សមាជិកពាក់កណ្តាល ដកខ្លួន ចេញពីក្រុមចម្រុះ ដែលជួយគ្រាប់អ៊ុយក្រែន

ជាបញ្ហាចោទដ៏ធំមួយសម្រាប់ទីក្រុងកៀវ នៅពេល ប្រធានាធិបតីសាធារណរដ្ឋឆែក ទម្លាយថា ក្រុមចម្រុះមួយដែលបង្កើតឡើងដើម្បី ជួយគ្នាផ្គត់ផ្គង់គ្រាប់ដល់ប្រទេសអ៊ុយក្រែន ពេលនេះ មានសមាជិកពាក់កណ្តាលទៅហើយ ក្នុងក្រុមនោះ ដែលបានដកខ្លួនចេញ។

ក្រុមនេះ ដែលជាគំនិតផ្តួចផ្តើម បង្កើតឡើងនៅចុងឆ្នាំ២០២៤ ដើម្បីជួយជ្រោមជ្រែងអ៊ុយក្រែន ទប់ទល់នឹងរុស្ស៊ី ដើមឡើ​យគឺមានសមាជិក ចូលរួមចំនួន ១៨ប្រទេស ប៉ុន្តែឥឡូវ បើតាមការបញ្ជាក់ពីមេដឹកនាំឆែក Petr Pavel​, មាន ៩ប្រទេសហើយ ដែលដកខ្លួនចេញ ប៉ុន្តែលោកមិនប្រាប់មូលហេតុ និងឈ្មោះសមាជិកទាំងនោះឡើយ។

ទោះបីជាយ៉ាងណាក៏ដោយ លោកអះអាងថា អាល្លឺម៉ង់ ដែលជាប្រភពផ្គត់ផ្គង់ធំ ក្នុងក្រុមចម្រុះនេះ គឺអត់បានដកខ្លួន ចេញទេ។

ក្នុងកិច្ចសម្ភាសជាមួយ Financial Times ផ្សាយកាលពីថ្ងៃអង្គារ ទី២៦ ខែឧសភា ឆ្នាំ២០២៦ លោក Pavel បានលើកឡើងពីបញ្ហានេះ ដោយបង្ហាញក្តីបារម្ភយ៉ាងខ្លាំង ព្រោះតែការដកដៃរបស់សមាជិកពាក់កណ្តាល។

លោកនិយាយថា ជាការពិត ការផ្គត់ផ្គង់គ្រាប់កាំភ្លើងធំ ឲ្យអ៊ុយក្រែន នឹងធ្លាក់ចុះ ៥០% ហើយគ្មានអ្វីត្រូវសង្ស័យឡើយ ទីក្រុងកៀវ នឹងជួបផលលំបាក ក្នុងរយៈពេលខ្លី។

សូមជម្រាបថា គិតត្រឹមពេលនេះ ឆែក បានប្រគល់គ្រាប់កាំភ្លើងធំ ជាង ៣ លានគ្រាប់ ក្រោមគំនិតផ្តួចផ្តើមនេះ ក្នុងនោះរួមមាន ១.៥ លានគ្រាប់ក្នុងឆ្នាំ២០២៤ និង ១.៨ លានគ្រាប់បន្ថែមទៀតក្នុងឆ្នាំ២០២៥។

យោងតាមក្រសួងការពារជាតិឆែក ទីក្រុងប្រាក មានកិច្ចសន្យាប្រគល់គ្រាប់រំសេវប្រហែល ១ លានគ្រាប់បន្ថែមទៀត ក្នុងឆ្នាំ២០២៦ នេះ៕

អត្ថបទ៖ សុខ សុវណ្ណ