លេចមុខ​តារា​កូនភ្លោះ ប៉ះគ្នា​ជាមួយ ព្រាប សុវត្ថិ​ ក្នុងរឿងអប់រំខ្លី​ ស្ដីពីសុវត្ថិភាពចរាចរណ៍​

ខ្សែភាពយន្ដអប់រំខ្លី ស្ដីពីសុវត្ថិភាពចរាចរណ៍ផ្លូវគោ គឺរឿង ព្រោះតែអូន កំពុងតែទទួលបានការគាំទ្រ និងចាប់អារម្មណ៍ខ្លាំងពីមហាជនពិសេសអ្នកប្រើប្រាស់បណ្តាញសង្គមហ្វេសប៊ុក ឬTik Tokជាដើម។

ជាការកត់សម្គាល់ខ្សែភាពយន្តខ្លីដែលអប់រំ ស្ដីពីសុវត្ថិភាពចរាចរណ៍ នេះបន្ទាប់ពីត្រូវបានបញ្ចេញផ្សព្វផ្សាយជាផ្លូវការមិនទាន់បានប៉ុន្មានផងស្រាប់តែទទួលបានការគាំទ្រ និងមានការចែករំលែកយ៉ាងព្រោងព្រាតនៅលើបណ្តាញសង្គម​ខណ:ចំនួនអ្នក ទស្សនាក៏កើតឡើងជាបន្តបន្ទាប់ផងដែរ។

ខ្សែភាពយន្តរឿង ព្រោះតែអូន គេឃើញមានការចូលរួមសម្តែងដោយតារាល្បីៗ របស់ខ្មែរដូចជា កំពូលតារាចម្រៀងលោក ព្រាប សុវត្ថិ តារាកូនភ្លោះលោក ស៊ិន សុភ័គ្រ និងលោក ស៊ិន សុភា លោក ទេព រិន្ទដារ៉ូ លោក ជា សំណាង និងតារាប្រុស-ស្រីមួយចំនួនទៀត។

តារាកូនភ្លោះលោក ស៊ិន សុភ័គ្រ ដែលមានវត្តមានសម្តែងនៅក្នុងភាពយន្តអប់រំខាងលើបានឲ្យដឹងថា លោកពិតជាមានអារម្មណ៍សប្បាយរីករាយដែលបានចូលរួមថតសម្តែងរឿអប់រំខ្លី ស្ដីពីសុវត្ថិភាពចរាចរណ៍ ព្រោះតែអូន ជាមួយកំពូលតារាចម្រៀងលោក ព្រាប សុវត្ថិ និងតារាល្បីៗមួយចំនួនទៀត។

ជាមួយគ្នានេះក្នុងនាមលោក ស៊ិន សុភ័គ្រ ដែលជា តារាចម្រៀងផង និងមន្រ្តីនគបាលចរាចរណ៍មួយរូបផងនោះក៏បានអំពាវនាវដល់មហាជន និងប្រជាពលរដ្ឋខ្មែរនៅទូទាំងប្រទេសត្រូវចូលរួមគោរពច្បាប់ចរាចរណ៍ឲ្យបានគ្រប់គ្រប់គ្នា។

ដោយហេតុថា បើបើកបរមិនគោរពច្បាប់ចរាចរណ៍ផ្លូវគោក និងមិនមានការយោគយល់អធ្យាស្រ័យ នៅលើដងផ្លូវអាចបំផ្លាញអាយុជីវិតខ្លួនឯង និងជីវិតអ្នកដទៃ។ គោរពច្បាប់ចរាចរណ៍ផ្លូវគោកគឺផ្តល់សេចក្តីថ្លៃថ្នូដល់ខ្លួនឯង និងលើកកម្ពស់កិត្យានុភាពជាតិ៕

អត្ថបទ៖ ចាន់រ៉ា