រាជរដ្ឋាភិបាល មានគម្រោងអភិវឌ្ឍន៍​ប្រព័ន្ធធារាសាស្រ្តស្តុកទឹកវ៉ៃគោជំហានទី២

គម្រោងអភិវឌ្ឍន៍ប្រព័ន្ធធារាស្ត្រវ៉ៃគោជំហានទី២ គឺជាគម្រោងរបស់រាជរដ្ឋាភិបាល សម្រាប់ស្តុកទឹកប្រើប្រាស់ និងស្រោចស្រពដីស្រែប្រជាពលរដ្ឋរាប់ម៉ឺនហិចតា។ នេះជាការបញ្ជាក់របស់លោក ម៉ែន វិបុល អភិបាលខេត្តស្វាយរៀង។

លោក ម៉ែន វិបុល ថ្លែងនៅក្នុងកិច្ចប្រជុំស្តីពីការអនុវត្តវិធានការរដ្ឋបាលជំរុញការអនុវត្តគម្រោងអភិវឌ្ឍន៍វ៉ៃគោជំហានទី២ នាព្រឹកថ្ងៃទី២៣ ខែសីហាថា កន្លងមក ក្រុមការងារអន្តរក្រសួងដោះស្រាយផលប៉ះពាល់សហការ​ជាមួយអនុគណៈ​កម្មការខេត្ត និងអាជ្ញាធរពាក់ព័ន្ធបានធ្វើការសម្របសម្រួលទូទាត់សំណងផលប៉ះពាល់តាមគោលនយោបាយ​របស់រាជរដ្ឋាភិបាលបានចំនួន ៤៦៣គ្រួសាររួចហើយ។ ដោយឡែកមានប្រជាពលរដ្ឋចំនួន ៤គ្រួសារ ដែលបានអាស្រ័យ​ផលលើដីសាធារណៈរបស់រដ្ឋក្នុងអាងទឹកកំពង់ជ្រៃមិនព្រមទទួលយកការដោះស្រាយតាមគោលនយោបាយរបស់រាជរដ្ឋាភិបាល ដែលបង្កឱ្យមានការរាំងស្ទះដល់ការអនុវត្តគម្រោង។

លោកអភិបាលខេត្ត បានប្រាប់ឱ្យអាជ្ញាធរ និងអ្នកពាក់ព័ន្ធត្រូវចុះណែនាំដល់ប្រជាពលរដ្ឋទាំង៤គ្រួសារឱ្យបានយល់ និងទទួលយកតាមការដោះស្រាយរបស់គណៈកម្មការអន្តរក្រសួង។

ទន្ទឹមនឹងនេះ លោក ម៉ែន វិបុល បានដាក់បទបញ្ជាដល់សមត្ថកិច្ច និងអាជ្ញាធរពាក់ព័ន្ធត្រូវសហការបង្កលក្ខណៈគ្រប់​បែបយ៉ាង ដើម្បីដោះស្រាយដល់ប្រជាពលរដ្ឋទាំង៤គ្រួសារខាងលើ មុននឹងឈានដល់ការអនុវត្តវិធានការរដ្ឋបាល ដើម្បីក្រុមហ៊ុនអនុវត្តលើការងារសាងសង់តាមផែនការ និងធានាគុណភាព៕ ដោយ:ភក្ដី