ប្រាប់ប្រពន្ធទៅឆក់ត្រីធ្វើម្ហូប តែបាត់ខ្លួន និងទើបប្រទះឃើញ​សពអណ្ដែតទឹក

សពបុរសម្នាក់ ត្រូវបានប្រទះឃើញអណ្ដែតទឹកអូរ កាលពីវេលាម៉ោង៦ និង៣០នាទីព្រឹក ថ្ងៃទី២៧ខែវិច្ឆិកា ឆ្នាំ២០២០ នៅចំណុចអូរហែម ស្ថិតក្នុងភូមិព្រៃភ្ងាស ឃុំដូនបា ស្រុកគាស់ក្រឡ ខេត្តបាត់ដំបង។

សមត្ថកិច្ចឲ្យដឹងថា សពមានឈ្មោះ ហឿន សោម អាយុ២៨ឆ្នាំ រស់នៅភូមិព្រៃភ្ងាស ឃុំដូនបា ស្រុកគាស់ក្រឡ ខេត្តបាត់ដំបង មុខរបរកសិករ។

តាមការបំភ្លឺរបស់ឈ្មោះ ម៉េង នី អាយុ៣០ឆ្នាំ ត្រូវជាប្រពន្ធរបស់សព បានប្រាប់សមត្ថកិច្ចថា កាលពីនៅវេលាម៉ោង២២​យប់ នាថ្ងៃទី២៥ ខែវិច្ឆិកា ឆ្នាំ២០២០ ខ្លួនបានឃើញប្ដីរបស់ខ្លួនយកម៉ូទ័រឆក់ត្រីដើរចេញពីផ្ទះ ហើយខ្លួនក៏សួរទៅឆក់ត្រីនៅឯណា តែប្ដីខ្លួនឆ្លើយប្រាប់វិញថា ទៅឆក់ត្រីនៅឯអូរខាងជើងភូមិ ហើយក៏បាត់ខ្លួនរហូតដល់ថ្ងៃទី២៦ ខែវិច្ឆកា ឆ្នាំ​២០២០ មិនឃើញប្ដីត្រឡប់មកផ្ទះវិញទេ ទើបខ្លួនបានប្រាប់បងប្អូនឲ្យជួយដើររកតែរកមិនឃើញ។លុះដល់ថ្ងៃទី២៧ ខែវិច្ឆិកា ឆ្នាំ២០២០វេលាម៉ោង៦ និង៤០នាទីព្រឹក ខ្លួនក៏បានដំណឹងពីបងថ្លៃថា បានរកឃើញសពប្តីខ្លួននៅចំណុច​អូរហែម ។

ក្រោយសមត្ថកិច្ចបានពិនិត្យរួច សមត្ថកិច្ចសន្និដ្ឋានថា សពជនរងគ្រោះ ពិជាស្លាប់ដោយសារឧបករណ៍ម៉ូទ័រឆក់ត្រីពិតប្រាកដមែន៕

អត្ថបទ ៖ សៅ សារិទ្ធ