កុមារមានជំងឺទឹកនោមផ្អែមធ្ងន់ធ្ងរ ត្រូវបានសង្គ្រោះជីវិតជាថ្មី ពីមន្ទីរពេទ្យគន្ធបុប្ផា

កុមារីវ័យ ១២ឆ្នាំម្នាក់ មានជំងឺទឹកនោមផ្អែមជាយូរមកហើយ ត្រូវបានជួយសង្គ្រោះជីវិតជាថ្មី ដោយគ្រូពេទ្យជំនាញ នៃមន្ទីរពេទ្យគន្ធបុប្ផា។

មន្ត្រីមន្ទីរពេទ្យគន្ធបុប្ផា បានឱ្យដឹងថា ជំងឺទឹកនោមផ្អែមលើកុមារ ជាជំងឺទឹកនោមផ្អែមមួយប្រភេទ ដែលត្រូវការចាក់អាំងស៊ុយលីនអស់មួយជីវិត។ ក្មេងស្រី អាយុ ១២ ឆ្នាំម្នាក់ ត្រូវបានព្យាបាលជំងឺទឹកនោមផ្អែម និងតាមដានជំងឺជាច្រើនឆ្នាំមកហើយនៅមន្ទីរពេទ្យគន្ធបុប្ផា។ ប៉ុន្តែមួយរយៈពេលជាយូរចុងក្រោយនេះ នាងពុំបានមកតាមការណាត់នោះទេ ដែលធ្វើឱ្យជំងឺនាងវិវត្តទៅជាធ្ងន់ធ្ងរ សន្លប់បាត់ស្មារតី ដំបៅរលួយសាច់ខ្នង និងខូចតម្រងនោមយ៉ាងធ្ងន់ធ្ងរបំផុត។

នាងត្រូវបានសង្រ្គោះជីវិតជាថ្មី ដោយក្រុមគ្រូពេទ្យឯកទេសសង្រ្គោះបន្ទាន់ នៃមន្ទីរពេទ្យគន្ធបុប្ផា និងត្រូវបានលាងឈាមអស់ជាច្រើនដង។ នាងទើបបានត្រឡប់ទៅផ្ទះវិញ ដោយស្នាមញញឹម សូមអរគុណ និងកោតសរសើរដល់ក្រុមគ្រូពេទ្យឯកទេសសង្គ្រោះបន្ទាន់ នៃមន្ទីរពេទ្យគន្ធបុប្ផាភ្នំពេញ ដែលបានសង្គ្រោះជីវិតមួយនេះ។

ក្រសួង​អប់រំ យុវជន និង​កីឡា កាលពី​ខែមករា ឆ្នាំ​២០២០ បានចាប់ផ្ដើម​ធ្វើ​យុទ្ធនាការ​ផ្សព្វផ្សាយ​អំពី​សុវត្ថិភាព​ចំណីអាហារនៅក្នុង​សាលារៀន ដើម្បី​ទប់ស្កាត់​ការលក់​អាហារ​មាន​សារ​ធាតុគីមី និង​អាហារ​ដែល​ធ្វើឱ្យប៉ះពាល់​ដល់​សុខភាព​សិស្ស​។ ចំណីអាហារ​ត្រូវ​ហាមឃាត់​ក្នុង​គ្រឹះស្ថានសិក្សា មានដូចជា​៖ ១. អាហារ​គ្រប់​ប្រភេទដែល​ហួសកំណត់​កាលបរិច្ឆេទ ២. គ្រឿង​ស្រវឹង និង​ផលិតផល​ថ្នាំជក់​គ្រប់​ប្រភេទ ៣. ចំណីអាហារ​ដែល​មិនមាន​ប្រភព​ច្បាស់លាស់ ៤. ភេសជ្ជៈ​ប៉ូវ​កម្លាំង ភេសជ្ជៈ​មាន​រសជាតិ​ផ្អែម​ខ្លាំង កាហ្វេ ការ៉េម ទឹក​ស៊ី​រ៉ូ​ហ៍​គ្រប់​ប្រភេទ ៥. ស្ករ​សូកូឡា ស្ករ​គ្រាប់ និង​ស្ករ​កៅស៊ូ គ្រប់​ប្រភេទ ៦. ចាហួយ​គ្រប់​ប្រភេទ នំ​ដូ​ណាត់ និង​នំ​ផ្អែម​ខ្លាំង​។​

