សមាគមអ្នកចិញ្ចឹមសត្វកម្ពុជា ស្នើសុំកុំអនុញ្ញាត ឲ្យក្រុមហ៊ុនផ្សេងទៀត នាំចូលសត្វជ្រូកមកកម្ពុជា

លោក ស៊្រុន ពៅ ប្រធានសមាគមអ្ន​កចិញ្ចឹមសត្វកម្ពុជា បានថ្លែងថា​ នៅថ្ងៃទី២៣ ខែសីហា ឆ្នាំ២០២១ ពិតជា​មាន​កិច្ចប្រជុំរវាងក្រសួងពាក់ព័ន្ធ ជាមួយសមាគមអ្នកចិញ្ចឹមសត្វកម្ពុជា ដើម្បីលើកឡើងពីបញ្ហាប្រឈម និងសំណូមពរ ចំពោះការចិញ្ចឹមសត្វជ្រូក នៅ​ក្នុង​ស្រុក។

លោក ស្រ៊ុន ពៅ បានថ្លែងប្រាប់អ្នកសារព័ត៌មានកម្ពុជាថ្មីថា កិច្ចប្រជុំនេះ មានការចូលរួម ពីតំណាងមន្ត្រីសេដ្ឋកិច្ច និង​ហិរញ្ញវត្ថុ, ក្រសួង​ពា​ណិ​ជ្ជកម្ម, ក្រសួងកសិកម្ម រុក្ខាប្រមាញ់ និងនេសាទ, និងតំណាងសមាគមអ្នកចិញ្ចឹម​ស​ត្វកម្ពុជា ហើយចំពោះលទ្ធផលនោះ គឺមិនទាន់មានការសម្រេច​ បែបណានៅឡើយទេ ដោយត្រូវរង់ចាំនៅ​ថ្ងៃ​ស្អែក​។

យ៉ាងណាក៏ដោយលោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា បានបង្ហើបឲ្យដឹងថា អ្វីដែលសមាគម​រប​ស់​​លោក ដែលធ្វើការងារជាមួយប្រជាពលរដ្ឋ អ្នកចិញ្ចឹមសត្វជ្រូកនៅក្នុងស្រុក ចង់ស្នើសុំទៅក្រសួងពាក់ព័ន្ធនោះ រួមមាន៖ ស្នើសុំកុំឲ្យមាន ការលក់ក្នុងតំលៃថ្លៃដើម នៃការចិញ្ចឹមក្នុងស្រុក សម្រាប់សត្វជ្រូកនាំចូល, ស្នើសុំកុំឲ្យមាន​ការ អនុ​ញ្ញាតឲ្យក្រុមហ៊ុនផ្សេងទៀត នាំចូលសត្វជ្រូកបន្ថែមទៀត, និងស្នើសុំឲ្យឈប់នាំចូលសត្វជ្រូកតែម្ដង នៅពេ​ល​​ការ​ផ្គត់ផ្គង់ ក្នុងស្រុកគ្រប់ចំនួនហើយនោះ។

លោកបានថ្លែងយ៉ាងដូច្នេះថា «សំខាន់បំផុត ស្នើកុំឲ្យលក់ក្រោមតំលៃដើមផលិត ការនាំចូល កុំឲ្យលក់ក្រោមថ្លៃដើម​ផលិត អាហ្នឹងកត្តាសំខាន់ របស់សមាគម ហើយកត្តាទី២ទៀតហ្នឹង ក៏ខ្ញុំស្នើអត់ឲ្យមានការនាំចូល ទាំង៤ក្រុមហ៊ុន​ហ្នឹង​ដែរ ដើម្បីកសិករយើងមិនគួរ អនុញ្ញាតឲ្យការនាំចូល ធ្វើឲ្យលំបាកកសិករនៅក្នុងប្រទេសទេ ដោយសាររាជ​រដ្ឋា​ភិបាល ក៏ដូចជាក្រសួងបានជំរុញ វិស័យចិញ្ចឹមសត្វយើងនេះ ឲ្យវាកើនឡើង ហើយឥឡូវកំពុងតែរីកដុះដាល ហើ​យបើយើងក្ដិចចោលទៀត អាហ្នឹងចប់ហើយណា៎…បាទអាហ្នឹងស្នើឲ្យកាត់បន្ថយ បើសិនជាយើងគ្រប់ហើយ លែង​ឲ្យ​នាំ អាហ្នឹងសំណូមពររបស់សមាគម»។

គួររំលឹកថា កាលពីថ្ងៃទី១២ ខែសីហាកន្លងទៅនេះ មានក្រុមហ៊ុននាំចូលជ្រូករស់ ចំនួន៤ បានសរសេរលិខិតស្នើសុំទៅរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ដើម្បីឲ្យការដាក់ដេញថ្លៃនាំចូលជ្រូករស់ សម្រាប់យកមកផ្គត់ផ្គង់ តម្រូវការខ្វះខាតនៅកម្ពុជា។

