សារមន្ទីរខេត្តកំពង់ឆ្នាំង ទទួលបានភ្ញៀវទេសចរជាង១០០០អង្គ/នាក់ រយៈពេល៣ខែឆ្នាំ២០២៦

គិតត្រឹមរយៈពេល៣ខែដំបូងដើមឆ្នាំ២០២៦នេះ គឺមានភ្ញៀវទេសចរជាតិ អន្តរជាតិ ដោយក្នុងនោះរួមមានព្រះសង្ឃ មន្រ្តីរាជការ សិស្ស និស្សិត សរុបប្រមាណជាង១០០០អង្គ/នាក់ បានមកទស្សនាសិក្សាស្វែងយល់នៅសារមន្ទីរខេត្តកំពង់ឆ្នាំង។ នេះបើយោងតាមរបាយការណ៍របស់ប្រធានការិយាល័យសារមន្ទីរ។

សូមបញ្ជាក់ថាសារមន្ទីរខេត្តកំពង់ឆ្នាំង គឺជាមណ្ឌលប្រមូលផ្តុំបុរាណវត្ថុជាច្រើន ចាប់ពីសម័យបុរេប្រវត្តិ រហូតដល់សម័យបច្ចុប្បន្ន ដែលបានមកពីបុរាណដ្ឋាន និងរមណីយដ្ឋានប្រាសាទនានា ក្នុងខេត្តកំពង់ឆ្នាំង។ សារមន្ទីរខេត្តកំពង់ឆ្នាំង ជាតួអគារមួយខ្នងលាបពណ៌ក្រហម ដែលសង់ជាទម្រង់មានកំពូលបុស្បុកលំអរក្បាច់ជ្វាដងក្តារ ដោយចម្លងតាមលំនាំតួកណ្ដាលរបស់សារមន្ទីរជាតិកម្ពុជា(ភ្នំពេញ)។

សារមន្ទីរនេះសាងសង់ឡើងចាប់តាំងពីថ្ងៃទី៣ ខែវិច្ឆិកា ឆ្នាំ២០០៧ នៅក្នុងដីឡូតិ៍របស់មន្ទីរវប្បធម៌ខេត្ត ដែលស្ថិតនៅចំពីមុខសួនបាញ់ទឹកនៃសាលាខេត្តកំពង់ឆ្នាំង ជាប់ផ្លូវជាតិលេខ៥ ក្នុងភូមិទី១ សង្កាត់ខ្សាម ក្រុងកំពង់ឆ្នាំង។ សារមន្ទីរខេត្តកំពង់ឆ្នាំង បើកទ្វារស្វាគមន៍ភ្ញៀវចូលទស្សនាសិក្សាស្វែងយល់ពីសមុច្ច័យនិងអរិយធម៌ខ្មែរ ចាប់ពីថ្ងៃចន្ទ ដល់ថ្ងៃសុក្រ៕