ព័ត៌មានអន្ដរជាតិ

ប្រធានាធិបតីអាល្លឺម៉ង់ ជំរុញកំណែទម្រង់អង្គការសហប្រជាជាតិ ស្របពេលច្បាប់អន្តរជាតិគ្មានប្រសិទ្ធភាព

បានផុស

១២ វិនាទី មុន

នៅ

ថ្ងៃអង្គារ ៣០ មិថុនា ២០២៦

ដោយ

ខណៈការឈ្លានពានដោយប្រទេសមានអំណាចលើប្រទេសទន់ខ្សោយកើតឡើងជាបន្តបន្ទាប់ ហើយពុំមានដំណោះស្រាយសមស្របឆ្លើយតបទៅនឹងទង្វើអមនុស្សធម៌ទាំងនោះ កាលពីថ្ងៃចន្ទ ប្រធានាធិបតីអាល្លឺម៉ង់ លោក Frank-Walter Steinmeier បានព្រមានថា សណ្តាប់ធ្នាប់ពិភពលោកផ្អែកលើច្បាប់អន្តរជាតិ កំពុងប្រឈមនឹងការគំរាមកំហែងមិនធ្លាប់មានពីមុនមក ដោយជំរុញឱ្យមានការប្តេជ្ញាចិត្តជាសកល ចំពោះកិច្ចសហប្រតិបត្តិការនិងកំណែទម្រង់លើអង្គការសហប្រជាជាតិ(UN) ឱ្យកាន់តែរឹងមាំឡើងវិញ។

ប្រធានាធិបតីអាល្លឺម៉ង់ លោក Frank-Walter Steinmeier ។ រូបភាព៖ AA

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកសន្និសីទស្តីពីនិរន្តរភាពក្នុងទីក្រុង Hamburg ប្រធានាធិបតីអាល្លឺម៉ង់ បានលើកឡើងថា ពិភពលោកកំពុងចូលដល់ដំណាក់កាលមួយដែលបទដ្ឋានអន្តរជាតិមានជាយូរមកហើយ កំពុងស្ថិតក្រោមការគំរាមកំហែងកាន់តែខ្លាំងឡើង។

លោក Steinmeier ថា៖ « យើងរស់នៅក្នុងសម័យកាលមួយក្រោមច្បាប់អន្តរជាតិដែលបានណែនាំយើងអស់រយៈពេលជាច្រើនទសវត្សរ៍មកហើយ។ ឥលូវនេះច្បាប់នេះកំពុងស្ថិតនៅក្រោមការគំរាមកំហែង ដោយរដ្ឋមានអំណាចមួយចំនួន ពួកគេលែងទទួលស្គាល់ច្បាប់ទាំងនេះ ហើយបំពានយ៉ាងច្បាស់ ពេលពួកគេ[មេដឹកនាំ] ឈរក្នុងផ្លូវនៃផលប្រយោជន៍អំណាចផ្ទាល់ខ្លួន»។ នេះបើយោងតាមកាសែត Suddeutsche Zeitung ប្រចាំថ្ងៃរបស់អាល្លឺម៉ង់ ផ្សាយនៅថ្ងៃទី៣០ ខែមិថុនា ឆ្នាំ២០២៦ ។

លោកបន្ថែមទៀតថា៖ « នយោបាយពិភពលោកកំពុងត្រូវបានបង្កើតឡើងដោយនយោបាយអំណាចឆៅ ការគិតបែបសូន្យបូក និងការប្រឈមមុខដាក់គ្នាកាន់តែខ្លាំងឡើង ជំនួសដោយមូលដ្ឋានគ្រឹះនៃប្រព័ន្ធអន្តរជាតិសហប្រតិបត្តិការ»។

លោក Steinmeier សង្កត់ធ្ងន់ថា ស្មារតីនៃភាពឃោរឃៅ និងគ្មានមេត្តា កំពុងបក់បោកពាសពេញនយោបាយអន្តរជាតិ។

លោក បន្ត ថា៖ « ការដកខ្លួនចេញពីអង្គការសហប្រជាជាតិនឹងក្លាយជាការមើលឃើញដ៏ខ្លី និងមានគ្រោះថ្នាក់ដល់ជីវិត។ យ៉ាងណាក៏ដោយ អង្គការសហប្រជាជាតិត្រូវតែផ្លាស់ប្តូរ ត្រូវតែមានប្រសិទ្ធភាព និងមានប្រសិទ្ធភាពជាងមុន ហើយត្រូវតែបញ្ជាក់ថាខ្លួនអាចផ្តល់លទ្ធផលល្អជាងអ្នកខ្លាំងខាងការស្រមើស្រមៃ លើអំណាចទាំងអស់របស់មេដឹកនាំទាំងនោះ»៕

សម្រួល៖ ណឺ មិនា