យើងប្រកាសបិទផ្លូវ និងហាមឃាត់ទាំងស្រុង ចំពោះរាល់ការធ្វើនាវាចរណ៍តាមសមុទ្ររបស់អ៊ីស្រាអែល នៅក្នុងតំបន់សមុទ្រក្រហម»។ នេះជាវិធានការ និង​ការបើកការវាយប្រហារ ដោយមីស៊ីលជាលើកដំបូងបង្អស់របស់ក្រុមហ៊ូធីទៅលើអ៊ីស្រាអែល គិតចាប់តាំងពីដើមខែមេសាកន្លងទៅ។

ការចេញមុខ និងបន្ថែមទម្ងន់សង្គ្រាមរបស់ក្រុមហ៊ូធីនេះ បានកើតឡើងភ្លាមៗ បន្ទាប់ពីអ៊ីស្រាអែល និងអ៊ីរ៉ង់ បានបើកការវាយប្រហារបាញ់តបតគ្នាយ៉ាងសន្ធោសន្ធៅ នា​ថ្ងៃចន្ទនេះ។ ការវាយប្រហារថ្មីៗចុងក្រោយ រួមមានទាំងការដែលយន្តហោះចម្បាំងអ៊ីស្រាអែល បានហោះទៅទម្លាក់គ្រាប់បែកកម្ទេចរោងចក្រគីមីឥន្ធនៈដ៏ធំមួយកន្លែង នៅក្នុងប្រទេសអ៊ីរ៉ង់ផងដែរ។ ព្រឹត្តិការណ៍ក្តៅគគុកទាំងនេះ បានផ្ទុះឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានព្យាយាមអង្វរករ និងអំពាវនាវឱ្យអ៊ីស្រាអែលអត់ធ្មត់ កុំវាយបកសងសឹកនឹងការបាញ់មីស៊ីលរបស់ទីក្រុងតេហេរ៉ង់ ប៉ុន្តែត្រូវបានអ៊ីស្រាអែលព្រងើយកន្តើយ ហើយសង្គ្រាមក៏បានរីករាលដាលកាន់តែខ្លាំងរហូតមានការចូលរួមពីក្រុមហ៊ូធីនៅពេលនេះតែម្តង៕

ប្រែសម្រួល៖ ឈាង