ឌូបៃ វ៉ាដាច់ ប៉ូឡូញ បំបែកឯកទគ្គកម្មអាងមុជទឹកជ្រៅជាងគេលើលោក

ក្រៅពីមានអគារខ្ពស់ជាងគេលើលោក ពេលនេះ ឌូបៃ បានបំបែកឯកទគ្គកម្មថ្មីមួយទៀតដែលមានអាងមុជទឹកជ្រៅជាងគេ ក្នុងកំណត់ត្រាពិភពលោក Guinness World Record ឆ្នាំ២០២១។

អាងនេះមានឈ្មោះថា Deep Dive Dubai ដែលស្ថិតនៅទីក្រុង ឌូបៃ ប្រទេសអារ៉ាប់រួម ដោយវាមានជម្រៅជិត ៧០ម៉ែត្រ (២០០ ហ្វីត) និងអាចផ្ទុកទឹករហូតដល់ ១៤លានលីត្រ ជាចំណុះដ៏ច្រើនមិនធ្លាប់មានពីមុនមក។

Deep Dive Dubai បានបើកដំណើរការ កាលពីថ្ងៃទី ៧ ខែកក្កដា ឆ្នាំ២០២១ ក្រោយសម្ភោធបាន ១០ថ្ងៃប៉ុណ្ណោះ វាត្រូវបានចុះបញ្ជីរជាអាងមុជទឹកជ្រៅបំផុតរបស់ពិភពលោកដោយកំណត់ត្រាពិភពលោកហ្គីនណេស វ៉ាដាច់អាងជ្រៅបំផុតនៅប្រទេសប៉ូឡូញ (ជម្រៅ៤០ម៉េត្រ)​។

អាងជ្រៅជាងគេនេះ បំពាក់ដោយ​បច្ចេកវិទ្យាទំនើបៗរួមមាន ចម្រោះទឹកចេញ-ចូល អំពូលភ្លើងចំនួន ១៥៦ គ្រាប់ សីតុណ្ហភាព ៣០ អង្សារសេ និងមានបំពាក់ការមេរ៉ាបច្ចេកវិទ្យាខ្ពស់ដើម្បីការពារសុវត្ថិភាពអ្នកមុជទឹក។

វាមិនមែនត្រឹមជាអាងដែលគ្រាន់តែមុជទឹកលេងប៉ុណ្ណោះទេ Deep Dive Dubai មានបម្រើសេវាកម្មដូចជា តាំងគំនូររាប់រយផ្ទាំង រូបចម្លាក់ សំណល់អគារបាក់បែករបស់ទីក្រុងបុរាណ មានអាគារអាផាតមិន បណ្ណាល័យ ហាងកាហ្វេ ទូលេងហ្គេម និងអ្វីផ្សេងជាច្រើនទៀត។

ដើម្បីចូលទស្សនា និងមុជទឹកកម្សាន្តនៅអាង Deep Dive Dubai ភ្ញៀវអាចកក់តាមគេហទំព័ររបស់ក្រុមហ៊ុន ដែលមានតម្លៃចាប់ពី ៨០០ ឌឺរ៉ាមអារ៉ាប់រួម (២១៨ ដុល្លារ) ឡើងទៅ៕

ប្រែសម្រួល៖ សន្យា

ប្រភព៖ CNBC

ចុចអាន៖ ធ្លាប់ដឹងអត់! ​រូបសំណាកព្រះពុទ្ធស្ពាន់ធំជាងគេលើលោកសង់នៅឯណា?

ចុចអាន៖ ដឹងអត់? ​អគារ​ថ្លៃ​បំ​​ផុត​លើ​លោក​ទាំង​ ១០ មាននៅប្រទេសណាខ្លះ?