រថភ្លើង​បុក​ឡានក្រុង​នៅ​ម៉ិ​ក​ស៊ិ​ក ស្លាប់​និង​របួស​ជាង៧០​នាក់​

យោងតាមការចេញផ្សាយរបស់ទីភ្នាក់ងារព័ត៌ Reuters មនុស្ស ១០ នាក់បានស្លាប់ និង ៦១ នាក់រងរបួសកាលពីថ្ងៃចន្ទ ក្នុងហេតុការណ៍រថភ្លើងដឹកទំនិញបុកឡានក្រុងដឹកអ្នកដំណើរពីរជាន់មួយគ្រឿងនៅក្រុង Atlacomulco ភាគពាយព្យប្រទេសម៉ិកស៊ិក។

អាជ្ញាធរ​ម៉ិ​ក​ស៊ិ​កបាន​និយាយ​ថា រថភ្លើង​បាន​បុក​រថយន្តក្រុង​ ខណៈពេលរថយន្តឆ្លង​ផ្លូវ​រថភ្លើង​ ដែលធ្វើឲ្យរថយន្តដាច់ជាពីរនិងធ្លាក់ចេញពីផ្លូវ​។ ភ្លាមៗនោះមានស្ត្រី​៧​នាក់និងមនុស្ស​ប្រុស​៣​នាក់​បាន​ស្លាប់​នៅនឹង​កន្លែង​កើតហេតុ ។

ឧបទ្ទវហេតុនេះកើតឡើងចំពេលមានការកើនឡើងនៃការប៉ះទង្គិចគ្នារវាងរថភ្លើង និងរថយន្តនៅក្នុងប្រទេសម៉ិកស៊ិក ដែលបានកើនឡើងពី ៦៧៣ ក្នុងឆ្នាំ ២០២១ រហូតដល់ ៧៨៤ ក្នុងឆ្នាំ ២០២៤ ខណៈគ្រោះថ្នាក់ភាគច្រើនដោយសារអ្នកបើកបរមិនអើពើនឹងច្បាប់ចរាចរណ៍នៅពេលផ្លូវកាត់ផ្លូវដែក។

ជាការឆ្លើយតបប្រធានាធិបតីម៉ិកស៉ិកលោក Claudia Sheinbaum បានសន្យាថានឹងផ្តល់ប្រាក់ចំនួន ៨ ពាន់លានដុល្លារ ដើម្បីសាងសង់ខ្សែរថភ្លើងថ្មីចម្ងាយជិត២៩០០គីឡូម៉ែត្រ ដែលបង្កើនចម្ងាយទ្វេដងនៃខ្សែរថភ្លើងសាងសង់ដោយប្រធានាធិបតីមុនលោក Andres Manuel Lopez Obrador។ ទោះរដ្ឋាភិបាលអះអាងថា ផ្លូវដែកនឹងជំរុញការងារ ពាណិជ្ជកម្ម និងទេសចរណ៍ តែក្តីបារម្ភអំពីសុវត្ថិភាពនៅតែមានកម្រិតខ្ពស់៕

អត្ថបទ៖ ប៊ុន សុភាព