យោធាអាមេរិកបញ្ចេញទិន្នន័យស្តីពីគ្រោះថ្នាក់របស់ជនស៊ីវិល អំឡុងសង្គ្រាមប្រឆាំងនឹងក្រុម ISIS

នេះជាលើកដំបូងចាប់តាំងពីសម្ព័ន្ធភាពដឹកនាំដោយសហរដ្ឋអាមេរិកបានចាប់ផ្តើមធ្វើសង្គ្រាមប្រឆាំងនឹងក្រុម ISIS ក្នុងឆ្នាំ ២០១៤ យោធាសហរដ្ឋអាមេរិកបានបញ្ចេញទិន្នន័យ និងកូអរដោនេភូមិសាស្ត្រទាំងស្រុងសម្រាប់រាល់ករណីដែលត្រូវបានបញ្ជាក់ថាជាការបង្កគ្រោះថ្នាក់ និងការស្លាប់របស់ជនស៊ីវិលនៅក្នុងប្រទេសអ៊ីរ៉ាក់ និងស៊ីរីដល់អង្គការ Airwars ដែលជាអង្គការមិនរកប្រាក់ចំណេញមានមូលដ្ឋាននៅចក្រភពអង់គ្លេសដែលធ្វើការដើម្បីតាមដាន និងវាយតម្លៃសកម្មភាពយោធានៅក្នុងតំបន់ជម្លោះ ។

ទិន្នន័យដែលទទួលបានដោយអង្គការ Airwars បានអនុញ្ញាតឲ្យមានការកំណត់ទីតាំងត្រឹមត្រូវនៃឧប្បត្តិហេតុចំនួន ៣៤១ នៃគ្រោះថ្នាក់ជនស៊ីវិល និងការស្លាប់ជនស៊ីវិលប្រហែល ១,៤០០ នាក់ពីឆ្នាំ ២០១៤ ដល់ឆ្នាំ ២០១៩ ដែលត្រូវបានទទួលស្គាល់ដោយយោធាអាមេរិក ។

Airwars ប៉ាន់ប្រមាណថា ចំនួនជនស៊ីវិលសរុបដែលត្រូវបានសម្លាប់ដោយកងកម្លាំងចម្រុះដឹកនាំដោយសហរដ្ឋអាមេរិកក្នុងអំឡុងពេលសង្រ្គាមស្ថិតក្នុងចន្លោះពី ៨,៣១០ នាក់ដល់ ១៣,១៨៧ នាក់ ។

ទិន្នន័យនេះបង្ហាញពីពេលវេលា និងទីកន្លែងនៃព្រឹត្តិការណ៍ជាក់លាក់ណាមួយកើតឡើង និងសម្រួលដល់ដំណើរការនៃការកំណត់ថាតើបុគ្គលណាខ្លះដែលរងផលប៉ះពាល់ដោយការវាយប្រហារយ៉ាងជាក់លាក់ ។ ភ័ស្តុតាងថ្មីនេះអាចនឹងបើកទ្វារសម្រាប់ការសុំទោសជាផ្លូវការ និងការទូទាត់សំណងពីសហរដ្ឋអាមេរិក និងសម្ព័ន្ធមិត្តរបស់ខ្លួន ។

អតីតមេបញ្ជាការក្រុមចម្រុះលោកវរសេនីយ៍ឯក Myles Caggins បានប្រាប់អង្គការ Airwars ថា មូលហេតុចំបងនៅពីក្រោយការសម្រេចចិត្តរបស់យោធាអាមេរិកក្នុងការចេញផ្សាយទិន្នន័យនេះគឺមានតម្លាភាព ។

លោកបាននិយាយថា “យើងយករាល់ការចោទប្រកាន់ពីការស្លាប់ និងរបួសរបស់ជនស៊ីវិលដោយភាពស្មោះត្រង់ ការយកចិត្តទុកដាក់ និងភាពឧស្សាហ៍ព្យាយាម ។ យើងមើលឃើញថាការបន្ថែមទីតាំងភូមិសាស្ត្រជាការបង្ហាញនូវតម្លាភាព ហើយការប្តេជ្ញាចិត្តរបស់យើងក្នុងការធ្វើការជាមួយទីភ្នាក់ងារដូចជា អង្គការ Airwars គឺដើម្បីកំណត់អត្តសញ្ញាណឧប្បត្តិហេតុដែលបង្កគ្រោះមហន្តរាយដល់ជនស៊ីវិល ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera