បណ្ដេញជនជាតិជប៉ុន ១៩នាក់ ពាក់ព័ន្ធនឹងបទល្មើសលួចស្នាក់នៅ និងធ្វើការងារខុសច្បាប់នៅកម្ពុជា

ជនជាតិជប៉ុនចំនួន ១៩នាក់ ត្រូវបានបណ្ដេញចេញពីប្រទេសកម្ពុជា កាលពីរសៀលថ្ងៃទី ១១ ខែមេសា ឆ្នាំ ២០២៣ ពាក់ព័ន្ធនឹងបទល្មើសលួចស្នាក់នៅ និងធ្វើការងារខុសច្បាប់នៅកម្ពុជា។

សេចក្ដីប្រកាសព័ត៌មាន របស់អ្នកនាំពាក្យអគ្គនាយកដ្ឋានអន្តោប្រវេសន៍ បានឲ្យដឹងថា អនុលោមតាមច្បាប់ ស្តីពី អន្តោប្រវេសន៍ គឺអគ្គនាយកដ្ឋានអន្តោប្រវេសន៍ បានធ្វើការបណ្ដេញជនជាតិជប៉ុនចំនួន ១៩នាក់ ភេទប្រុស ពាក់ព័ន្ធបទល្មើសលួចស្នាក់នៅ និងធ្វើការងារខុសច្បាប់ ចេញពីព្រះរាជាណាចក្រកម្ពុជា តាមប្រកាសរបស់ក្រសួងមហាផ្ទៃ ដោយហាមឃាត់ការចូលប្រទេសកម្ពុជារយៈពេល ៣ឆ្នាំ។ ជនជាតិជប៉ុនទាំង ១៩នោះ ត្រូវបានបណ្ដេញចេញតាមអាកាសយានដ្ឋានអន្តរជាតិភ្នំពេញ ឆ្ពោះទៅកាន់ទីក្រុងតូក្យូ ប្រទេសជប៉ុន។

សូមជម្រាបថា ជនជាតិជប៉ុនចំនួន ១៩នាក់ខាងលើ ត្រូវបានសមត្ថកិច្ច នៃអគ្គស្នងការដ្ឋាននគរបាលជាតិ ធ្វើការស្រាវជ្រាវរកឃើញក្នុងភូមិសាស្ត្រខេត្តព្រះសីហនុ បន្ទាប់ពីទទួលបានបណ្ដឹងតាមរយៈ HOTLINE ជនបរទេសរបស់អគ្គស្នងការដ្ឋាននគរបាលជាតិ កាលពីចុងខែមករា ឆ្នាំ ២០២៣កន្លងទៅនេះ រួចបញ្ជូនបានទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្ត ស្របតាមច្បាប់ ស្តីពី អន្តោប្រវេសន៍។

នៅពេលទៅដល់អាកាសយានដ្ឋាន Haneda ក្នុងទីក្រុងតូក្យូ កាលពីយប់ថ្ងៃទី ១១ ខែមេសា ឆ្នាំ ២០​២៣ដដែល គឺជនជាតិ​ជប៉ុនទាំង ​១៩​នាក់នោះ ត្រូវបានសមត្ថកិច្ចក្រុងតូក្យូ ចាប់ខ្លួនភ្លាមៗ។

បើតាមការចុះផ្សាយរបស់សារព័ត៌មាន NHK បានឲ្យដឹងថា ជនជាតិជប៉ុនទាំងនោះ ​បានឆ​បោក​ប្រាក់​ប្រហែល ២៥០, ០០០យ៉េន ឬ​ប្រហែល ១៩០០ដុល្លារអាមេរិក ​ពី​ស្រ្តីរស់​នៅ​ទីក្រុង​តូក្យូ​ម្នាក់ អាយុ ៦០ឆ្នាំ​ កាលពី​ខែ​មករា។ ពួកគេបានផ្ញើសារក្លែងក្លាយ ព្រមានដល់ស្ត្រីរូបនោះ ឲ្យបង់ប្រាក់សម្រាប់សេវាកម្មអនឡាញ។ ក្រុមនេះ បានធ្វើ​ប្រតិបត្តិការ​ចេញ​ពី​បន្ទប់​សណ្ឋាគារ​មួយ ​ក្នុង​ក្រុង​ព្រះសីហនុ៕