ការប្រជុំរបស់ ត្រាំ នៅ Situation Room លើបញ្ហាអ៊ីរ៉ង់ បញ្ចប់ទៅ ទាំងគ្មានលទ្ធផល ច្បាស់លាស់

ជំនួបរវាងប្រមុខសេតវិមាន លោក ដូណាល់ ត្រាំ ជាមួយមន្ត្រីជាន់ខ្ពស់អាមេរិក ក្នុងបន្ទប់គ្រប់គ្រងស្ថានការណ៍ (Situation Room) បានបញ្ចប់ទៅ ទាំងដែលគ្មានជំហរច្បាស់លាស់សោះ ថាតើទីក្រុងវ៉ាស៊ីនតោន នឹងចាត់វិធានការអ្វីបន្ទាប់ឲ្យប្រាកដ។

តាមការផ្សាយរបស់ BBC, កិច្ចប្រជុំនេះធ្វើឡើង កាលពីថ្ងៃសុក្រ ទី២៩ ខែឧសភា ឆ្នាំ២០២៦ ដើម្បីធ្វើការសម្រេចចិត្តចុងក្រោយ លើកិច្ចព្រមព្រៀងជាមួយអ៊ីរ៉ង់ ប៉ុន្តែទីបំផុត វាមិនទទួលបានផ្លែផ្កានោះទេ។

យ៉ាងណា ក្រោយប្រជុំចប់ មេដឹកនាំអាមេរិក ក៏បង្ហោះសារលើបណ្តាញសង្គម Truth Social តាមទម្លាប់ ដោយបញ្ចាក់ ៣ចំណុចទៅទីក្រុងតេហេរ៉ង់។

លោកសរសេរថា៖ អ៊ីរ៉ង់ត្រូវតែយល់ព្រមថា ពួកគេនឹងមិនផលិតអាវុធ ឬគ្រាប់បែកនុយក្លេអ៊ែរជាដាច់ខាត, ច្រកសមុទ្រ Hormuz ត្រូវតែបើកភ្លាមៗ ដោយគ្មានការយកកម្រៃ (លុយពន្ធ) សម្រាប់ការធ្វើចរាចរណ៍កប៉ាល់ដឹកជញ្ជូន ហើយរាល់គ្រាប់មីនក្នុងទឹក ត្រូវតែកម្ទេចចោល។

ការប្រជុំនៅ Situation Room កើតឡើង បន្ទាប់ពីអនុប្រធានាធិបតីអាមេរិក JD Vance បញ្ជាក់ថា អាមេរិក-អ៊ីរ៉ង់ កាន់តែខិតជិតដល់កិច្ចព្រមព្រៀងសន្តិភាព មែនទែនហើយ។

ថ្លែងប្រាប់ BBC កាលពីថ្ងៃព្រហស្បតិ៍ ទី២៨ ខែឧសភា ឆ្នាំ២០២៦ លោក Vance និយាយថា ទីក្រុងវ៉ាស៊ីនតោននិងតេហេរ៉ង់ កាន់តែខិតជិតដល់កិច្ចព្រមព្រៀងសន្តិភាពមែនទែនហើយ គ្រាន់តែមិនមែនក្នុងពេលឥឡូវប៉ុណ្ណោះ ព្រោះថា នៅមានចំណុចខ្លះមិនទាន់ឯកភាពគ្នា ដែលតម្រូវឲ្យមានការដោះស្រាយបន្តិចសិន។ ភាគីទាំងពីរ នៅមិនទាន់និយាយគ្នាដាច់ស្រេចលើលក្ខខណ្ឌមួយចំនួន ហើយក្នុងនោះ ក៏មានទាំងលក្ខខណ្ឌពាក់ព័ន្ធសារធាតុអ៊ុយរ៉ាញ៉ូមផងដែរ។

យ៉ាងណា រឿងអ៊ុយរ៉ាញ៉ូមនេះ គឺជាឧបសគ្គធំមួយ ដែលធ្វើឲ្យការចរចាត្រូវជាប់គាំង ដោយកន្លងមក ទីក្រុងតេហេរ៉ង់ តែងបញ្ជាក់ជំហរយ៉ាងច្បាស់ថា ខ្លួននឹងមិនព្រមប្រគល់សារធាតុនេះ ទៅឲ្យអាមេរិក ដាច់ខាត៕

អត្ថបទ៖ សុខ សុវណ្ណ