មេបញ្ជាការក្រុមតាលីបង់ ជាអ្នកទោសដែលអាមេរិក ដោះលែងពីគុកយោធា Guantanamo

មេបញ្ជាការក្រុមតាលីបង់ ដែលគេឃើញនៅក្នុងសុន្ទរកថាជ័យជម្នះ ពីខាងក្នុងវិមានប្រធានាធិបតីនៅទីក្រុងកាប៊ុល គឺត្រូវបានដោះលែងពីពន្ធនាគារ Guantanamo បន្ទាប់ពីសន្យាដល់អាជ្ញាធរថា គាត់នឹងវិលត្រឡប់ទៅប្រទេសអាហ្វហ្គានីស្ថានវិញ ដើម្បីមើលថែឪពុករបស់ខ្លួន ដែលកំពុងមានជំងឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនជ្រុលនិយមរូបនេះ ស្ថិតក្នុងចំណោមក្រុមអ្នកប្រយុទ្ធកាន់កាំភ្លើង ដែលបានធ្វើសន្និសីទសារព័ត៌មានអបអរសាទរកាលពីថ្ងៃអាទិត្យ ប៉ុន្មានម៉ោងបន្ទាប់ពីលោកប្រធានាធិបតី Ashraf Ghani ភៀសខ្លួនចេញពីប្រទេស ចំពេលមានភាពវឹកវរ។

ក្រុមអ្នកជំនាញបានកំណត់អត្តសញ្ញាណគាត់ថា មានឈ្មោះ Gholam Ruhani ដែលជាអតីតអ្នកជាប់ឃុំនៅ Gitmo។ គាត់ត្រូវបានមន្រ្តីអាមេរិកចោទប្រកាន់ថា ជាភ្នាក់ងារសន្តិសុខយូរអង្វែងរបស់ក្រសួងស៊ើបការណ៍សម្ងាត់ក្រុមតាលីបង់ ហើយមានទំនាក់ទំនងគ្រួសារជិតស្និទ្ធ ជាមួយឥស្សរជនជាន់ខ្ពស់របស់ខ្លួន។

លោក Ruhani បានបង្ហាញប្រាប់ Al Jazeera កាលពីថ្ងៃអាទិត្យថា គាត់បានជាប់គុកអស់រយៈពេល ៧ ឆ្នាំនៅគុកយោធាមានមូលដ្ឋានក្នុងប្រទេសគុយបា ដែលគុកនេះត្រូវបានបង្កើតឡើងកាលពីជិតពីរទសវត្សរ៍មុន ដើម្បីដាក់ភេរវករ គ្រោះថ្នាក់បំផុតនៅលើពិភពលោក។

ឯកសាររបស់ក្រសួងការបរទេសអាមេរិក ដែលមើលឃើញដោយ DailyMail.com បានបញ្ជាក់ថា លោក Ruhani ដែលជាអ្នកជាប់ឃុំលេខ ៣ គឺជាអ្នកទោសម្នាក់ក្នុងចំណោមអ្នកទោសដំបូងបំផុតនៅឈូងសមុទ្រ Guantanamo ប៉ុន្តែបានកត់ត្រាថា គាត់បានចំណាយពេល ៥ ឆ្នាំនៅទីនោះចាប់ពីឆ្នាំ ២០០២ ដល់ឆ្នាំ ២០០៧។

ឯកសារទាំងនោះក៏បានបង្ហាញផងដែរថា លោក Ruhani បានធានានូវសេរីភាព ដោយប្រាប់ក្រុមប្រឹក្សាត្រួតពិនិត្យរដ្ឋបាលថា គាត់គឺជាអ្នកលក់ដូរធម្មតា ដែលបានជួយជនជាតិអាមេរិក។

ថ្វីបើត្រូវបានវាយតម្លៃថាជាការគំរាមកំហែងសន្តិសុខកម្រិតមធ្យមក៏ដោយ ក៏ឯកសារមួយនៅខែមីនាឆ្នាំ ២០០៧ និយាយថា លោក Ruhani បានបន្តទទូចថា គាត់មិនដែលឮពីក្រុមអាល់កៃដាទេ មុនថ្ងៃទី១១ខែកញ្ញា ហើយគ្រាន់តែចូលរួមជាមួយក្រុម តាលីបង់ ដើម្បីបានរស់ប៉ុណ្ណោះ។

គាត់អះអាងថា “បំណងតែមួយគត់” របស់គាត់គឺចង់វិលត្រឡប់ទៅអាហ្វហ្គានីស្ថានវិញ និងជួយឪពុករបស់គាត់ដែលឈឺ ហើយបើកហាងលក់ឧបករណ៍ផ្ទះបាយនៅទីក្រុង កាប៊ុល៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ស្រ្តីអាហ្វហ្គានីស្ថាន ប្រឈមគ្រោះថ្នាក់បំផុត ក្រោមការគ្រប់គ្រងរបស់ក្រុមតាលីបង់