លោក ឡោ វិចិត្រ ៖ ដីនៅតំបន់ផ្លូវ ៦០ម៉ែត្រ មានហាងឆេង តែខ្វះអ្នកទិញពិតប្រាកដ

ដីនៅតំបន់ផ្លូវ ៦០ម៉ែត្រ ពុំមានដីពុះឡូតិ៍ ៥x២០ ពោលគឺមានតែដីទំហំធំ ចាប់ពី ១ហិកតា ដល់ ២០ហិកតាឡើងទៅ។ នេះជាការមើលឃើញរបស់លោក ឡោ វិចិត្រ ប្រធានសមាគម​អចលនទ្រព្យសកល រាជធានីភ្នំពេញ។

ថ្លែងប្រាប់កម្ពុជាថ្មី លោក ឡោ វិចិត្រ បានលើកឡើងថា ដីនៅតំបន់ផ្លូវ ៦០ម៉ែត្រនេះ ពិបាករកអ្នកទិញពិតប្រាកដ ដោយសារដីទាំងអស់នេះ មានទំហំធំ ដែលត្រូវការទំហំវិនិយោគជាទឹកប្រាក់ច្រើនសន្ធឹកសន្ធាប់។ ឧបមាថា ដីនេះ តម្លៃ ១ម៉ែត្រការ៉េ ១២០០ដុល្លារ ដូច្នេះដី១ហិកតា ស្មើនឹង ១២លានដុល្លារ បើដី ២ហិតា ស្មើ ២៤លានដុល្លារ ដែលជាចំនួនច្រើនខ្លាំង។ នេះជាការបន្ថែមរបស់លោក ឡោ វិចិត្រ។

អ្នកជំនាញអចលនទ្រព្យរូបនេះ បានឱ្យដឹងទៀតថា បច្ចុប្បន្ននេះ អ្នកដែលមានលទ្ធភាពអាចទិញដីទំហំធំបាន គេមិនមែនទិញទុកសម្រាប់លក់ចំណេញនោះទេ។ ចំពោះអ្នកទិញយកមកអភិវឌ្ឍជាផ្ទះល្វែង ក៏មិនអាចវិនិយោគ​លើតម្លៃនេះបានដែរ ព្រោះមិនចំណេញឡើយ តែគេអាចយកមកអភិវឌ្ឍធ្វើជា Shop House ឬផ្ទះវីឡា ក្នុងកម្រិតមធ្យម ឬកម្រិតខ្ពស់ប្រណីត។

លោក គូសបញ្ជាក់ថា សម្រាប់តម្លៃរបស់អចលនទ្រព្យជាផលិតផលសម្រេច ដូចជា ផ្ទះវីឡា ឬ Shop House ជាដើម បច្ចុប្បន្នពុំទាន់មានសកម្មភាពកម្រើកខ្លាំងនៅឡើយទេ។

ប្រសិនបើអ្នកវិនិយោគ ទិញដីហាងឆេងបច្ចុប្បន្ន យកទៅអភិវឌ្ឍស្របពេលដែលតម្លៃដើមនៃសំណង់មានដូចជា បេតុង សរសៃដែក គ្រឿងបង្គំផ្សេងៗ មានតម្លៃថ្លៃ និងតម្លៃពលកម្មកើនឡើង ការអភិវឌ្ឍពិបាកនឹងទទួលបានប្រាក់ចំណេញ ដែលនេះជាបញ្ញាចោទ នៅពេលដី និងថ្លៃដើមកើនឡើង ហើយតម្លៃលក់ចេញនៅទ្រឹង។

អ្នកជំនាញអចលនទ្រព្យ ឡោ វិចិត្រ បានបញ្ចេញជាទស្សនថា «យើងត្រូវរង់ចាំដល់ទីផ្សារកម្រើកឡើងវិញ តម្រូវការនៃការទិញលំនៅឋាន ក៏ដូចជាប្រាក់ចំណូលរបស់ប្រជាជនកើនឡើង ឬការហូរចូលរបស់វិនិយោគិន​ក្រៅប្រទេសចូលមកច្រើន តាមរយៈមកវិនិយោគ និងរស់នៅអចិន្ត្រៃយ៍ ជាពិសេសនៅរាជធានីភ្នំពេញ ទើបស្ថានការណ៍អាចប្រែប្រួលផ្តល់ឱកាសដល់អ្នកអភិវឌ្ឍមើលឃើញពីសក្តានុពលម្តងទៀត»។

គួរកត់សម្គាល់ថា ប៉ុន្មានឆ្នាំចុងក្រោយនេះ នៅតំបន់ផ្លូវ ៦០ម៉ែត្រ មានការអភិវឌ្ឍខ្លាំង មានដូចជា គម្រោងធំៗ ផ្សារទំនើប អគារពាណិជ្ជកម្ម វីឡា និងផ្ទះអាជីវកម្ម ជាដើម។ ជាមួយគ្នានេះ ផ្សារទំនើបធំៗចំនួនពីរ គឺផ្សារទំនើប អ៊ីអន៣ និងផ្សារទំនើបជីបម៉ុង ក៏គ្រោងបើកដំណើរការនៅឆ្នាំ ២០២២នេះផងដែរ ដែលផ្សារទំនើបទាំងពីរនេះ គឺស្ថិតនៅជាប់ផ្លូវ ៦០ម៉ែត្រ ខាងត្បូងរាជធានីភ្នំពេញ៕