លោក​ត្រាំ រិះគន់​យ៉ាងចាស់ដៃទៅលើសម្តេចប៉ាប លីអូ ពាក់ព័ន្ធ​នឹង​បញ្ហា​សង្គ្រាម​នៅ​អ៊ីរ៉ង់

ទំនាក់ទំនងរវាងសហរដ្ឋអាមេរិក និងវិហារកាតូលិកពិភពលោក បានធ្លាក់ចូលក្នុងភាពតានតឹងយ៉ាងខ្លាំង បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រើប្រាស់បណ្តាញសង្គម Truth Social ដើម្បីធ្វើការរិះគន់យ៉ាងខ្លាំងៗទៅលើសម្តេចប៉ាប លីអូ (Pope Leo)។

តាម​សារព័ត៌មាន India Today ចុះផ្សាយ​ថ្ងៃទី​១៣​ខែមេសា​ឆ្នាំ​២០២៦ លោកត្រាំ បានចោទប្រកាន់សម្តេចប៉ាបថា មានភាពទន់ជ្រាយលើបញ្ហាបទល្មើស និង​មានគោលនយោបាយការបរទេសដ៏អន់ ហើយ​ថែមទាំងចោទថា សម្តេចប៉ាបកំពុងតែមានទំនោរទៅរកក្រុមឆ្វេងនិយមជ្រុល​ទៀតផង។ ការវាយប្រហារនេះបានកើតឡើង បន្ទាប់ពីសម្តេចប៉ាបបានសម្តែងការមិនពេញចិត្តយ៉ាងខ្លាំងចំពោះសកម្មភាពយោធារបស់សហរដ្ឋអាមេរិកនៅក្នុងប្រទេសអ៊ីរ៉ង់ និងការដោះស្រាយវិបត្តិដោយប្រើអំណាចជ្រុល។

លោកត្រាំ បានអះអាងដោយមិនលាក់លៀមថា សម្តេចប៉ាប លីអូ គឺជាមេដឹកនាំខាងវិញ្ញាណដែលមិនគិតពីផលប្រយោជន៍អាមេរិក ជាពិសេសលើបញ្ហាការទប់ស្កាត់នុយក្លេអ៊ែររបស់អ៊ីរ៉ង់ និងការធ្វើប្រតិបត្តិការយោធានៅប្រទេសវ៉េណេស៊ុយអេឡា។ លោកប្រធានាធិបតីបានការពារសកម្មភាពរបស់ខ្លួនថា ជាការបំពេញតាមឆន្ទៈរបស់ប្រជាពលរដ្ឋ ដែលបានបោះឆ្នោតឲ្យលោកយ៉ាងច្រើនលើសលប់ ដើម្បីកាត់បន្ថយបទល្មើស និងពង្រឹងសេដ្ឋកិច្ចជាតិ។ អ្វីដែលគួរឲ្យ​ភ្ញាក់ផ្អើលបំផុតនោះគឺ លោកត្រាំ បានអះអាងដោយផ្ទាល់ថា ការដែលសម្ដេចប៉ាប លីអូ បានឡើងកាន់តំណែងជាសម្តេចប៉ាប គឺដោយសារតែសាសនាចក្រចង់បាននរណាម្នាក់មកទប់ទល់ជាមួយលោកតែប៉ុណ្ណោះ ហើយលោកថែមទាំងបានបញ្ជាក់ថា បើគ្មានលោកនៅក្នុងសេតវិមានទេ សម្តេចប៉ាប លីអូ ក៏មិនអាចមានវត្តមាននៅក្នុងបុរីវ៉ាទីកង់ដែរ។

ការផ្ទុះកំហឹងនេះ គឺកើតចេញពីការថ្លែងសុន្ទរកថារបស់សម្តេចប៉ាប លីអូ កាលពីថ្ងៃសៅរ៍ ដែលបានថ្កោលទោសចំពោះ «ការភាន់ច្រឡំ​ថាខ្លួនមានអំណាចលើសលប់» ដែលកំពុងជំរុញឲ្យ​មានសង្រ្គាមរវាងសហរដ្ឋអាមេរិក និងអ៊ីស្រាអែលទៅលើប្រទេសអ៊ីរ៉ង់។ ទោះបីជាសម្តេចប៉ាបមិនបានបញ្ចេញឈ្មោះលោកត្រាំ ដោយផ្ទាល់ក៏ដោយ ប៉ុន្តែខ្លឹមសារនៃសុន្ទរកថា ដែលអំពាវនាវឲ្យ​បញ្ឈប់ការបង្ហាញអំណាច និងសង្រ្គាមនោះ គឺសំដៅទៅលើរដ្ឋបាលរបស់លោកត្រាំ យ៉ាងច្បាស់។ សម្តេចប៉ាបបានអំពាវនាវឲ្យ​មានការរំងាប់ចិត្ត និងការចរចា ដើម្បីកាត់ផ្តាច់នូវ «វដ្តនៃអំពើអាក្រក់» ដែលកំពុងតែរីករាលដាល។

យ៉ាង​ណាមិញ លោកត្រាំ បានឆ្លើយតបទៅនឹងពាក្យសម្តីនេះដោយជំរុញឲ្យ​សម្តេចប៉ាប «កែខ្លួន» ហើយបោះបង់ចោលការធ្វើនយោបាយ ដើម្បីត្រឡប់មកផ្តោតលើតួនាទីជាសម្តេចប៉ាបដ៏អស្ចារ្យវិញ។ ការប៉ះទង្គិចគ្នារវាងមេដឹកនាំពិភពលោក និងមេដឹកនាំសាសនាដ៏មានឥទ្ធិពលបំផុតមួយនេះ កំពុងក្លាយជាប្រធានបទដ៏ក្ដៅគគុកមួយ ដែលឆ្លុះបញ្ចាំងពីការបែកបាក់គ្នាយ៉ាងខ្លាំង ទាំងក្នុងវិស័យនយោបាយ និងសីលធម៌ ចំពេលដែលពិភពលោកកំពុងប្រឈមនឹងវិបត្តិសង្រ្គាមដ៏គ្រោះថ្នាក់៕

ប្រែសម្រួល៖ ឈាង