ព័ត៌មានអន្ដរជាតិ

ចាប់ខ្លួនជនជាតិមីយ៉ាន់ម៉ា២ នាក់ពីបទគ្រោងធ្វើឃាតទូតមីយ៉ាន់ម៉ានៅ UN

បានផុស

៥ years មុន

នៅ

ថ្ងៃសៅរ៍ ៧ សីហា ២០២១

ដោយ

ជនជាតិមីយ៉ាន់ម៉ាពីរនាក់ត្រូវបានចាប់ខ្លួននៅសហរដ្ឋអាមេរិកពីបទប៉ុនប៉ងធ្វើឃាត ឬធ្វើឲ្យរបួសធ្ងន់ធ្ងរលើឯកអគ្គរដ្ឋទូតមីយ៉ាន់ម៉ាប្រចាំអង្គការសហប្រជាជាតិ។

ការិយាល័យមេធាវីសហរដ្ឋអាមេរិកនៅទីក្រុងញូវយ៉កបាននិយាយថា បុរសឈ្មោះ Phyo Hein Htut និងឈ្មោះ Ye Hein Zaw បានរៀបផែនការជួលមនុស្សឲ្យវាយប្រហារលោក Kyaw Moe Tun ដើម្បីឲ្យចុះចេញពីតំណែង។

លោក Kyaw Moe Tun ឯកអគ្គរដ្ឋទូតរបស់មីយ៉ាន់ម៉ាប្រចាំនៅអង្គការសហប្រជាជាតិបានរិះគន់យ៉ាងខ្លាំងពីមេដឹកនាំយោធារបស់មីយ៉ាន់ម៉ាដែលបានដណ្តើមអំណាចកាន់កាប់អំណាចដោយរដ្ឋប្រហារកាលពីថ្ងៃទី១ ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមក យោធាមីយ៉ាន់ម៉ាបានបណ្តេញគាត់ចេញពីតួនាទីនេះ ប៉ុន្តែលោកនៅតែបន្តតំណាងឲ្យរដ្ឋាភិបាលស៊ីវិលរបស់ប្រទេសនៅអង្គការសហប្រជាជាតិដដែល។

មនុស្សរាប់រាយនាក់មានទាំងក្មេងផងត្រូវបានសម្លាប់តាមរយៈការបង្ក្រាបដោយហិង្សាលើក្រុមតវ៉ា បន្ទាប់ពីរដ្ឋប្រហារកើតឡើង។

មេដឹកនាំជាប់ឆ្នោតលោកស្រី អ៊ុងសាន ស៊ូជី និងសមាជិកនៃគណបក្សសម្ព័ន្ធជាតិដើម្បីប្រជាធិបតេយ្យ (NLD) ជាច្រើនត្រូវបានចាប់ខ្លួន និងកំពុងជាប់ឃុំឃាំង។

មេធាវីសហរដ្ឋអាមេរិកលោក Audrey Strauss បាននិយាយក្នុងសេចក្តីប្រកាសមួយកាលពីថ្ងៃសុក្រថា ៖« Phyo Hein Htut និង Ye Hein Zaw បានរៀបចំគម្រោងធ្វើឲ្យរបួសធ្ងន់ ឬធ្វើឃាតឯកអគ្គរដ្ឋទូតមីយ៉ាន់ម៉ាប្រចាំអង្គការសហប្រជាជាតិនៅក្នុងផែនការវាយប្រហារមួយលើមន្ត្រីបរទេសម្នាក់ដែលនឹងប្រព្រឹត្តនៅលើដីអាមេរិក»។

«យើងសូមកោតសរសើរចំពោះការងារមិនគិតការនឿយហត់របស់ដៃគូផ្នែកច្បាប់របស់យើងគ្រប់កម្រិតនៃរដ្ឋាភិបាលដើម្បីធានាសុវត្ថិភាពនៃទូត និងមន្ត្រីរបស់បហរទេស»។

កាលពីដើមឆ្នាំ បុរសឈ្មោះ Zaw អាយុ២៨ឆ្នាំត្រូវបានគេជឿថាបានផ្តល់ប្រាក់៤០០០ដុល្លារអាមេរិកទៅបុរសឈ្មោះ Htut អាយុ២០ឆ្នាំសម្រាប់តម្លៃធ្វើសកម្មភាពវាយប្រហារ។ អ្នករៀបគម្រោងអាក្រក់ដែលត្រូវបានចោទប្រកាន់ត្រូវគេរំពឹងថា នឹងឡើងតុលាការនៅទីក្រុងញូវយ៉កនៅថ្ងៃសុក្រក្រោយ៕

ប្រែសម្រួល៖ វីរបុត្រ
ប្រភព៖ BBC

Related Topics:អង្គការសហប្រជាជាតិ (UN)