តំបន់ជុំវិញវត្តភ្នំ មិនរងការលិចទឹកទៀតទេ ក្រោយដាក់ដំណើរការលូខ្នាតធំ និងស្ថានីយ៍បូមទឹកថ្មី

មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ក្នុងរយៈពេល១៨ថ្ងៃ ដែលមានភ្លៀងធ្លាក់ មន្ទីរ​ពិនិ​ត្យ​ឃើញថា ក្រោយពីដាក់ឲ្យ​ដំណើរការលូខ្នាតធំ អាងក្រោមដី ម៉ាស៊ីនកាយសំរាមស្វ័យប្រវត្តិ និងស្ថានីយ៍បូមទឹកថ្មីវត្តភ្នំ តំបន់ដែលធ្លាប់លិចទឹកធ្ងន់ធ្ងរ នៅជុំវិញវត្តភ្នំ ផ្លូវលេខ៤៧ ផ្លូវលេខ៩០ ផ្លូវលេខ៩២ និងផ្សារកណ្តាល ក្នុងខណ្ឌ​ដូនពេញ មិនរងការលិចទឹកទៀតទេ។

មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងនៅលើទំព័រហ្វេសប៊ុក កាលពីយប់ថ្ងៃទី១ ខែកញ្ញាថា ទន្ទឹងនឹងនេះ ការដ្ឋានក៏បានដាក់ ឲ្យដំណើរការលូខ្នាតធំ បណ្តោះអាសន្ន នៅភូមិសាស្ត្រ សង្កាត់ បឹងកក់ទី២ ខណ្ឌទួលគោក ក្នុងរយៈពេល៣ថ្ងៃមកនេះ ពិនិត្យឃើញថា ស្តុបផ្សារមាន់អាំង ផ្លូវលេខ៥៩២ មុខវិទ្យាល័យឥន្ទ្រទេវី មានភាពល្អប្រសើរ មិនរងការលិចទឹកទៀតដែរ។ យ៉ាងណាក៏ដោយ មន្ទីរសាធារណការ និងដឹកជញ្ជូនរាជធានីភ្នំពេញ បានអំពាវនាវថា «សូមចូលរួម សំអាតសំរាម កកស្ទះមុខអណ្តូងលូ នៅមុខផ្ទះរៀងៗខ្លួន!»៕