បដិមាលោកតាក្រហម «ក» ទម្ងន់ជិត១០តោន ត្រូវបានដង្ហែទៅតម្កល់នៅភ្នំទឹកខួប ដើម្បីបន់ស្រន់តាមជំនឿប្រជាពលរដ្ឋ

រដ្ឋបាលស្រុកកែវសីមា បានរៀបចំពិធីដង្ហែរូបសំណាកលោកតា ក្រហម «ក» ដើម្បីយកទៅតម្កល់នៅភ្នំទឹកខួប ស្ថិតនៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ក្នុងគោលបំណងធ្វើការបន់ស្រន់សុំសុខសប្បាយ តាមជំនឿរបស់បងប្អូនប្រជាពលរដ្ឋ។ រូបសំណាកនេះក៏ជានិមិត្តរូបតំណាងឲ្យរដ្ឋបាលស្រុកកែវសីមាផងដែរ។

ពិធីដង្ហែនេះបានប្រារព្ធឡើងនៅថ្ងៃទី៦ ខែមេសា ឆ្នាំ២០២៦ ដោយមានការចូលរួមយ៉ាងអធិកអធមពីសំណាក់អាជ្ញាធរស្រុក មន្ត្រីកងកម្លាំងប្រដាប់អាវុធ ព្រះសង្ឃ លោកតា លោកយាយ និងប្រជាពលរដ្ឋយ៉ាងច្រើនកុះករ។

លោក សាន គឹមអ៊ាប អភិបាលស្រុកកែវសីមា ដែលបានចូលរួមក្នុងពិធីនេះ បានមានប្រសាសន៍ថា រូបសំណាកលោកតាត្រូវបានដាប់ឆ្លាក់ពីថ្មភ្នំសុទ្ធ នៅខេត្តកំពង់ធំ មានកម្ពស់ ៣ ម៉ែត្រ ទម្ងន់ជាង ៨ តោន ហើយបានចំណាយថវិកាទិញប្រហែល ៩,០០០ ដុល្លារអាមេរិក។

លោកបានបញ្ជាក់បន្ថែមថា៖ «នៅថ្ងៃនេះ យើងគ្រាន់តែដង្ហែរូបលោកតា ដើម្បីយកទៅតម្កល់នៅទីតាំងដែលបានគ្រោងទុកជាមុនសិនប៉ុណ្ណោះ។ ចំណែកថ្ងៃទី១០ ខែមេសា នឹងមានពិធីអភិសេកតាមប្រពៃណី ក្រោមវត្តមានអភិបាលខេត្តមណ្ឌលគិរី លោក ថង សាវុន»៕

អត្ថបទ៖ រៀម សុខហេង