រថយន្តកុងតឺន័របុករបាំងថ្មពុះចែកទ្រូងផ្លូវទាំងព្រឹកនៅមុខផ្សារហេងលី

បុរសម្នាក់បើករថយន្តកុងតឺន័រក្នុងល្បឿនលឿនខ្វះការប្រុងប្រយ័ត្នក៏ជ្រុលចង្កូតទៅបុករបាំងថ្មពុះចែកទ្រូងផ្លូវបាក់អស់ជាច្រើនកង់ រងការខូចខាត ចំណែកឯរថយន្តរងការខូចខាតមួយកំណាត់មុខ តែមិនគ្រោះថ្នាក់ដល់មនុស្សនោះទេ។

ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង៤និង៥០នាទីព្រឹក ថ្ងៃទី២២ ខែមេសា ឆ្នាំ ២០២២ ស្ថិតនៅតាមបណ្ដោយផ្លូវ២៧១ ទល់មុខផ្សារហេងលី ក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។

ប្រភពព័ត៌មាននៅកន្លែងកើតហេតុ បានប្រាប់ឱ្យដឹងថា មុនកើតហេតុគេបានឃើញបុរសម្នាក់បើករថយន្តកុងតឺន័រមួយគ្រឿងពាក់ស្លាកលេខភ្នំពេញ3F-7537 បើកបរតាមបណ្ដោយផ្លូវ២៧១ក្នុងទិសដៅពីត្បូងទៅជើងក្នុងល្បឿនលឿន លុះមកដល់ចំណុចកើតហេតុខាងលើ ក៏រេចង្កូតទៅបុករះរបាំងថ្មចែកទ្រូងផ្លូវពេញទំហឹង បណ្ដាលឱ្យបាក់ជាច្រើនកង់ ចំណែក​ឯរថយន្តរងការខូចខាតមួយកំណាត់មុខតែសំណាងល្អមិនមាននណាម្នាក់ រងរបួសនោះទេ។ ភ្លាមៗនោះដែរ តៃកុងរថយន្តក៏បានបើកទ្វាររថយន្តចុះចេញពីកន្លែងកើតហេតុបាត់ស្រមោលបន្សល់ទុកតែរថយន្តនៅកណ្ដាលផ្លូវបង្កឱ្យមានការភ្ញាក់ផ្អើលដល់បងប្អូនប្រជាពលរដ្ឋទើបរាយការណ៍ទៅសមត្ថកិច្ច។

ក្រោយកើតហេតុសមត្ថកិច្ចមូលដ្ឋាន សហការជាមួយនិងផ្នែកជំនាញចរាចរណ៍ ចុះមកដល់រួចពិនិត្យនិងទំនាក់ទំនង ទៅផ្នែកជំនាញចរាចរណ៍នៃការិយាល័យចរាចរណ៍រាជធានីភ្នំពេញចុះមកវាស់វែង យករថយន្តមកស្ទូចយករថយន្តបង្កទៅរក្សាទុក រង់ចាំដោះស្រាយនៅពេលក្រោយ៕

អត្ថបទ៖ សុខា