គួររំលឹកថា លោក ហង់ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា​ បានលើកឡើងថា​ ​មិនមែន​ហាម​មិនឱ្យ​ហូប​អី​ផ្អែម​ទេ ប៉ុន្តែត្រូវមាន​តុល្យភាព មិនឱ្យ​ផ្អែម​ខ្លាំង មិនឱ្យ​មាន​ជាតិ​ខ្លាញ់​ខ្លាំងពេក ឬមួយ​មិនឱ្យ​ប្រៃ​ពេក​។ ប្រៃ​ពេក​នាំឱ្យ​កើត​ជំងឺ​ឡើង​ឈាម ខ្លាញ់​ច្រើនពេក នាំឱ្យ​ធាត់​ខ្លាំងពេក ដែល​អាចឈាន​ទៅរក​ជំងឺ​បេះដូង​។

គួរបញ្ជាក់ថា រាល់ការព្យាបាលទាំងអស់នៅមន្ទីរពេទ្យគន្ធបុប្ផាទាំងនៅរាជធានីភ្នំពេញ និងខេត្តសៀមរាប គឺមិនគិតថ្លៃសម្រាប់គ្រប់ៗគ្នា ដោយគ្មានការរើសអើង។ មន្ទីរពេទ្យគន្ធបុប្ផាទាំង ៥ ទីតាំង នៅតែត្រូវការថវិកាជាប្រចាំប្រមាណ ៨៤ ម៉ឺនដុល្លារក្នុង ១ សប្តាហ៍ ឬត្រូវចំណាយប្រមាណ ៤០ លានដុល្លារ ក្នុង ១ ឆ្នាំ ដើម្បីធ្វើប្រតិបត្តិការមនុស្សធម៌សង្រ្គោះជីវិតកុមារនៅកម្ពុជា ដោយមានការជួយបំពេញបន្ថែមគ្នាទៅវិញទៅមក រវាងមូលនិធិគន្ធបុប្ផាស្វីស និងមូលនិធិគន្ធបុប្ផាកម្ពុជា ក៏ដូចជាពីសំណាក់ក្រសួងសុខាភិបាល នៃព្រះរាជាណាចក្រកម្ពុជា។ ការបរិច្ចាគនេះតែមួយអាចគ្រប់គ្រាន់នៅឡើយទេសម្រាប់ការគាំទ្រផ្នែកហិរញ្ញវត្ថុដល់មន្ទីរពេទ្យគន្ធបុប្ផា ព្រោះមន្ទីរពេទ្យមិនមែនជាស្ថាប័នដែលរកប្រាក់ចំណូល។

មូលនិធិគន្ធបុប្ធាកម្ពុជាបានបង្កើត KHQR CODE (ទាំងប្រាក់រៀល និងដុល្លារអាមេរិក) សម្រាប់គ្រប់ App ធនាគារទាំងអស់ក្នុងព្រះរាជាណាចក្រកម្ពុជា ដែលមានកម្មវិធីស្ដែន QR CODE ដើម្បីសម្រួលដល់ការចូលរួមបរិច្ចាគពីសំណាក់សប្បុរសជននានា ក្នុងគោលបំណងជួយនាំភាពញញឹមដល់កុមារដែលជាអនាគតដ៏ភ្លឺស្វាងរបស់កម្ពុជា តាមរយៈការរួមគ្នារក្សានិរន្តរភាពនៃកិច្ចដំណើរការរបស់ មន្ទីរពេទ្យគន្ធបុប្ផា ទាំង ៥ ទីតាំង នៅព្រះរាជាណាចក្រកម្ពុជា៕

អត្ថបទ៖ ច័ន្ទ វីរៈ