អាជ្ញាធរខណ្ឌមានជ័យ បើកការដ្ឋានស្ថាបនាផ្លូវបេតុង និងដាក់ប្រព័ន្ធលូថ្មីជាង ៧០០ម៉ែត្រ ក្នុងសង្កាត់ស្ទឹងមានជ័យទី៣

រដ្ឋបាលខណ្ឌមានជ័យ បានបើកការដ្ឋានជាផ្លូវការក្នុងគម្រោងមូលនិធិអភិវឌ្ឍន៍សង្កាត់ឆ្នាំ២០២៦ ដើម្បីជួសជុលផ្លូវបេតុង និងដាក់ប្រព័ន្ធលូមូលរំដោះទឹកថ្មី ក្នុងភូមិសាស្ត្រសង្កាត់ស្ទឹងមានជ័យទី៣ សំដៅលើកកម្ពស់ហេដ្ឋារចនាសម្ព័ន្ធ និងដោះស្រាយបញ្ហាលិចទឹកជូនប្រជាពលរដ្ឋ។

ពិធីបើកការដ្ឋាននេះ បានប្រព្រឹត្តទៅកាលពីថ្ងៃទី៣០ ខែមិថុនា ឆ្នាំ២០២៦ ក្រោមអធិបតីភាព លោក សេង គន្ធ អភិបាលនៃគណៈអភិបាលខណ្ឌមានជ័យ និងមានការអមដំណើរដោយ លោក សាំង ស៊ីណា ចៅសង្កាត់ស្ទឹងមានជ័យទី៣ ព្រមទាំងលោក-លោកស្រីសមាជិកក្រុមប្រឹក្សាសង្កាត់ និង ប្រជាពលរដ្ឋចូលរួមប្រមាណ ៧០នាក់ ស្ថិតក្នុងភូមិសាស្ត្រចំនួន ៣ គឺ ភូមិទ្រា៤, ភូមិឫស្សី២, និងភូមិដំណាក់ធំ៥ ក្នុងសង្កាត់ស្ទឹងមានជ័យទី៣ ខណ្ឌមានជ័យ។

គម្រោងហេដ្ឋារចនាសម្ព័ន្ធក្នុងមូលនិធិអភិវឌ្ឍន៍សង្កាត់ឆ្នាំនេះ មាន៖ ការងារប្រព័ន្ធលូមូលរំដោះទឹកថ្មីប្រវែង ៧៥២ ម៉ែត្រ និងមានមុខកាត់ទំហំ០.៨០ ម៉ែត្រ , ជួសជុលផ្លូវបេតុង ប្រវែង ៦៣៧ ម៉ែត្រ និងមានទទឹង ៦ម៉ែត្រ។

លោក សាំង ស៊ីណា ចៅសង្កាត់ស្ទឹងមានជ័យទី៣

លោក សាំង ស៊ីណា ចៅសង្កាត់ស្ទឹងមានជ័យទី៣ បានបញ្ជាក់ថា គម្រោងអភិវឌ្ឍន៍នេះ ធ្វើឡើងក្នុងគោលបំណងសម្រួល ដល់ ការធ្វើដំណើររបស់ប្រជាពលរដ្ឋឱ្យកាន់តែមានភាពងាយស្រួលជាងមុន ព្រមទាំងជួយរំដោះទឹកចេញពីលំនៅឋានទប់ទល់នឹងការលិចលង់នារដូវវស្សានេះផងដែរ៕