ក្រុមហ៊ុនទាំង៤នេះ បានលើកឡើងថា កន្លងមកក្រសួងកសិកម្ម រុក្ខាប្រមាញ់ និងនេសាទ បានចេញគោល ការណ៍ អនុញ្ញាតឲ្យនាំចូលសត្វជ្រូករស់ សម្រាប់យកមកបំពេញសេចក្តីត្រូវការ នៅលើទីផ្សារក្នុងស្រុក គឺអនុញ្ញាតឲ្យតែបក្ខពួកខ្លួន មិនមានតម្លាភាព ធ្វើឲ្យឈ្មួញដែលនាំចូលមាន លក្ខណៈផ្តាច់មុខគ្រប់គ្រងទីផ្សារ និងធ្វើឲ្យឈ្មួញដំឡើង​តំលៃសាច់ជ្រូក លើទីផ្សារឡើងថ្លៃខ្ពស់ស្រេចតែចិត្តជាដើម។

ប៉ុ​ន្តែការលើកឡើងនេះ ត្រូវបានលោក វេង សាខុន រដ្ឋមន្ត្រីក្រសួង ​កសិកម្ម​រុក្ខាប្រមាញ់​ និង​នេសាទ ច្រាល ចោល និងបានបំភ្លឺវិញថា ចំពោះ​សត្វ​ជ្រូកនេះ យើង​មិនអាចចេះតែ​ដេញថ្លៃ ​ដូច​​ខោអាវ ជជុះ ឬឡាន​អី​បាន ទេ​ ពីព្រោះ​មានច្បាប់ ស្តីពី ​សុខភាព​សត្វ និង​ផលិតកម្ម​សត្វ ជាពិសេស​រោគ​ឆ្លង​សត្វ គឺ​យើង​មិនមែន​ចេះតែ​អនុញ្ញាត​ទេ ​ទាល់តែ​មានការបញ្ជាក់ផ្តល់ នៅ​វិ​ញ្ញា​ប័ន​ប​ត្រ​បញ្ជាក់​សុខភាព​សត្វ ​មុននឹងឆ្លង​ពី​ខេត្ត​មួយ​មក​ខេត្តមួយ ​ឆ្លង​ពី​ប្រទេ​សមួយ​មកប្រទេសមួយ គឺ​គេ​មាន​វិន័យរបស់គេ មាន​ក្រឹត្យក្រម​ច្បាប់​របស់គេ ទាំង​ច្បាប់​ក្នុងប្រទេស ក្នុង​តំបន់ និង​ពិភពលោក ដែលមាន​អង្គការសុខភាព ​សត្វពិភពលោក​ គេ​តាមដាន​មើល​យើង ទាំងអស់គ្នា​ស្តីអំពី ​ការអនុវត្ត​ច្បាប់​ស្តីពី ​ការ​ចរាចរណ៍​សត្វ​មិន មែន​នឹកឃើញ ស្រេច​តែ​វា​ថា​ដេញថ្លៃ​នេះ ​ដេញថ្លៃ​នោះ ​អត់​បានទេ។ លោកបញ្ជាក់ថា ​កម្រិត​កំណត់ ​នៃ​ការចែក​ចាយ​យើង​មិនចេះ តែ​យក​សត្វ​ឈឺ​មក​ចែកចាយ​នៅ​កម្ពុជា​ បាន​នោះទេនេះ ​ជាវិធានការ​ច្បាប់​ចំពោះមុខ ដែល​យើង​កំពុង​តែមាន​។

សមាគមអ្នកចិញ្ចឹមសត្វកម្ពុជា បានអះអាងថា ការចិញ្ចឹមសត្វជ្រូកនៅក្នុងស្រុក មានការកើនឡើង នៅក្នុងបរិ បទ​នៃ​ការ​រាតត្បាត​ជំងឺកូវីដ-១៩នេះ តែតម្រូវការសាច់ជ្រូក មានការធ្លាក់ចុះទៅវិញ ហើយខេត្តដែលមានពល រដ្ឋ ចិញ្ចឹមច្រើន​ជាង​គេនោះ គឺ​ខេត្ត​កំពង់ស្ពឺ។ បើតាមសមាគមអ្ន​កចិញ្ចឹមសត្វកម្ពុជា ការនាំចូលជ្រូកពី​ក្រៅប្រទេស ដូចជា៖ ថៃ​ និងវៀតណាជាដើម គឺមា​នការថយចុះ​ជាច្រើន ដែលពីមុននាំចូល ប្រហែល ៦៧០០ ក្បាលក្នុងថ្ងៃ តែសព្វថ្ងៃនេះ នាំចូលប្រហែល ១២០០ក្បាលក្នុងមួយថ្ងៃប៉ុណ្ណោះ។

ជាមួយគ្នានេះ សមាគមសង្ឃឹមថា ​ក្នុង​ពេលឆាប់ៗខាងមុខនេះ​ ការនាំចូល នឹងត្រូវកាត់បន្ថយបន្ថែមទៀត​ ​ ដើម្បីផ្តល់ឱកាសផ្គត់ផ្គង់នេះ ដល់កសិករក្នុងស្រុកវិញ​។ រីឯអ្នកដែលធ្លាប់ នាំជ្រូកចូលពីក្រៅប្រទេស នឹងត្រូវប្តូរមកទិញជ្រូកក្នុងស្រុកវិញ ​ដើម្បីយកទៅផ្គត់ផ្គង់ទីផ្សារ ដែលនឹងធ្វើឲ្យសេដ្ឋកិច្ចជាតិ កាន់តែរីកចំ​រើនថែមទៀត៕ (ដោយ)៖ ឃួន សុភ័ក្រ